ନବଦିନାତ୍ମକ ଯାତ୍ରା ସାରି ମନ୍ଦିରକୁ ବାହୁଡିଲେ ଚତୁର୍ଦ୍ଧା ମୁରତି । ଦ୍ବିତୀୟ ଶ୍ରୀକ୍ଷେତ୍ର ଭାବେ ପରିିଚିତ ବାରିପଦାର ସୋମବାର ଶେଷ ହୋଇଛି ବାହୁଡା ରଥଟଣା। ହଜାର ହଜାର ଭକ୍ତଙ୍କ ଗହଣରେ ଘଣ୍ଟଘଣ୍ଟା, ମୃଦଙ୍ଗ, ଝାଞ୍ଜ ବାଦ୍ୟସହ ହରିବୋଲ ଧ୍ବନିରେ ପ୍ରକମ୍ପିତ ହୋଇଥିଲା ରଥଦାଣ୍ଡ। ମହିଳାଭକ୍ତଙ୍କ ଶଙ୍ଖନାଦ ଓ ହୁଳହୁଳି ଶବ୍ଦରେ ସୃଷ୍ଟି ହୋଇଥିଲା ଭକ୍ତିମୟ ପରିବେଶ । ଝିପିଝିପି ବର୍ଷାରେ ଭିଜି ତିନି ରଥ ଟାଣି ନେଇଥିଲେ ଭକ୍ତ ଗଣ। ରବିବାର ମହାପ୍ରଭୁଙ୍କ ନନ୍ଦିଘୋଷ ରଥ ମନ୍ଦିର ସମ୍ମୁଖରେ ପହଞ୍ଚି ସାରିଥିବା ବେଳେ ଅଧାରେ ଅଟକି ଥିବା ମା ସୂଭଦ୍ରାଙ୍କ ଦର୍ପଦଳନ ରଥକୁ ଆଜି ମହିଳା ଭକ୍ତମାନେ ଟାଣି ଆଣିଥିଲେ । ପରେ ପରେ ପ୍ରଭୁ ବଳଭଦ୍ରଙ୍କ ତାଳଧ୍ୱଜ ରଥକୁ ଟାଣିବାର ଆନନ୍ଦ ନେଇଥିଲେ ଶ୍ରଦ୍ଧାଳୁ । 

ବାରିପଦାରେ ବାହୁଡା ଯାତ୍ରା କେବଳ ଏକ ଧାର୍ମିକ ଉତ୍ସବ ନୁହେଁ । ଜଗନ୍ନାଥ ସଂସ୍କୃତିକୁ ଭଲ ପାଉଥିବା ହଜାର ହଜାର ଭକ୍ତଙ୍କ ପାଇଁ ଆସ୍ଥା ଅଭିବ୍ୟକ୍ତିର ମାଧ୍ୟମ । ବାରିପଦା ରଥଯାତ୍ରାର ବିଶେଷତ୍ବ ହେଉଛି କେବଳ ମହିଳାମାନେ ମା ସୁଭଦ୍ରାଙ୍କ ଦର୍ପଦଳନ ରଥକୁ ଟାଣିଥାନ୍ତି। ୫୦ ବର୍ଷ ଧରି ଚାଲିଆସୁଛି ଏହି ପରମ୍ପରା । ଏଠାରେ ପୁରୀ ରଥଯାତ୍ରାର ଦିନକ ପରେ ଆରମ୍ଭ ହୋଇଥାଏ ରଥଟଣା ଯାହା ଦୁଇଦିନ ଧରି ଚାଲିଥାଏ। ସେହିପରି ଏଠାରେ ରଥଯାତ୍ରାରେ ବଳଭଦ୍ରଙ୍କ ତାଳଧ୍ଵଜ ରଥ ପ୍ରଥମେ ଟଣାଯାଉଥିବା ବେଳେ ବାହୁଡା ଯାତ୍ରାରେ ମହାପ୍ରଭୁ ଶ୍ରୀଜଗନ୍ନାଥଙ୍କ ନନ୍ଦିଘୋଷ ରଥ ପ୍ରଥମେ ଟଣା ହୁଏ ।

ବାରିପଦାର ଏହି ସାମୁହିକ ଯାତ୍ରାକୁ ଶାନ୍ତି ଶୃଙ୍ଖଳାର ସହ ସମାପନ ପାଇଁ ପୋଲିସ ଓ ପ୍ରଶାସନ ପକ୍ଷରୁ ବି କରାଯାଇଥିଲା ସମସ୍ତ ବ୍ୟବସ୍ଥା। ଏବର୍ଷ ମହା ଉତ୍ସାହର ସହ ବାରିପଦା ରଥଯାତ୍ରା ସମାପନ ହୋଇଥିବା ବେଳେ ପୁଣି ରଥାଋଢ ଚତୁର୍ଦ୍ଧାମୂରତ୍ତିଙ୍କ ଦର୍ଶନପାଇଁ ଅପେକ୍ଷା କରିବାକୁ ପଡ଼ିବ ଆସନ୍ତା ବର୍ଷକୁ।