'ଚାଉଳ ଚୋରା ଚାଲାଣ ଗାଡ଼ିକୁ ଛାଡ଼ି ଦେଉଛନ୍ତି କଲେକ୍ଟର'

ଗଜପତିରୁ ବାହାର ରାଜ୍ୟକୁ ଲମ୍ବିଛି ରାସନ ଚାଉଳ ଚୋରା ଚାଲାଣର ନେଟୱର୍କ । ଆଦିବାସୀ ଅଧ୍ୟୁଷିତ ଜିଲ୍ଲାରୁ ରୀତିମତ ଚୋରାଚାଲାଣ ହେଉଛି ପିଡିଏସ୍ ଚାଉଳ । ଜିଲ୍ଲା ପ୍ରଶାସନ ବିରୋଧରେ ବିଜେପି ଜିଲ୍ଲା ସଭାପତି ଆଣିଛନ୍ତି ସାଂଘାତିକ ଅଭିଯୋଗ । ଦୁର୍ନୀତିଖୋର ବିଜେଡି ନେତାଙ୍କ ନିର୍ଦ୍ଦେଶରେ କାମ କରୁଛନ୍ତି ପ୍ରଶାସନିକ ଅଧିକାରୀ । ଚୋରା ଚାଉଳ ଗାଡ଼ି ଛାଡ଼ିବାକୁ ଜିଲ୍ଲାପାଳ ଦେଉଛନ୍ତି ନିର୍ଦ୍ଦେଶ ।

ଗତ ୯ ତାରିଖରେ କିଛି ଦଲାଲ ପିଡିଏସ୍ ଚାଉଳ ନେଇ ଅନ୍ୟ ରାଜ୍ୟକୁ ଚାଲାଣ କରୁଥିବାବେଳେ ଟ୍ରକ୍ ଅଟକାଇ ଯୋଗାଣ ବିଭାଗକୁ ସୂଚନା ଦେଇଥିଲେ ସ୍ଥାନୀୟ ଲୋକେ। ଯୋଗାଣ ଅଧିକାରୀ ଓ ପାରଳାଖେମୁଣ୍ଡି ପୋଲିସ ପହଞ୍ଚି ଗାଡ଼ିକୁ ପାରଳାଖେମୁଣ୍ଡି ଥାନାରେ ଅଟକ ରଖିଥିଲେ ।

ତେବେ ଏ ମାମଲାରେ ଏକ ସାଂଘାତିକ ଅଭିଯୋଗ ଆଣିଛନ୍ତି ଜିଲ୍ଲା ବିଜେପି ସଭାପତି ତଥା ପାରଳାଖେମୁଣ୍ଡିର ପୂର୍ବତନ ବିଧାୟକ କେ ନାରାୟଣ ରାଓ । ଜିଲ୍ଲାପାଳଙ୍କ ଆଦେଶ କ୍ରମେ ଉପ ଜିଲ୍ଲାପାଳ ଚାଉଳ ଟ୍ରକ୍ ଛାଡ଼ିବାକୁ କୁଆଡ଼େ ନିର୍ଦେଶ ଦେଇଛନ୍ତି । ବିଜେଡି ନେତାଙ୍କ ଚାପରେ ଜିଲ୍ଲାପାଳ ଏମିତି କରୁଥିବା ଅଭିଯୋଗ ଆଣିଛନ୍ତି କେ ନାରାୟଣ ରାଓ ।

ପୂର୍ବରୁ କାଶୀନଗର ବ୍ଳକର ଜଣେ ଚାଉଳ ଡିଲର ଚୋରାଚାଲାଣ ଅଭିଯୋଗରେ ଧରାପଡ଼ିବା ପରେ ନିଲମ୍ବିତ ହୋଇଥିଲେ । କିନ୍ତୁ ତାଙ୍କୁ ପୁଣି କାମ କରିବାକୁ ଅନୁମତି ଦେଇଛନ୍ତି ଜିଲ୍ଲାପାଳ, ଯାହାକୁ ନେଇ ସୃଷ୍ଟି ହୋଇଛି ବିବାଦ । ବର୍ଷ ବର୍ଷ ଧରି ଗଜପତି ଜିଲ୍ଲାରେ ଚାଲିଛି ଏମିତି କାରବାର। ବିଜେଡି ଶାସନରେ ଏହି ରାକେଟ୍ ପଛରେ ଥିଲେ ଶଙ୍ଖ ଦଳର ନେତା । ଅଭିଯୋଗ ହେଉଛି ଏବେ ବି ବିଜେଡି ନେତାଙ୍କ ନିର୍ଦ୍ଦେଶରେ କାମ କରୁଛନ୍ତି ପ୍ରଶାସନିକ ଅଧିକାରୀ। କୃଷକ ସଂଘ ସଭାପତି କହିଛନ୍ତି ପିଡିଏସ ଚାଉଳ ଯୋଗୁଁ ହିଁ ମିଲରମାନେ ଧାନ କିଣାରେ କରୁଛନ୍ତି ମନମାନି ।

ଗୋଟିଏ ପଟେ ଲକ୍ଷ ଲକ୍ଷ ଅଯୋଗ୍ୟ ଓ ଭୂତ ରାସନକାର୍ଡ ହିତାଧିକାରୀ। ଅନ୍ୟପଟେ ଚାଉଳ ଚୋରାଚାଲାଣ। ଏ ସବୁର ତଦନ୍ତ କରି କାର୍ଯ୍ୟାନୁଷ୍ଠାନ ନେବାକୁ ଦାବି କରିଛନ୍ତି ଅଞ୍ଚଳବାସୀ।