ଆଗକୁ ଆସୁଛି ଭାଇ ଭଉଣୀଙ୍କ ଅନାବିଳ ସ୍ନେହ ସମ୍ପର୍କର ପର୍ବ ରାକ୍ଷୀପୂର୍ଣ୍ଣିମା । ଏହାକୁ ଦୃଷ୍ଟିରେ ରଖି ଚାଲିଛି ପ୍ରସ୍ତୁତି । କେଉଁଠି ରାକ୍ଷୀ ତିଆରିରେ କାରିଗର ବ୍ୟସ୍ତ ତ କେଉଁଠି ଖୋଲିଥିବା ରାକ୍ଷୀ ଦୋକାନ ଆଗରେ ଲୋକଙ୍କ ଗହଳ । ରାକ୍ଷୀ ପୂର୍ଣ୍ଣିମା ଆସିଲେ ବଜାରକୁ ଆସିଥାଏ ଭଳିକି ଭଳି ରଙ୍ଗ ,ଆକାର ଓ ଡିଜାଇନର ରାକ୍ଷୀ । ପ୍ରତିବର୍ଷ ନୂଆ ନୂଆ ଡିଜାଇନର ରାକ୍ଷୀ ବଜାରକୁ ଆସୁଥିବା ବେଳେ ଚଳିତ ବର୍ଷ ଟ୍ରେଣ୍ଡରେ ରହିଛି ଚକୋଲେଟ ରାକ୍ଷୀ । ବିଭିନ୍ନ ଫ୍ଲେଭରର ଚକୋଲେଟ ରାକ୍ଷୀ ବଜାରକୁ ଆସିଛି । ଦିନେ ବ୍ୟବହାର ପରେ ଫିଙ୍ଗି ଦିଆଯାଉଥିବା ରାକ୍ଷୀ ଏବେ ଏହାର ସ୍ୱତନ୍ତ୍ରତା ପାଇଁ ସାଇତା ରଖାଯିବା ସହିତ କରାଯାଉଛି ବ୍ୟବହାର ।

ସେହି ଦୃଷ୍ଟିରୁ ବଢିଛି ଚକୋଲେଟ ରାକ୍ଷୀ ପାଇଁ ଚାହିଦା । ଏହି ରାକ୍ଷୀରେ ବ୍ୟବହୃତ ହୋଇଥିବା ଚକଲେଟର ସ୍ୱାଦ ମଧ୍ୟ ସ୍ୱତନ୍ତ୍ର । କାହାର ସ୍ୱାଦ ପାନର ସ୍ୱାଦ ଦେଉଥିବା ବେଳେ ଆଉ କାହାର ସ୍ୱାଦ ଷ୍ଟ୍ରବେରି ଭଳି । ଗୋଲାପ,ମ୍ୟାଙ୍ଗୋ, ଡ୍ରାଏଫ୍ରୁଟ ,ନଡ଼ିଆ, ଓ ଭାନିଲା ଭଳି ଫ୍ଲେବରର ଫୁଲ ରାକ୍ଷୀ ମିଳୁଛି । ଏହାର ଦାମ ରହିଛି ୫୦ ଟଙ୍କାରୁ ନେଇ ଦେଢ଼ଶହ ଟଙ୍କା ଯାଏଁ । ଉଭୟ ଅନଲାଇନ ଓ ଅଫ ଲାଇନରେ ମିଳୁଛି ଏହି ରାକ୍ଷୀ । ଛୋଟ ପିଲାଙ୍କୁ ଏହି ରାକ୍ଷୀ ବେଶ ଆକୃଷ୍ଟ କରିବ ବୋଲି କହିଛନ୍ତି ଏହାର ରୂପ ବିନ୍ୟାସ କରିଥିବା ପ୍ରିୟଦର୍ଶିନୀ ଦାସ । ରାକ୍ଷୀ ସାଙ୍ଗରେ ଆପଣଙ୍କୁ ଆଉ କିଣିବାକୁ ପଡିବ ନାହିଁ ଅଲଗା ମିଠା । ରାକ୍ଷୀ ସହିତ ହାତକୁ ଆସିବ ସ୍ୱାଦିଷ୍ଠ ଚକୋଲେଟ ।

ଭଉଣୀ ହାତରୁ ରାକ୍ଷୀ ସହିତ ମିଳୁଥିବା ଚକୋଲେଟ ଭାଇ ଭଉଣୀର ପବିତ୍ର ସମ୍ପର୍କରେ ଭରିବ ମିଠା । କେବଳ ମିଠା ନୁହଁ ପରିବେଶ ପାଇଁ ବେଶ ଅନୁକୂଳ ରାକ୍ଷୀ ମଧ୍ୟ ତିଆରି କରୁଛନ୍ତି ପ୍ରିୟଦର୍ଶନୀ । ସହଜରେ ଜୈବ ବିଘଟନ ହୋଇପାରୁଥିବା ବିଭିନ୍ନ ପ୍ରକାର ମଞ୍ଜି ,ତୁଳସୀ କାଠି , କାଇଁଚ ,ବେଲ କାଠି ଓ ରୁଦ୍ରାକ୍ଷକୁ ବ୍ୟବହାର କରି ତିଆରି ହୋଇଛି ସୁନ୍ଦର ଓ ଆକର୍ଷଣୀୟ ରାକ୍ଷୀ । ଭାରତୀୟ ପର୍ବପର୍ବାଣିର ମହତ୍ୱ ପ୍ରତିପାଦିତ କରିବା ସହିତ ଏସବୁ ରାକ୍ଷୀ ଉଚିତ ମୂଲ୍ୟ ଓ ଉଚ୍ଚ ଗୁଣମାନ ବିଶିଷ୍ଟ ବୋଲି କହିଛନ୍ତି ଗ୍ରାହକ । ପବିତ୍ର ସମ୍ପର୍କ ଓ ପରିବେଶ ସୁରକ୍ଷାର ବାର୍ତ୍ତା ବହନ କରୁଥିବା ଏହି ନିଆରା ରାକ୍ଷୀ ସୃଜନଶୀଳ ଶିଳ୍ପୀଙ୍କ ପାଇଁ ରୋଜଗାରର ମଧ୍ୟ ମାଧ୍ୟମ ପାଲଟିଛି।