ସିଂହଦ୍ବାର ସମ୍ମୁଖରେ ସ୍ବର୍ଣ୍ଣିମ ଆଭା ଦେଖି ବିଭୋର ଭକ୍ତ । ରଥରେ ବିରାଜମାନ ସ୍ବର୍ଣ୍ଣ ଅଳଙ୍କାର ବିମଣ୍ଡିତ ବଡ଼ଠାକୁର ଶ୍ରୀବଳଭଦ୍ର, ଜଗଜ୍ଜନନୀ ଦେବୀ ସୁଭଦ୍ରା, ଜଗତକର୍ତ୍ତା ମହାପ୍ରଭୁ ଶ୍ରୀଜଗନ୍ନାଥ ଓ ଚକ୍ରରାଜ ଶ୍ରୀସୁଦର୍ଶନ । ଶୋଭା ପାଉଛି ଶ୍ରୀପୟର ଓ ଶ୍ରୀଭୁଜ ସାଙ୍ଗକୁ ଦିଅଁଙ୍କର ସ୍ବତନ୍ତ୍ର ଆୟୁଧ । ମସ୍ତକରେ ସୁବର୍ଣ୍ଣ କିରୀଟ, ଅଣ୍ଟାରେ ସୁନାପଟି ଓଡ଼ିଆଣୀ, କର୍ଣ୍ଣରେ କୁଣ୍ଡଳ, ଆଖିପତା ଉପରେ ଚନ୍ଦ୍ରସୂର୍ଯ୍ୟ, ବେକରେ ଘାଗଡ଼ା ଓ କଦମ୍ବ ମାଳି । ଏମିତିଏମିତି ୧୩୮ ପ୍ରକାରର ରତ୍ନଖଚିତ ଅଳଙ୍କାର । ଅଖିଳ ବ୍ରହ୍ମାଣ୍ଡର ରାଜାଧିରାଜଙ୍କର ଅପୂର୍ବ ସ୍ବର୍ଣ୍ଣ ଶୃଙ୍ଗାର ଦେଖି ଚକିତ, ପୁଲକିତ, ପୁଣି କେତେବେଳେ ଆଧ୍ୟାତ୍ମିକ ଭାବନାରେ ଗଦଗଦ ଲକ୍ଷାଧିକ ଶ୍ରଦ୍ଧାଳୁ ।

ଆଜି ମଧ୍ୟାହ୍ନ ଧୂପ ଓ ମଇଲମ ପରେ ପାଖାପାଖି ଅପରାହ୍ନ ସାଢ଼େ ୪ଟା ୪୫ ବେଳେ ଆରମ୍ଭ ହୋଇଥିଲା ସୁନାବେଶ ପାଇଁ ପ୍ରସ୍ତୁତି । ସିଂହଦ୍ବାର ଦେଇ ସେବାୟତମାନେ ରଥକୁ ଗୋଟିଏ ପରେ ଗୋଟିଏ ଦୁର୍ମୂଲ୍ୟ ଅଳଙ୍କାର ବୋହିନେବା ବେଳେ ଝଲସି ଉଠିଥିଲା ଅଗଣିତ ଶ୍ରଦ୍ଧାଳୁଙ୍କ ଆଖି । ରଥାରୂଢ଼ ଚତୁର୍ଦ୍ଧା ବିଗ୍ରହଙ୍କ ବସ୍ତ୍ର ଭୂଷଣ ଓ ପୁଷ୍ପ ଭୂଷଣ ପରେ ଶ୍ରୀଅଙ୍ଗରେ ଲାଗି ହୋଇଥିଲା ମହଣ ମହଣ ସୁନା । ପ୍ରତିବର୍ଷ ଶ୍ରୀମନ୍ଦିର ରତ୍ନବେଦୀରେ ଚତୁର୍ଦ୍ଧାମୂରତିଙ୍କର ଚାରି ଥର ସୁନାବେଶ ହେଉଥିବା କେବଳ ରଥ ଉପରେ ଏହି ଥରଟେ ମାତ୍ର ଦର୍ଶନ ଦିଅନ୍ତି ଏହି ଅନନ୍ୟ ବେଶରେ ।

ସୁନାବେଶ ଦର୍ଶନ ପାଇଁ ପୁରୀରେ ଭକ୍ତଙ୍କର ପ୍ରବଳ ଭିଡ ହୋଇଛି। ଏହାକୁ ନଜରରେ ରଖି ତିନିରଥର ସୁରକ୍ଷା ସହ ଭକ୍ତଙ୍କ ସୁରକ୍ଷା ଓ ଶୃଙ୍ଖଳିତ ଦର୍ଶନ ପାଇଁ ସମସ୍ତ ବ୍ୟବସ୍ଥା କରାଯାଇଛି। ଏଥିସହ ପୁରୀକୁ ଆସୁଥିବା ଗାଡି଼ଗୁଡ଼ିକ ପାଇଁ ସ୍ବତନ୍ତ୍ର ଟ୍ରାଫିକ୍ ରୁଟ୍ ଓ ପାର୍କିଂ ସ୍ଥାନ ନିରୂପଣ କରାଯାଇଛି। ଯେପରି ଦର୍ଶନ ବେଳେ କୌଣସି ଅପ୍ରିତିକର ପରିସ୍ଥିତି ନହୁଏ ସେଥିପାଇଁ ସଂପୂର୍ଣ୍ଣ ପ୍ରସ୍ତୁତ ପୋଲିସ ଓ ଶ୍ରୀମନ୍ଦିର ପ୍ରଶାସନ। ଆସନ୍ତାକାଲି ଅଧରପଣା ନୀତି ଥିବା ବେଳେ ଓ ଜୁଲାଇ ୮ରେ ନୀଳାଦ୍ରି ବିଜେରେ ନୀଳକନ୍ଦରକୁ ଲେଉଟିବେ ନୀଳାଦ୍ରିପତି ।