ଭୁବନେଶ୍ବର: ରାଜଧାନୀରେ ଉପର ମୁହାଁ ଅପରାଧ । ରାଜଧାନୀରେ ବେଧଡ଼କ ଅପରାଧ ଘଟାଇ ଚାଲିଛନ୍ତି ଅପରାଧୀ । ଲକ୍ଷ୍ମୀସାଗର ଚିନ୍ତାମଣିଶ୍ୱର ଅଞ୍ଚଳରେ ଦୁର୍ବୃତ୍ତ ଘଟାଇଛନ୍ତି ଆତଙ୍କ ରାଜ । ରାତି ଅଧରେ ପେଟ୍ରୋଲ ଢାଳି କାରରେ ଲଗାଇ ଦେଇଥିଲେ ନିଆଁ । ଦେଖନ୍ତୁ ଏହି ସିସିଭି ଭିଜୁଆଲକୁ । ରାତି 3.46 ମିନିଟ...ଜଣେ ଦୁର୍ବୃତ୍ତ ହାତରେ ତେଲ ବୋତଲ ଧରି ଆସୁଛି । କାରରେ ନିଆଁ ଲଗାଇ ହୋଇ ଯାଉଛି ଫେରାର । ଜଳି ପୋଡି ପାଉଁଶ ହୋଇଛି କାର । ଏହାସହ ଗୋଟିଏ ଟାଟା ଏସି ଓ ଗୋଟିଏ ଅଟୋ ମଧ୍ୟ ପୋଡି ଯାଇଛି । ଘଟଣା ସ୍ଥଳରେ ଲାଗିଥିବା ସିସି ଟିଭି ଫୁଟେଜ ଯାଞ୍ଚ କରିବା ସହ ଗାଡି ମାଲିକଙ୍କ ବୟାନ ରେକର୍ଡ କରିଛି ପୋଲିସ । ରାଜଧାନୀରେ ଏଭଳି ଘଟଣା ପରେ ସ୍ଥାନୀୟ ଅଞ୍ଚଳରେ କୋକୁଆ ଭୟ ସୃଷ୍ଟି ହୋଇଛି ।

ଆସନ୍ତୁ ନଜର ପକାଇବା 2026 ବର୍ଷ ଆରମ୍ଭ ରୁ ଏପର୍ଯ୍ୟନ୍ତ ଘଟିଥିବା କିଛି ଚର୍ଚିତ ଘଟଣା ଉପରେ | ଜାନୁଆରୀ 1 ତାରିଖ | ନୟାପଲି ନୁଆସାହି ଅଞ୍ଚଳରେ ତ୍ରିକୋଣୀୟ ପ୍ରେମ ପାଇଁ ଯୋଗେନ୍ଦ୍ର ଦାସ ଓରଫ ବବୁଲୁ ଙ୍କୁ ଘର ସାମ୍ନା ରେ ସଙ୍ଘବଦ୍ଧ ଆକ୍ରମଣ କରି ହତ୍ୟା କରିଥିଲେ | ଜାନୁଆରୀ 10 ତାରିଖ | ଲକ୍ଷ୍ମୀସାଗର ଅଞ୍ଚଳରେ ହତ୍ୟା ଅଭିଯୁକ୍ତ ମାନେ ଖଣ୍ଡାରେ କେକ୍ କାଟି ଜନ୍ମ ଦିନ ପାଳିଥିଲେ | ଯାହାର ଭିଡ଼ିଓ ସୋସିଆଲ ମିଡ଼ିଆରେ ଭାଇରାଲ ହେବା ପରେ କିଛି ଅଭିଯୁକ୍ତ ଙ୍କୁ ଗିରଫ କରିଥିଲା ପୋଲିସ | ଜାନୁଆରୀ 17 ତାରିଖ | କ୍ୟାପିଟାଲ ହସ୍ପିଟାଲ ରେ ଡାକ୍ତର ଙ୍କୁ ରୋଗୀଙ୍କ ସମ୍ପର୍କୀୟ ମାଡ଼ ମାରି ଲହୁ ଲୁହାଣ କରିଥିଲେ | ଯାହାକୁ ନେଇ ଧାରଣା ରେ ବସିଥିଲେ ଜୁନିୟର ଡାକ୍ତର ସଙ୍ଘ | ଜାନୁଆରୀ 21 ତାରିଖ | କ୍ୟାପିଟାଲ ହସ୍ପିଟାଲ ଛକରେ ବୁଲେଟ ଚାଳକଙ୍କୁ ଥର ଗାଡି ଧକା ଦେଇଥିଲା | ଘଟଣା ସ୍ଥଳରେ ଜଣଙ୍କର ମୃତ୍ୟୁ ହୋଇଥିବା ବେଳେ ଆଉ ଦୁଇଜଣ ଗୁରୁତର ଆହତ ହୋଇଥିଲେ | ଜାନୁଆରି 23 ତାରିଖ | ଚନ୍ଦ୍ରଶେଖରପୁର ହାଉସିଂ ବୋର୍ଡ କଲୋନୀରେ ଗାଡି ହେଡ଼ ଲାଇଟ ମରାକୁ କେନ୍ଦ୍ର କରି ଘଟିଥିଲା ଗୋଷ୍ଟି ସଂଘର୍ଷ | ଦୁଇଜଣ ଯୁବକଙ୍କୁ ଖଣ୍ଡାରେ ହାଣି ଲହୁ ଲୁହାଣ କରି ପକାଇଥିଲେ | ଜାନୁଆରୀ 27 ତାରିଖରେ ସୁନ୍ଦରପଦା ଆଜାଦ କଲୋନୀ ଅଞ୍ଚଳରେ ବୋମା ଭିଡୁଥିବା ବେଳେ ବିସ୍ପୋରଣ ଘଟିଥିଲା | କୁଖ୍ୟାତ ଅପରାଧୀ ମଫି ସମେତ 4 ଜଣ ଗୁରୁତର ଆହତ ହୋଇଥିଲେ | ଘଟଣାର NIA ଖୋଳତାଡ଼ କରିଥିଲା | ଫେବୃଆରୀ 9 ତାରିଖ | ତ୍ରିକୋଣୀୟ ପ୍ରେମ ପାଇଁ ପ୍ରେମିକା ସାମ୍ନା ରେ ଦ୍ୱିତୀୟ ପ୍ରେମିକ କୁ ଛୁରୀ ଭୁସି ହତ୍ୟା କରିଥିଲା ପ୍ରଥମ ପ୍ରେମିକ |

ରାଜଧାନୀରେ ଅପରାଧ ବୃଦ୍ଧିକୁ ନେଇ ବଢ଼ିଛି ରାଜଧାନୀବାସୀଙ୍କ ଚିନ୍ତା । ପାଟ୍ରୋଲିଂ ବ୍ୟବସ୍ଥା କୁ କଡା କଡି କରିବା ସହ ଅପରାଧୀଙ୍କ ଗତି ଵିଧି ଉପରେ କମିଶନରେଟ ପୋଲିସ କଡ଼ା ନଜର ରଖିବାକୁ ଦାବି କରିଛନ୍ତି ଲୋକେ। 
ଏଥିସହ ପଢ଼ନ୍ତୁ: ତ୍ରିକୋଣୀୟ ପ୍ରେମର କରୁଣ ପରିଣତି; ପ୍ରେମିକର ପ୍ରେମିକାକୁ ହତ୍ୟା