ନବରଙ୍ଗପୁର: ମହାନଦୀ ଜଳ ବିବାଦ ଏବଂ ପୋଲାଭରମ ଜଳ ବିବାଦ ଲାଗି ରହିଥିବାବେଳେ ଏବେ ସାମ୍ନାକୁ ଆସିଲା ନବରଙ୍ଗପୁର ଜିଲ୍ଲା ଚନ୍ଦାହାଣ୍ଡି ବ୍ଲକ୍ ରେ ତେଲ ନଦୀ ଓ ବରେହି ଡ୍ୟାମ୍ । ଏ ବିବାଦ ଆଜିର ନୁହେଁ ଦୀର୍ଘ ଦେଢ଼ ଦଶନ୍ଧି ଧରି ଲାଗିରହିଥିବା ବିବାଦରେ ଆଜି ମଧ୍ୟ ପୂର୍ଣ୍ଣଛେଦ ପଡ଼ିପାରିନି । ସର୍ବଦା ଏଠାରେ ଚାଷୀମାନେ ଜଳସେଚନ ପ୍ରକଳ୍ପ ନିର୍ମାଣ ପାଇଁ ଦାବି ରଖିଥାନ୍ତି । ସେଗୁଡିକ ମଧ୍ୟରେ ରହିଛି ତେଲ୍ ନଦୀ ଜଳସେଚନ ପ୍ରକଳ୍ପ, ବରେହି ନଦୀ ଜଳସେଚନ ପ୍ରକଳ୍ପ ଏବଂ ଅନ୍ୟସବୁ ପ୍ରସ୍ତାବିତ ଜଳସେଚନ ପ୍ରକଳ୍ପ। ପ୍ରମୁଖ ଦୁଇଟି ଜଳସେଚନ ପ୍ରକଳ୍ପକୁ ନିର୍ମାଣ ପାଇଁ ଦୀର୍ଘ 3 ଦଶନ୍ଧି ଧରି ଦାବି ହେଉଥିବାବେଳେ ଆଜି ପର୍ଯ୍ୟନ୍ତ ଏହାର କୌଣସି ନାଆଁ ଗନ୍ଧ ନାହିଁ । ନିର୍ବାଚନ ଆସିଲେ ଏସବୁ ପ୍ରକଳ୍ପ ଗୁଡ଼ିକର ନିର୍ମାଣ ନାଆଁରେ ନେତା ଭୋଟ ନେଉଥିବାବେଳେ ଚାଷୀ ମାନେ କେବଳ ଜଳକା ହୋଇ ରହିଥାନ୍ତି । 

ସେତେବେଳର ଶିଳ୍ପ ରାଷ୍ଟ୍ର ମନ୍ତ୍ରୀ ସ୍ବର୍ଗତ ଯାଦବ ମାଝି ବରେହି ନଦୀର କୋମଟିଖ ଘାଟରେ ଡ୍ୟାମ୍ ନିର୍ମାଣ କରିବା ପାଇଁ ଶୁଭ ଦେଇଥିଲେ । ବର୍ତ୍ତମାନ ତାଙ୍କ ପୁଅ ନବରଙ୍ଗପୁର ସାଂସଦ ରମେଶ ମାଝୀ ଓ ପ୍ରକାଶ ମାଝୀ ଅନେକ ଥର ସେହି ସ୍ଥାନରେ ନଡ଼ିଆ ଭାଙ୍ଗି ଶୁଭ ଦେଇଛନ୍ତି । କିନ୍ତୁ ଡ୍ୟାମ୍ ନିର୍ମାଣ ଦିଗରେ କୌଣସି କାର୍ଯ୍ୟ ଆଗୋଉ ନାହିଁ । ଗତ ଦୁଇ ମାସ ତଳେ 5t ଅଧ୍ୟକ୍ଷ ଭି କେ ପାଣ୍ଡିଆନ୍ ସେହି ସ୍ଥାନରେ ଆସି ଲୋକଙ୍କୁ ପ୍ରତିଶୃତି ଦେଇକି ଗଲେ କିନ୍ତୁ ତାହା ବି ହେଲାନି ।

ବରେହି ନଦି ଚନ୍ଦାହାଣ୍ଡି ବ୍ଲକ୍ ର କୁହୁଡି ଜଙ୍ଗଲରୁ ଉତ୍ପନ୍ନ ହୋଇ ଛତିଶଗଡକୁ କେତେକ ସ୍ଥାନରେ ସ୍ପର୍ଶ୍ୱ କରିଛି । କିନ୍ତୁ ଓଡ଼ିଶା ସୀମାରେ ଓଡ଼ିଶା ଜମି ଉପରେ ଛତିଶଗଡ ଡ୍ୟାମ୍ ନିର୍ମାଣ କରିଛି । ତଥାପି ଓଡ଼ିଶା ସରକାର କୌଣସି କାର୍ଯ୍ୟାନୁଷ୍ଠାନ ନେଲେ ନାହିଁ। ଫଳରେ ଏଠାକାର ଅନେକ ଚାଷୀ କ୍ଷତିଗ୍ରସ୍ତ ହେଉଛନ୍ତି ।

ଦୀର୍ଘ ଦିନରୁ ଅଞ୍ଚଳବାସୀଙ୍କ ତରଫରୁ ବରେହି ନଦୀ ଉପରେ ଜଳସେଚନ ପ୍ରକଳ୍ପ ନିର୍ମାଣ କରିବାକୁ ଦାବି ହୋଇ ଆସୁଥିଲେ ମଧ୍ୟ ଓଡ଼ିଶା ସରକାର୍ ଓ ସ୍ଥାନୀୟ ଜନପ୍ରତିନିଧିମାନଙ୍କର ବିମୁଖତା ଏବଂ ଚାଷୀମାନଙ୍କ ପ୍ରତି ନିଘା ନଥିବାରୁ ଏଭଳି ଓଡ଼ିଶା ପାଣିକୁ ବାରମ୍ୱାର ଛତିଶଗଡ଼ ସରକାର ପ୍ରକଳ୍ପ ନିର୍ମାଣ କରି ପାଣିକୁ ଶୋଷି ନେଉଥିବା ଦେଖିବାକୁ ମିଳୁଛି ।