ଶିକ୍ଷକଙ୍କ ପାଇଁ ବାଧ୍ୟତାମୂଳକ ଟିଇଟି ପରୀକ୍ଷା । ଆସିଲା ସୁପ୍ରିମକୋର୍ଟଙ୍କ ବଡ଼ ରାୟ । ସବୁ ପ୍ରାଥମିକ ଶିକ୍ଷକ ପରୀକ୍ଷାରେ ପାସ ନ କଲେ ହରେଇବେ ଚାକିରି । ନିଷ୍ପତ୍ତିକୁ ନାପସନ୍ଦ କଲେ ଓଡ଼ିଶାର ଶିକ୍ଷକ ।

ଆସନ୍ତା ୨ ବର୍ଷ ମଧ୍ୟରେ ସମସ୍ତ ଶିକ୍ଷକ ଏହି ପରୀକ୍ଷା ଦେବାକୁ ବାଧ୍ୟ । ପରୀକ୍ଷାରେ ପାସ ନ କଲେ ଚାକିରି ଯିବା ନିଶ୍ଚିତ । ଯେଉଁ ଶିକ୍ଷକଙ୍କ ଚାକିରୀ ଅବସର ନେବାର ମାତ୍ର ୫ ବର୍ଷ କିମ୍ବା 5 ବର୍ଷ କମ ଥିବ ସେମାନଙ୍କ ପାଇଁ ଏହି ପରୀକ୍ଷା ବାଧ୍ୟତାମୂଳକ ରହିବ ନାହିଁ । ସୁପ୍ରିମକୋର୍ଟଙ୍କ ଏଭଳି ରାୟ ପରେ ରାଜ୍ୟରେ ଟେନସନରେ ଶିକ୍ଷକ । ବିଭାଗୀୟ ମନ୍ତ୍ରୀ କହିଛନ୍ତି ଶିକ୍ଷକଙ୍କ ସ୍ୱାର୍ଥକୁ ଦିଆଯିବ ପ୍ରାଥମିକତା । ଅନ୍ୟ ରାଜ୍ୟ ଏ ନେଇ କଣ କରୁଛନ୍ତି ତାର ତର୍ଜମା ସହ ଶିକ୍ଷକ ସଂଗଠନ ସହ ଆଲୋଚନା କରି ସରକାର ନିଷ୍ପତ୍ତି ନେବେ ।

ତଥ୍ୟ ଅନୁଯାୟୀ ରାଜ୍ୟରେ ଏବେ ବିନା ଓଟିଇଟି ପରୀକ୍ଷା ପାସ୍ କରି ଶିକ୍ଷକ ଚାକିରୀରେ ରହିଛନ୍ତି ପାଖାପାଖି ୭୫ ହଜାରରୁ ୮୦ ହଜାର ଶିକ୍ଷକ । ୨୦୧୨ ପୂର୍ବରୁ ପ୍ରାଥମିକ ଶିକ୍ଷକ ଭାବେ କାର୍ଯ୍ୟରତ ଶିକ୍ଷକମାନଙ୍କ ପାଇଁ ଏଭଳି ଟିଚର ଏଲିଜିବିଲିଟି ପରୀକ୍ଷା ନଥିବାରୁ ଶିକ୍ଷକ ମାନେ ପରୀକ୍ଷା ଦେବାରୁ ବଞ୍ଚିତ ଥିଲେ । ମାତ୍ର କ୍ୟାଡର ରୁଲ୍ ଅନୁସାରେ ରାଜ୍ୟରେ ଶିକ୍ଷକମାନେ ନିଜ ଚାକିରୀର ପଦୋନ୍ନତି ଏବଂ ଦରମା ବୃଦ୍ଧି ପାଇଁ ଏହି ପରୀକ୍ଷା ଦେଇପାରିବାର ନିୟମ ଅଛି । କିନ୍ତୁ ପରୀକ୍ଷାରେ ଫେଲ୍ ହେଲେ ଚାକିରୀ ଯିବାର ଭୟ ନଥିଲା । ତେବେ ସୁପ୍ରିମକୋର୍ଟଙ୍କ ରାୟରେ ପରୀକ୍ଷାରେ ଫେଲ୍ ହେଲେ ଚାକିରୀ ଯିବା କଷ୍ଟଦାୟକ ବୋଲି କହିଛି ପ୍ରାଥମିକ ଶିକ୍ଷକ ସଂଘ । ସେପଟେ ସୁପ୍ରିମ କୋର୍ଟଙ୍କ ରାୟ ଶିକ୍ଷା ବ୍ୟବସ୍ଥାରେ ସଂସ୍କାର ଆଣିବ ବୋଲି କହିଛନ୍ତି ଶିକ୍ଷାବିତ।

ସ୍କୁଲରେ ଶିକ୍ଷକତା ପାଇଁ ଟିଇଟି ବାଧ୍ୟତାମୂଳକ କି ନୁହେଁ ସେ ନେଇ ତାମିଲନାଡୁ ଓ ମହାରାଷ୍ଟ୍ର ସରକାର ସୁପ୍ରିମକୋର୍ଟରେ ଦାଖଲ କରିଥିବା ଏକାଧିକ ଆବେଦନ ଉପରେ ଶୁଣାଣି କରି ସୁପ୍ରିମକୋର୍ଟ ଏହି ନିଷ୍ପତ୍ତି ନେଇଛନ୍ତି । ରାୟ ଆସିବା ପରେ ଛତିଶଗଡ ସରକାର ଏହା ବିରୋଧରେ ଅପିଲ କରିବାକୁ ସଜବାଜ ହେଉଛି । 75 ହଜାର ଶିକ୍ଷକଙ୍କ ସ୍ବାର୍ଥକୁ ଦେଖି ଓଡିଶା ସରକାର କି ନିଷ୍ପତ୍ତି ନେଉଛନ୍ତି ତା ଉପରେ ସମସ୍ତଙ୍କ ନଜର ।

Argus News | argus news | -Argusnews Home: Odisha Latest News, Breaking News, Trending News, Live TV and more