ବର୍ଷ କେଇଟା ପରେ ପୁଣି ଭାରତକୁ ଡରାଇବାରେ ଲାଗିଛି କରୋନା ମହାମାରୀ। ଗତ 24 ଘଣ୍ଟା ଭିତରେ ଦେଶରେ 4 ଜଣ କରୋନା ସଂକ୍ରମିତଙ୍କର ମୃତ୍ୟୁ ହୋଇଛି। ଏଥିସହ ଦେଶରେ ୪ ହଜାର ଟପିଛି ଆକ୍ରାନ୍ତଙ୍କ ସଂଖ୍ୟା । ଦିଲ୍ଲୀରେ ୨୪ ଘଣ୍ଟାରେ ସର୍ବାଧିକ ୪୭ ନୂଆ ମାମଲା । ସମଗ୍ର ଦେଶରେ ୨୦୩ଟି ନୂଆ ମାମଲା ପଞ୍ଜୀକୃତ ହୋଇଛି । ସର୍ବାଧିକ ପ୍ରଭାବିତ ରାଜ୍ୟ କେରଳରେ ୧୪୩୫, ମହାରାଷ୍ଟ୍ରରେ ୫୦୬, ଦିଲ୍ଲୀରେ ୪୮୩, ପଶ୍ଚିମବଙ୍ଗରେ ୩୩୯ ଓ ଗୁଜରାଟରେ ୩୩୮ ସକ୍ରିୟ ମାମଲା ରହିଛି। ସେହିପରି ଆମ ରାଜ୍ୟରେ କରୋନା ସଂକ୍ରମିତଙ୍କ ସଂଖ୍ୟା 15ରେ ପହଞ୍ଚିଛି।

ଗଣମାଧ୍ୟମ ପ୍ରତିନିଧିଙ୍କ ସହ କଥା ହେବା ସମୟରେ ଜନସ୍ୱାସ୍ଥ୍ୟ ନିର୍ଦ୍ଦେଶକ କହିଛନ୍ତି ଯେ ରାଜ୍ୟରେ କୋଭିଡ ମାମଲା ସଂଖ୍ୟା ୧୨ ଥିଲା, କିନ୍ତୁ ସ୍ୱାସ୍ଥ୍ୟ ବିଭାଗକୁ ଗତ ରାତି ପର୍ଯ୍ୟନ୍ତ ମିଳିଥିବା ସୂଚନା ଅନୁସାରେ ଦୁଇରୁ ତିନୋଟି ନୂଆ ମାମଲା ଚିହ୍ନଟ ହୋଇଛି।

ଜନସ୍ୱାସ୍ଥ୍ୟ ନିର୍ଦ୍ଦେଶକ ଜନସାଧାରଣଙ୍କୁ ସଂକ୍ରମଣ ରୋକିବା ପାଇଁ ମାନକ ସତର୍କତା ଅବଲମ୍ବନ କରିବାକୁ ଅପିଲ କରିଛନ୍ତି, ଯାହା ଅଧୀନରେ ଭିଡ଼ ସ୍ଥାନକୁ ନ ଯିବା, ହାତ ବାରମ୍ବାର ଧୋଇବା ଏବଂ ମାସ୍କ ଓ ଗ୍ଲୋଭସ ପିନ୍ଧିବା ଅନ୍ତର୍ଭୁକ୍ତ।

ତେବେ, ନୀଳକଣ୍ଠ ମିଶ୍ର ଦୃଢ଼ତାର ସହ କହିଛନ୍ତି ଯେ ଅନ୍ୟ ରାଜ୍ୟଗୁଡ଼ିକ ତୁଳନାରେ ଓଡ଼ିଶାରେ ପରିସ୍ଥିତି ନିୟନ୍ତ୍ରଣାଧୀନ ଅଛି ଏବଂ ଜିଲ୍ଲାଗୁଡ଼ିକର ଆବଶ୍ୟକତା ଅନୁସାରେ କୋଭିଡ ଟେଷ୍ଟିଂ କିଟ୍ ଉପଲବ୍ଧ କରାଯାଇଛି।

ଯଦିଓ ଭାଇରସ ପରୀକ୍ଷଣ ପାଇଁ ଆରଟି-ପିସିଆର (ରିଭର୍ସ ଟ୍ରାନ୍ସକ୍ରିପସନ-ପଲିମରେଜ ଚେନ ରିଆକ୍ସନ) ପରୀକ୍ଷାର ସୁବିଧା ରହିଛି, ଗୁରୁତର ଶ୍ୱାସକ୍ରିୟା ରୋଗୀଙ୍କ ଅଧିକାଂଶ ନମୁନା କିଟ୍ ମାଧ୍ୟମରେ ପରୀକ୍ଷା କରାଯାଉଛି, ଯାହାର ଦାୟିତ୍ୱ ଜିଲ୍ଲା ମୁଖ୍ୟ ଚିକିତ୍ସା ଅଧିକାରୀ (ସିଡିଏମଓ)ମାନଙ୍କ ଉପରେ ରହିଛି। ନୀଳକଣ୍ଠ ମିଶ୍ର ଆହୁରି କହିଛନ୍ତି ଯେ ଓଡ଼ିଶା ପାଇଁ ପର୍ଯ୍ୟାପ୍ତ ସଂଖ୍ୟକ କୋଭିଡ ଟେଷ୍ଟିଂ କିଟ୍ ମିଳିସାରିଛି।