ଭୁବନେଶ୍ଵର: ଆଦିବାସୀଙ୍କ ଉନ୍ନତି ହେଉଛି ସରକାରଙ୍କ ଲକ୍ଷ୍ୟ । ସେଥିପାଇଁ ଆଦିବାସୀ ପିଲାଙ୍କ ପାଠପଢ଼ା ଲାଗି ଅର୍ଥ ଖର୍ଚ୍ଚ କରୁଛନ୍ତି କେନ୍ଦ୍ର ସରକାର । ଭୁବନେଶ୍ଵରସ୍ଥିତ KISS ବିଦ୍ୟାଳୟରେ ହଜାର ହଜାର ଆଦିବାସୀ ଓ ହରିଜନ ପିଲା ପାଠ ପଢ଼ୁଥିବା ବେଳେ କେନ୍ଦ୍ର ସରକାର ଅନୁଦାନ ଯୋଗାଇ ଦେଉଛନ୍ତି ।

ଏନେଇ ବିଧାନସଭାରେ ବିଧାୟକ ଦାସରଥୀ ଗମାଙ୍ଗ ଅଣତାରକା ପ୍ରଶ୍ନ କରିଥିବା ବେଳେ ଉତ୍ତର ରଖିଛନ୍ତି ଅନୁସୂଚିତ ଜନଜାତି ଓ ଅନୁସୂଚିତ ଜାତି ଉନ୍ନୟନ ଏବଂ ସଂଖ୍ୟାଲଘୁ ସମ୍ପ୍ରଦାୟ ଓ ପଛୁଆବର୍ଗ କଲ୍ଯାଣ ମନ୍ତ୍ରୀ ନିତ୍ୟାନନ୍ଦ ଗଣ୍ଡ ।

ବିଭାଗୀୟ ମନ୍ତ୍ରୀ ବିଧାନସଭାରେ ଦେଇଥିବା ତଥ୍ୟ ଅନୁସାରେ, 'ଭୁବନେଶ୍ଵର ସ୍ଥିତ KISSରେ ଏବେ ୧୪ ହଜାର ୪୮୨ ଜଣ ଅନୁସୂଚିତ ଜନଜାତି ପିଲା ପାଠ ପଢ଼ୁଛନ୍ତି । ଅନୁସୂଚିତ ଜନଜାତି ଓ ଅନୁସୂଚିତ ଜାତି ଉନ୍ନୟନ ବିଭାଗ ଦ୍ଵାରା ୧୦ ହଜାର ଛାତ୍ର ଓ ଛାତ୍ରୀଙ୍କୁ ମାସିକ ୧୫୦୦ କୁଇଣ୍ଟାଲ୍ ଚାଉଳ ଯୋଗାଇ ଦିଆଯାଉଛି ।

ମନ୍ତ୍ରୀ କହିଛନ୍ତି, 'ସବସିଡିଯୁକ୍ତ ଚାଉଳ କେଜି ପିଛା ୯ ଟଙ୍କା ୩୦ ପଇସାରେ ପ୍ରତି ପିଲା ପିଛା ୧୫ କେଜି ହିସାବରେ ଦିଆଯାଉଛି । ୨୦୨୪-୨୫ରେ ଛଅ ମାସ ପାଇଁ ଚାଉଳ ଯୋଗାଇ ଦେଇଛନ୍ତି ସରକାର ।'

କେବଳ ଚାଉଳ ନୁହେଁ ଅନୁଷ୍ଠାନକୁ କେନ୍ଦ୍ର ସରକାରଙ୍କ ଆଦିବାସୀ ମନ୍ତ୍ରଣାଳୟ ଅନୁଦାନ ଦେଇଛି । ମନ୍ତ୍ରୀ ଦେଇଥିବା ତଥ୍ୟ ଅନୁସାରେ, '୨୦୨୩-୨୪ରେ ୨୫ କୋଟି ୪୧ ଲକ୍ଷ ୮୩ ହଜାର ୯୪୩ ଟଙ୍କା ଦିଆଯାଇଛି । ୨୦୨୪-୨୫ରେ କେନ୍ଦ୍ର ସରକାର ୯ କୋଟି ୩୧ ଲକ୍ଷ ୬୧ ହଜାର ୪୫୦ ଟଙ୍କା ଅର୍ଥ ରାଶି ମଞ୍ଜୁର କରିଛନ୍ତି ।'