ଚାଲି ପାରିଲାନି ପ୍ରଶ୍ନକାଳ । ହୋଇପାରିଲାନି ଶୂନ୍ୟକାଳ ଆଲୋଚନା । ଗୃହ ଆରମ୍ଭରୁ ହୁଇସିଲ ବଜାଇ ହଟ୍ଟଗୋଳ କଲେ କଂଗ୍ରେସ ବିଧାୟକ । ପୂର୍ବତନ ବିଧାୟକ ସ୍ଵର୍ଗତ ଦେବରାଜ ସେଠଙ୍କ ବିୟୋଗରେ ଆଗତ ଶୋକ ପ୍ରସ୍ତାବ ପରେ ଗୃହ ମଧ୍ୟ ଭାଗକୁ ଆସି ହଟ୍ଟଗୋଳ ଆରମ୍ଭ କରିଦେଇଥିଲା କଂଗ୍ରେସ ବିଧାୟକ । ଆଜି ବି ମହିଳା ସୁରକ୍ଷା ପ୍ରସଙ୍ଗ ଉଠାଇ ବାଚସ୍ପତିଙ୍କ ପୋଡିୟମ ତଳେ କଂଗ୍ରେସ ପ୍ରତିବାଦ କରିଥିଲା । ଆଗରୁ କଳା ପଟି ବାନ୍ଧି, ହାତରେ ପ୍ଲା-କାର୍ଡ ଧରି ହୋହାଲ୍ଲା କରୁଥିଲେ । କିନ୍ତୁ ଆଜି ହୁଇସିଲ ଫୁଙ୍କି ଅଭିବନ ଢଙ୍ଗରେ ନାରାବାଜି କରିଥିଲେ କଂଗ୍ରେସ ବିଧାୟକ । ତେବେ ହଟ୍ଟଗୋଳ ଭିତରେ ମାତ୍ର କିଛି ସମୟ ଚାଲିପାରିଥିଲା ପ୍ରଶ୍ନକାଳ । ବାଚସ୍ପତିଙ୍କ ବାରମ୍ବାର ଅପିଲ୍ ସତ୍ତ୍ଵେ କଂଗ୍ରେସ ବିଧାୟକ ମାନେ ନିଜ ସିଟକୁ ଯାଇନଥିଲେ । ଫଳରେ ଗୃହକୁ ଦିନ ୧୨ଟା ଯାଏଁ ମୁଲତବୀ ଘୋଷଣା କରିଥିଲେ ବାଚସ୍ପତି । ତେବେ କଂଗ୍ରେସ ବିଧାୟକ ମାନେ ଏତିକିରେ ଅଟକି ନଥିଲେ । ଗୃହ ବାହାରକୁ ଆସି ଗାନ୍ଧୀ ମୂର୍ତ୍ତୀ ତଳେ ହୁଇସିଲ ବଜାଇ ପ୍ରତିବାଦ କରିଥିଲେ କଂଗ୍ରେସ ବିଧାୟକ । ପରେ ମୁଲତବୀ ଆଲୋଚନାରେ ବି ଅଂଶ ଗ୍ରହଣ କରିନଥିଲା କଂଗ୍ରେସ ।

ସେପଟେ କଂଗ୍ରେସର ହୁଇସିଲ ମାରି ପ୍ରତିବାଦକୁ ନେଇ କଡା ଜବାବ ରଖିଲା ବିଜେପି । କଂଗ୍ରେସ ଯେଉଁ ଭଳି ଢଙ୍ଗରେ ହୁଇସିଲ ମାରି ପ୍ରତିବାଦ କରୁଛି ତାହା ଅଶୋଭନୀୟ । ନାରୀ ନିର୍ଯାତନା ପ୍ରସଙ୍ଗରେ ମୁଲତବୀ ଆଲୋଚନା ହେବା ପରେ ଏ ପ୍ରସଙ୍ଗ ଉଠାଇବାରେ କୌଣସି ଆବଶ୍ୟକତା ନାହିଁ । ବାରମ୍ବାର ପ୍ରତିବାଦ ଯୋଗୁଁ ପ୍ରଶ୍ନକାଳ ଚାଲି ପାରୁନାହିଁ । ରାଜ୍ୟବାସୀଙ୍କ ସ୍ଵାର୍ଥ ବ୍ୟାହତ ହେଉଛି । ଦିଲ୍ଲୀରୁ ମାଆ ପୁଅଙ୍କ ନିର୍ଦ୍ଦେଶରେ କଂଗ୍ରେସ ଏଠି ପରିଚାଳିତ ହେଉଛି । ମୁଲତବୀ ଆଲୋଚନା ପରେ କଂଗ୍ରେସ ଯଦି ଅଧିକ କିଛି କହିବାକୁ ଚାହୁଁଛି, ତେବେ ଶୂନ୍ୟକାଳ ଓ ଅନ୍ୟ ସମୟରେ ଉଠାଇ ପାରିବେ । କିନ୍ତୁ ପ୍ରତିବାଦ କରି ଗୃହ ଚଲେଇ ନଦେବାକୁ ରାଜ୍ୟବାସୀ ଗ୍ରହଣ କରିବେନି ବୋଲି କହିଛି ବିଜେପି ।

ଦେଶରେ କଂଗ୍ରେସର ସ୍ଥିତି ବିପର୍ଯ୍ୟସ୍ତ । ଅସ୍ତିତ୍ଵ ବ଼ଞ୍ଚାଇବାକୁ ଆଞ୍ଚଳିକ ଦଳଙ୍କ ଭରସାରେ ଦେଶର ସର୍ବ ପୂରାତନ ଦଳ । ବିଭିନ୍ନ ସମୟରେ ଦେଶ ବିରୋଧୀ ମନ୍ତବ୍ୟ ଦେଇ ବିବାଦରେ ଛନ୍ଦି ହେଉଛନ୍ତି କଂଗ୍ରେସର ସର୍ବୋଚ୍ଚ ନେତା । ଓଡିଶା ବିଧାନସଭା ନିର୍ବାଚନରେ ବି କଂଗ୍ରେସ ବହୁ କଷ୍ଟରେ ଦୁଇ ଅଙ୍କ ଛୁଇଁଛି । ତେଣୁ ଭବିଷ୍ୟତରେ କଂଗ୍ରେସର ଅବସ୍ଥା କଣ ହେବ ତାହା ଉପରେ ରହିଛି ନଜର ।