ମହାପ୍ରଭୁଙ୍କୁ ବି ଗରମ ହୁଏ... ଏ ମଣିଷ ଯେମିତି ଗରମରୁ ରକ୍ଷା ପାଇବା ପାଇଁ ଫ୍ୟାନ ଠୁ ଏସିର ବ୍ୟବସ୍ଥା କରୁଛି । ସେଇମିତି ଆମ ମହାପ୍ରଭୁ ମଧ୍ୟ ତାତିରୁ ତ୍ରାହି ପାଇବା ପାଇଁ ଉପାୟ ଆପଣାନ୍ତି । ବିଶାଳ ପୋଖରୀ , ନୀଳ ଜଳରାଶି, ପୂବେଇ ପବନ ଆଉ ଶାତଳ ସମୀରର କୋମଳ ସ୍ପର୍ଷ ପାଇବା ପାଇଁ ଭାଇ-ଭଉଣୀଙ୍କୁ ସାଙ୍ଗରେ ଧରି ନୌକା ବିହାର କରିବାକୁ ବାହାରି ପଡନ୍ତି ଆମ ଠାକୁରେ । ଆଉ ସେବାୟତମାନେ ମହାପ୍ରଭୁଙ୍କୁ ସତେଜ କରିବାରେ ଲାଗିପଡନ୍ତି । ସେଥିପାଇଁ ନୌକା ବିହାର କରନ୍ତି ମହାପ୍ରଭୁ । ଯାହାକୁ କୁହାଯାଏ ଚନ୍ଦନ ଯାତ୍ରା । ବୈଶାଖ ଶୁକ୍ଳ ତୃତୀୟା ବା ଅକ୍ଷୟ ତୃତୀୟା ଠାରୁ ଜ୍ୟେଷ୍ଠ ଶୁକ୍ଳ ଚତୁର୍ଦ୍ଦଶୀ ଅର୍ଥାତ୍ ସ୍ନାନପୂର୍ଣ୍ଣିମା ପୂର୍ବ ଦିନ ପର୍ଯ୍ୟନ୍ତ ମୋଟ ୪୨ ଦିନ ଧରି ଚନ୍ଦନ ଯାତ୍ରା ଅନୁଷ୍ଠିତ ହୋଇଥାଏ । ୨୧ ଦିନ ବ୍ୟାପୀ ବାହାର ଚନ୍ଦନ ଯାତ୍ରା ସରିବା ପରେ ପରବର୍ତ୍ତୀ ୨୧ ଦିନ ଜ୍ୟୋଷ୍ଠ ଶୁକ୍ଳ ଚତୁର୍ଦ୍ଦଶୀ ପର୍ଯ୍ୟନ୍ତ ଶ୍ରୀମନ୍ଦିରରେ ଭିତର ଚନ୍ଦନଯାତ୍ରା ରୂପେ ପାଳିତ ହୋଇଥାଏ ।

ମହାପ୍ରଭୁଙ୍କ ଚନ୍ଦନଲାଗି ଜନିତ ନୀତିକାନ୍ତିର ଅୟମାରମ୍ଭ ହୁଏ ଅକ୍ଷୟ ତୃତୀୟାର ଗୋଟିଏ ଦିନ ପୂର୍ବରୁ ଅର୍ଥାତ୍ ବୈଶାଖ ଶୁକ୍ଳ ଦ୍ଵିତୀୟା ତିଥିରେ । ଏହି ତିଥିରେ ତିନିବାଡରେ ସନ୍ଧ୍ୟା ଧୂପ ପୂଜା ବଢିବା ପରେ ବିଧି ମୁତାବକ ପ୍ରତିଦିନ ପରି ରାତ୍ର ଚନ୍ଦନଲାଗି ହେବା ପରେ ଭୋଗମଣ୍ଡପ ଘର ଧୋ ପଖାଳ ହୋଇ ସୁନ୍ଦର ଚାନ୍ଦୁଆ ବନ୍ଧା ଯାଇଥାଏ । ତା’ ପରେ ପାଳିଆ ମେକାପ ସେବାୟତ ତିନୋଟି ରୂପା ପିଙ୍ଗଣ ଓ ପରଖରେ କର୍ପୁର ମିଶା ସୁବାସିତ ଚନ୍ଦନ ରଖି ସେଠାକୁ ଯାଇଥାନ୍ତି । ଏହି ଚନ୍ଦନ ରାଘବଦାସ ମଠ ଓ ଶ୍ରୀମନ୍ଦିର ପ୍ରଶାସନ ପକ୍ଷରୁ ଯୋଗାଇ ଦିଆଯାଏ । କାଠର ଭଦ୍ରାସନ ଉପରେ ଚନ୍ଦନ ପିଙ୍ଗଣ ଗୁଡିକ ରଖାଯାଏ । ତା' ପରେ ଜନୈକ ପୂଜାପଣ୍ଡା ସାମନ୍ତ ଆସି ସେହି ଚନ୍ଦନକୁ ଚେମେଡୀ , ପତନୀ ଓ ଫୁଲଚନ୍ଦନ ଦେଇ ସଂସ୍କାର କରାଇ ଅଧିବାସ କରନ୍ତି । ତା ପରେ ତଢ଼ଉକରଣ ସେବାୟତ ଆସି ଚତୁର୍ଦ୍ଦିଗକୁ ଉନ୍ମୁକ୍ତ ଥିବା ଭୋଗମଣ୍ଡପର ସମସ୍ତ ଦ୍ୱାରକୁ ବନ୍ଦ କରି ମୁଦ ଦିଅନ୍ତି । ଏପଟେ ରତ୍ନସିଂହାସନରେ ଚାଲୁ ରହିଥିବା ମହାପ୍ରଭୁଙ୍କ ଦୈନନ୍ଦିନ ନୀତିକାନ୍ତି ବଢ଼ି ରାତ୍ର ପହୁଡ଼ ହୁଏ।

ପରବର୍ତ୍ତୀ ନୀତିକାନ୍ତି ବିଷୟରେ ଜାଣିବା ଆଗାମୀ ଅଧ୍ୟାୟରେ...

Argus News | argus news | Odisha Latest News, Breaking News, Trending News, Live TV