ଚିଲିକାକୁ ମାଡ଼ି ବସିଛି ଦଳ । କଳା ପଡ଼ିଗଲାଣି ନୀଳ ଜଳ । ବାହାରୁଛି ଦୁର୍ଗନ୍ଧ, ନଷ୍ଟ ହେଉଛି ଜୈବ ବିବିଧତା । ରୋଜଗାର ହରାଇ ହାତ ବାନ୍ଧି ବସିଛନ୍ତି କଣାସ ଓ ବ୍ରହ୍ମଗିରି ବ୍ଲକର ହଜାର ହଜାର ମତ୍ସ୍ୟଜୀବୀ । ବିଦେଶୀ ପକ୍ଷୀଙ୍କ ଉପରେ ବି ପଡୁଛି ଖରାପ ପ୍ରଭାବ ।

ଯେଉଁଆଡ଼େ ଦେଖିଲେ ଖାଲି ଦଳ ହିଁ ଦଳ । ବିପଦରେ ଚିଲିକା । ରାଜ ଦଳ ସାଜିଛି କାଳ । କିପରି ନୀଳାମ୍ବୁ ଚିଲିକାକୁ ପୋତି ପକାଇଲାଣି ଏହି ଦଳ । ଏଥିପାଇଁ ଦାୟୀ କିଏ ? ପୁରୀ ଜିଲ୍ଲା ଚନ୍ଦନପୁର ନିକଟ ଜମୁନାକୁଦାଠୁ ଘଟକୁଡି ପର୍ଯ୍ୟନ୍ତ ରତନ୍ନଚିରା ଏବଂ ଘଟକୁଡିଠୁ ଗୋବର୍ଦ୍ଧନପୁର ବ୍ୟାରେଜ୍ ଭାର୍ଗବୀ ନଦୀରୁ ଦଳ ସଫା କରିବାକୁ ଜଳସମ୍ପଦ ବିଭାଗର ଜଳନିକାସ ବିଭାଜନ ଟେଣ୍ଡର କରିଛି । ଏଥିପାଇଁ ୬୯ ଲକ୍ଷରୁ ଅଧିକ ଟଙ୍କା ବ୍ୟୟ ଅଟକଳ ହୋଇଛି । ହେଲେ ଯେଉଁଭଳି ଚାଲିଛି ଦଳ ସଫା, ତାହା ନ କହିବା ଭଲ ।

ଦୁର୍ଗନ୍ଧରେ ନାକ ଫାଟି ପଡୁଛି । ଧିରେ ଧିରେ ଦଳ ପଚି ପାଣିକୁ କଳା ପକାଇବା ସହ ନଦୀ ଓ ଚିଲିକା ମୁହଁକୁ ପୋତି ପକାଇଲାଣି । ଫଳରେ ରୋଜଗାର ହରାଇ ହାତ ବାନ୍ଧି ବସିଛନ୍ତି କଣାସ ଏବଂ ବ୍ରହ୍ମଗିରି ବ୍ଲକର ହଜାର ହଜାର ମତ୍ସ୍ୟଜୀବୀ । ଏବେ ଶୀତ ଋତୁରେ ପୂର୍ବ-ଉତ୍ତର ଚିଲିକାର ଜଳ କଳା ପଡ଼ିଥିବାରୁ ପକ୍ଷୀଙ୍କ ଉପରେ ମଧ୍ୟ ଏହାର କୁପ୍ରଭାବ ପଡୁଥିବା ପରିବେଶବିତ୍ କହିଛନ୍ତି ।

ସେପଟେ ପୁରୀ ଜଳସମ୍ପଦ ବିଭାଗ ଅଧିକାରୀଙ୍କ ପତିକ୍ରିୟା ମିଳିପାରିନାହିଁ । ବ୍ରହ୍ମଗିରି ବିଧାୟିକା କହିଛନ୍ତି, ଏହା ଚିନ୍ତାଜନକ, ସମ୍ପୃକ୍ତ ବିଭାଗ ଏବଂ ବିଭାଗୀୟ ମନ୍ତ୍ରୀଙ୍କ ସହ ଆଲୋଚନ କରାଯାଇ ସମାଧାନ କରାଯିବ । ଚିଲିକାକୁ ସଂଯୋଗ ହୋଇଥିବା ୫୨ ଗୋଟି ନଦୀ ନାଳର ଦଳ ଏବଂ ପଟୁ ମାଟି ବନ୍ୟା ସମୟରେ ଚିଲିକାକୁ ପୋତି ପକାଉଥିବା ବେଳେ ଏବେ ଜଳ ସମ୍ପଦ ବିଭାଗର ଅଜବ ନିସ୍ପତ୍ତି ଲାଗି ସଙ୍କଟରେ ଚିଲିକା ।