ରାଜ୍ୟର ଷ୍ଟାର୍ଟଅପ କ୍ଷେତ୍ରରେ ଲମ୍ବା ଲମ୍ଫ ପାଇଁ ଯୁବପିଢ଼ିଙ୍କୁ କେନ୍ଦ୍ରମନ୍ତ୍ରୀଙ୍କ ଆହ୍ଵାନ

ଭୁବନେଶ୍ଵର: ଉତ୍କର୍ଷ ଓଡ଼ିଶା ସମ୍ମିଳନୀରେ ଆଜି ଏକ ବଡ଼ କାର୍ଯ୍ୟକ୍ରମ ଥିଲା ଷ୍ଟାର୍ଟ ଅପ୍ ଓଡ଼ିଶା ସେସନ୍ । ଏଥିରେ ରାଜ୍ୟର ଯୁବପିଢ଼ିଙ୍କୁ ବଡ଼ ଆହ୍ଵାନ ଦେଇଛନ୍ତି କେନ୍ଦ୍ର ଶିକ୍ଷାମନ୍ତ୍ରୀ । ଧର୍ମେନ୍ଦ୍ର ପ୍ରଧାନ କହିଛନ୍ତି, ଓଡ଼ିଶା ହୋଇ ପାରିବ ଷ୍ଟାର୍ଟ ଅପ୍ ଆଧାରିତ ଅର୍ଥନୈତିକ ରାଜ୍ୟ । ଷ୍ଟାର୍ଟ ଅପ୍ କ୍ଷେତ୍ରରେ ଓଡ଼ିଶାର ଯୁବପିଢ଼ିକୁ ଲମ୍ବା ଲମ୍ଫ ପ୍ରଦାନ କରିବାକୁ ହେବ । ନୂଆ ଉଦ୍ୟମୀଙ୍କୁ ନେଇ ନୂଆ ଇକୋ ସିଷ୍ଟମ ଓ ନୂଆ ପୁଞ୍ଜି ନିବେଶକାରୀ ସୃଷ୍ଟି କରିବାକୁ ମଧ୍ୟ ପରାମର୍ଶ ଦେଇଛନ୍ତି ଧର୍ମେନ୍ଦ୍ର । 

ଯୁବ ଉଦ୍ୟୋଗୀ ଓ ଛାତ୍ରଛାତ୍ରୀଙ୍କୁ ରାଜ୍ୟରେ ଷ୍ଟାର୍ଟଅପ ନେଇ ଥିବା ସମ୍ଭାବନା ବିଷୟରେ ବୁଝାଇଲେ ଧର୍ମେନ୍ଦ୍ର । ଉତ୍କର୍ଷ ଓଡ଼ିଶା ସମ୍ମିଳନୀରେ ଆୟୋଜିତ ହୋଇଥିବା ଷ୍ଟାର୍ଟ ଅଫ ଓଡିଶା ସେସନରେ କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନ କହିଥିଲେ, ଉତ୍କର୍ଷ ଓଡ଼ିଶା କେବଳ ଗୋଟେ କାର୍ଯ୍ୟକ୍ରମ ନୁହେଁ ପୂର୍ବଦୋୟର ଗର୍ବ ଓ ଗୌରବ । ଆମେ ଓଡ଼ିଆ ଲୋକମାନେ ପୂର୍ବଦୋୟ କୁ ସଫଳ କରିବା ଲାଗି ପ୍ରତିଦିନ କାର୍ଯ୍ୟ କରିବାକୁ ହେବ ।

ଜଗନ୍ନାଥଙ୍କ କୃପାରୁ ବାଣିଜ୍ୟ ଶିଳ୍ପ କ୍ଷେତ୍ରରେ ରାଜ୍ୟର ଲମ୍ବା ଇତିହାସ ରହିଛି । ଆହୁରି କହିଥିଲେ ଓଡ଼ିଆ ଲୋକଙ୍କ ପାଇଁ ଦୁଇଟି ଟାର୍ଗେଟ ୨୦୩୬ ଓ ୨୦୪୭ । ବର୍ତ୍ତମାନର ପିଢ଼ିଙ୍କ ସୌଭାଗ୍ୟ ଦୁଇଟି ଶତବାର୍ଷିକୀ ପୂରଣ କରିବାର ସୁଯୋଗ ପାଇବେ । ଉତ୍କର୍ଷ ଓଡ଼ିଶା ସମ୍ମିଳନୀରେ ୫ ଲକ୍ଷ କୋଟିର ପୁଞ୍ଜି ନିବେଶ ପାଇଁ ଆଲୋଚନା ଏମଓୟୁ ସ୍ଵାକ୍ଷର ହୋଇଛି । ଷ୍ଟାର୍ଟଅପ୍ ଓଡ଼ିଶାରେ ବି ଆଜି ଅନେକ ଗୁଡ଼ିଏ ଏମଓୟୁ ସ୍ଵାକ୍ଷର ହୋଇଛି । ଯାହା ଆମ ପାଇଁ ବେଶ ଉତ୍ସାହ ଜନକ ।

ସେହିପରି ଧର୍ମେନ୍ଦ୍ର କହିଥିଲେ, ଆମ ପାଇଁ ପ୍ରାଥମିକ ଚ୍ୟାଲେଞ୍ଜ ହେଉଛି ରାଜ୍ୟର ସମସ୍ତ ସମ୍ଭାବନାକୁ ଓଡ଼ିଶାରେ ହିଁ ବାନ୍ଧି ରଖିବାର ଉପାୟ ବାହାର କରିବାକୁ ପଡ଼ିବ । ତାହା ହିଁ ସରକାରଙ୍କ ପ୍ରତିଶ୍ରୁତିବଦ୍ଧତା ଓ ରଣନୀତି । ଯେବେ ଯୁବପିଢ଼ି ପ୍ରତିପୋଷଣ ଅନୁକୂଳ ସହରରେ କିମ୍ବା ଛୋଟ ସହରରେ ଭଲ ପାଠ ପଢ଼ି ନିଜ ଭାଗ୍ୟ ଓ ସମାଜର ନିର୍ମାଣ ପାଇଁ କାମ କରିବେ ତେବେ ଯାଇ ନୂଆ ସମ୍ଭାବନା ସୃଷ୍ଟି ହୋଇ ପାରିବ । ବିଶ୍ଵବିଦ୍ୟାଳୟରେ ପାଠ ପଢ଼ା ଯଦି ଗବେଷଣା ଆଡ଼କୁ ଯାଏ ତେବେ ସୃଜନଶୀଳ ଇକୋ ସିଷ୍ଟମ ସୃଷ୍ଟି ହୋଇପାରିବ ।

ରାଜ୍ୟ ଏମଏସଏମଇ ମନ୍ତ୍ରୀ ମଧ୍ୟ ଓଡ଼ିଶାର ସମ୍ଭାବନା ନେଇ ଯୁବ ଉଦ୍ୟୋଗୀ ମାନଙ୍କୁ ବୁଝାଇ ଥିଲେ । ଦେଶରେ ଷ୍ଟାର୍ଟଅପ ବେଶ ଆଗକୁ ବଢି ଚାଲିଥିବା ବେଳେ ରାଜ୍ୟରେ ପୂର୍ବ ସରକାରର ଆନ୍ତରିକତା ଅଭାବରୁ ଆଗକୁ ବଢି ପାରିନାହିଁ । ଯେଉଁଥି ପାଇଁ ଅନେକ ଷ୍ଟାର୍ଟଅପ ଆରମ୍ଭ ହୋଇ ବନ୍ଦ ହୋଇ ଯାଇଛି । ତେଣୁ ପୁଣିଥରେ ଷ୍ଟାର୍ଟଅପ କ୍ଷେତ୍ରକୁ ଆଗେଇ ନେବା ନୂଆ ସରକାରଙ୍କ ପାଇଁ ବଡ଼ ଆହ୍ଵାନ ହୋଇଛି ।