ଅର୍ଗସ ବ୍ୟୁରୋ: ବିରୋଧୀ ଦଳର ଜଣେ ସାଧାରଣ ନେତ୍ରୀ। ସାଧାରଣ ମଧ୍ୟବିତ୍ତ ପରିବାରର ପୃଷ୍ଠଭୂମି । କିନ୍ତୁ ସେ ବର୍ଷ କେଇଟା ଭିତରେ ପାଲଟିଗଲେ 110 କୋଟିର ମାଲିକାଣୀ। ଜାଗୁଆର, ମର୍ସିଡିସ୍, ପୋର୍ସେ ଭଳି କମ୍ପାନୀର 5ଟି ଦାମୀ କାର। ଚକାଚକ୍ ଲାଇଫ୍ ଷ୍ଟାଇଲ୍। ତୃତୀୟ ସ୍ବାମୀଙ୍କ ସହ ଅହରହ ବିଦେଶ ବୁଲା । ନେତା, ବ୍ୟବସାୟୀଙ୍କ ସହଯୋଗ ଓ ସମ୍ପର୍କରେ ଆସି କମାଇଛନ୍ତି କୋଟି କୋଟି ଟଙ୍କା । ଭିଜିଲାନ୍ସ ଓ ଇଡି ତଦନ୍ତରେ ଯେତେଯେତେ ଏ ହାଇପ୍ରୋଫାଇଲ୍ ଠକ ଦମ୍ପତିଙ୍କ କେଳେଙ୍କାରୀର ଖୁଲାସା ହେଉଛି, ସେତେ ସେତେ ସାମ୍ନାକୁ ଆସୁଛି ବିଜେଡିର ନେତା ଓ ପୂର୍ବତନ ମନ୍ତ୍ରୀଙ୍କ ସହ ଏମାନଙ୍କ ଲିଙ୍କ । ହଂସିତା ଲିଙ୍କରେ ଏବେ ବିବାଦ ଘେରକୁ ଆସିଛନ୍ତି ପୂର୍ବତନ ମନ୍ତ୍ରୀ ବିଜେଡିର ପାୱାରଫୁଲ୍ ନେତା ଦିବ୍ୟଶଙ୍କର ମିଶ୍ର । ହିଂସିତା ମାମଲାରେ ନାଁ ନ ନେଇ ଦିବ୍ୟଶଙ୍କରଙ୍କୁ ଜୋରଦାର ଟାର୍ଗେଟ୍ କରିଛନ୍ତି ବରଗଡ଼ ସାଂସଦ ପ୍ରଦୀପ ପୁରୋହିତ । ଅଭିଯୋଗ କରିଛନ୍ତି କଳାହାଣ୍ଡିର ଜଣେ ବିଧାୟକ ଶିଳ୍ପମନ୍ତ୍ରୀ ଥିବାବେଳେ ଆଇନ କାନୁନର ଉଲ୍ଲଂଘନ କରି ହଂସିତାଙ୍କୁ ଦିଆଯାଇଛି ବହୁ କାମ । ଯାହା ଫଳରେ ରାଜକୋଷରୁ ଲୁଟ୍ ହୋଇଛି ଶହ ଶହ କୋଟି ଟଙ୍କା

ଏପଟେ ଠକେଇ ଟଙ୍କାରେ ହିଂସିତା କିଣିଥିବା 5ଟି ଦାମୀ କାରର ତଥ୍ୟ ସାମ୍ନାକୁ ଆସିଛି । 2024 ମାର୍ଚ୍ଚ 22ରେ କିଣାଯାଇଛି OD 02CS 7777 ନମ୍ବରର ପୋର୍ସେ କାର୍। ଅନୀଲ ମହାନ୍ତିଙ୍କ କମ୍ପାନୀ 'ହାର୍ଦ୍ଦିକ୍ ଇନଫ୍ରା ପ୍ରାଇଭେଟ ଲିମିଟେଡ୍ ଆକାଉଣ୍ଟରୁ ନଗଦ 1 କୋଟି 97 ଲକ୍ଷ ଟଙ୍କା ଦେଇ ଏହି କାର କିଣା ହୋଇଛି । 20 ଜୁନ 2019ରେ ଅନୀଲ ମହାନ୍ତି କିଣିଥିଲେ OD 02BB 7777 ନମ୍ବରର ଜାଗୁଆର ଲ୍ୟାଣ୍ଡ ରୋଭର କାର୍ । ଯାହାର ଦାମ୍ 72ଲକ୍ଷ 46ହଜାର ଟଙ୍କା । ଅନୀଲ ଙ୍କ ନାଁରେ ରହିଛି ଆଉ ଏକ ଲ୍ୟାଣ୍ଡ ରୋଭର କାର । 27 ଜାନୁଆରୀ 2014ରେ କିଣାଯାଇଥିବା ଏହି କାରର ଦାମ 54ଲକ୍ଷ 91ହଜାର । ହଂସିତା ଙ୍କ ପ୍ରଥମ ସ୍ୱାମୀ ସରୋଜ ସାହୁଙ୍କ ନାଁରେ ରହିଛି 2ଟି BMW କାର ଗାଡି ନମ୍ବର OD 02CB 8808 ଓ OD 02KC 0008 ନମ୍ବର ବିଶିଷ୍ଟ ଏ ଦୁଇ କାର ଗୋଟିଏ ଦିନରେ 2023 ଜୁଲାଇ 31ରେ କିଣା ହୋଇଛି । ଗୋଟିଏ ଲେଖାଏଁ କାରର ଦାମ୍ 48ଲକ୍ଷ 90ହଜାର ଟଙ୍କା ।

ଅଭିଯୋଗ ହେଉଛି ବିଜେଡି ସରକାରର ଗେହ୍ଲା ଝିଅ ଥିଲେ ହଂସିତା । ଉଭୟ କର୍ପୋରେଟ୍ ଓ ରାଜନୀତି ଦୁନିଆରେ ତାଙ୍କର ଥିଲା ବେଶ୍ କାଟତି । ହଂସିତା ଓ ତାଙ୍କ ସ୍ବାମୀଙ୍କ ଠକ କାରନାମା ପଛରେ ଥିଲା କେଉଁ କେଉଁ ବିଜେଡି ନେତା ଓ ମନ୍ତ୍ରୀଙ୍କର ହାତ ତଦନ୍ତରେ ତାର ଖୁଲାସା ହେବ ବୋଲି ଆଶା କରାଯାଉଛି ।