Argus News - ଆଜି ଦ୍ବିତୀୟ ପର୍ଯ୍ୟାୟର ଦ୍ବିତୀୟ ଦିନର ଗଣତି ମଣତି

ପୁରୀ,୦୯/୦୪: ରତ୍ନଭଣ୍ଡାର ଗଣତିମଣତିର ଦ୍ବିତୀୟ ପର୍ଯ୍ୟାୟର ଦ୍ବିତୀୟ ଦିନ । ଏଥିପାଇଁ ପ୍ରାଧିକୃତ ଅଧିକାରୀ ଓ ସେବାୟତ ଶ୍ରୀମନ୍ଦିର ଭିତରକୁ ଯିବା ପରେ ହେବ ଗଣତିମଣତି । ଶ୍ରୀମନ୍ଦିର ରତ୍ନଭଣ୍ଡାରରେ ଗଚ୍ଛିତ ଅଳଙ୍କାର ଓ ମୂଲ୍ୟବାନ ସାମଗ୍ରୀର ଗଣତି କାର୍ଯ୍ୟ ଜାରି ରହିବ । ଦ୍ବିତୀୟ ପର୍ଯ୍ୟାୟର ପ୍ରଥମ ଦିନର ଗଣତିମଣତି ପରେ ଗଜପତି ମହାରାଜ ଦିବ୍ୟସିଂହ ଦେବ କହିଛନ୍ତି ମହାପ୍ରଭୁଙ୍କ ଆଶୀର୍ବାଦରୁ ସବୁ କିଛି ଠିକ୍‌ଠାକ ଚାଲିଛି । ମହାପ୍ରଭୁଙ୍କ ଦର୍ଶନ ସରିଲା ପରେ ବାହାର ରତ୍ନଭଣ୍ଡାର ଅନୁଧ୍ୟାନ କରାଯାଇଥିଲା । ସରକାରଙ୍କ ଦ୍ବାରା ଗଠିତ କମିଟି, ଅଧିକାରୀ ଏବଂ ସେବାୟତ ଏଥିରେ ଉପସ୍ଥିତ ଥିଲେ । ଏସ୍‌ଓପି ଅନୁସାରେ ଗଣତିମଣତି ହୋଇଛି ।

ପ୍ରତ୍ୟେକ ମୂଲ୍ୟବାନ ଜିନିଷ ୩ଡି ମ୍ୟାପିଂ କରାଯାଉଛି । ଏହା ଦ୍ବାରା ପୂର୍ଣ୍ଣ ଛବି ମିଳିପାରିବ । ମହାପ୍ରଭୁଙ୍କ ଗହଣାର ବିସ୍ତୃତ ବିବରଣୀ ରଖାଯାଉଛି, ଯାହାଦ୍ବାରା ଭବିଷ୍ୟତରେ କୌଣସି ଅସୁବିଧା ହେବ ନାହିଁ । ବାହାର ରତ୍ନଭଣ୍ଡାର ଗଣତିମଣତି ପରେ ଭିତର ରତ୍ନଭଣ୍ଡାରର ଗଣତିମଣତି ହେବ । ଏହି ପ୍ରକ୍ରିୟା ଲଗାତାର ୪ ଦିନ ଧରି ଚାଲିବ । ୧୨ ତାରିଖ ରବିବାର ବନ୍ଦ ରହି ପୁଣି ଥରେ ୧୩ ତାରିଖରେ ହେବ । ୧୪ ଓ ୧୫ ଦୁଇଦିନ ବନ୍ଦ ରହିବା ପରେ ୧୬ରୁ ୧୮ ତାରିଖ ତିନିଦିନ ଲଗାତାର ଜାରି ରହିବ।

ରବିବାର ଭକ୍ତଙ୍କ ଭିଡ଼କୁ ଦୃଷ୍ଟିରେ ରଖି ଗଣତିମଣତି ବନ୍ଦ ରହିବ। ୧୩ ତାରିଖ ଓ ପରେ ୧୬ରୁ ୧୮ ତାରିଖରେ ମଧ୍ୟରେ ଜାରି ରହିବ ଗଣତିମଣତି। ପ୍ରଥମ ଦିନରେ ପ୍ରାୟ ସାଢ଼େ ୬ ଘଣ୍ଟା ବାହାର ରତ୍ନଭଣ୍ଡାର ଗଣତିମଣତି କରାଯାଇଛି। ହାଇଲେବଲ କମିଟି ଅଧ୍ୟକ୍ଷ ଜଷ୍ଟିସ୍ ବିଶ୍ଵନାଥ ରଥ, ମୁଖ୍ୟ ପ୍ରଶାସକ ଡ. ଅରବିନ୍ଦ ପାଢ଼ୀ, ଜିଲ୍ଲାପାଳ ଦିବ୍ୟଜ୍ୟୋତି ପରିଡ଼ାଙ୍କ ସମେତ ଅନ୍ୟ ପ୍ରାଧିକୃତ ଅଧିକାରୀ, ସେବକ ଓ କର୍ମଚାରୀ ଗଣତିମଣତିରେ ସାମିଲ ହୋଇଥିଲେ। ମାଜିଷ୍ଟ୍ରେଟଙ୍କ ଉପସ୍ଥିତିରେ ଦିନ ୧୧ଟା ୫୫ରେ ରତ୍ନଭଣ୍ଡାର ଖୋଲାଯାଇଥିଲା। ଅଳଙ୍କାର ଆଦିର ଫଟୋଗ୍ରାଫି, ଭିଡିଓଗ୍ରାଫି ସହ ଇ-କ୍ୟାଟଲଗ୍ କରାଯାଇଥିଲା।

ପଢନ୍ତୁ ଏହି ଖବର: ଆଜି ଶ୍ରୀମନ୍ଦିରରେ ମହାପ୍ରଭୁଙ୍କ ପଇତାଲାଗି ନୀତି; ୪ ଘଣ୍ଟା ଦର୍ଶନ ବନ୍ଦ

ମହାପ୍ରଭୁଙ୍କ ରତ୍ନ ଅଳଙ୍କାର ଗୁଡ଼ିକୁ ଗଣୁଛନ୍ତି ଟିମ୍। ଚିହ୍ନଟ ଓ ଓଜନ କରୁଛନ୍ତି ବଣିଆ ଓ ଜେମୋଲୋଜିଷ୍ଟ। ୧୯୭୮ ମସିହା ତାଲିକା ଅନୁଯାୟୀ ସମସ୍ତ ସାମଗ୍ରୀର ମେଳକ କରାଯାଉଛି। ଏହି ସମୟରେ ବାହାର ଭଣ୍ଡାରରେ କେବଳ ୭୯ ପ୍ରକାର ସୁନା ଓ ୩୯ ପ୍ରକାର ରୁପା ରହିଥିଲା। ବାହାର ଭଣ୍ଡାରରେ ଅଛି ପ୍ରାୟ ୮୧୭୫ ଭରି ୩/୪ ଅଣାର ୭୯ ଟି ସୁନାଦ୍ରବ୍ୟ ଓ ୪୬୭୧ ଭରି ୨ ଅଣାର ୩୯ ଟି ରୁପା ଦ୍ରବ୍ୟ । ୧୯୭୮ ପରେ ରହିଥିବା ରତ୍ନ ଓ ଦ୍ରବ୍ୟର ମଧ୍ଯ ଗଣତିମଣତି ସ‌ହ ନୂତନ ତାଲିକା କରାଯାଉଛି। ୨୦୨୧ରେ ଦାତା ଦେଇଥୁବା ୪ କେଜିରୁ ଅଧିକ ସୁନା ଓ ୩ କେଜିରୁ ଅଧିକ ରୁପା ମଧ୍ୟ ବାହାର ରତ୍ନଭଣ୍ଡାରରେ ଅଛି। ଏଥିରେ ଶ୍ରୀବଳଭଦ୍ରଙ୍କର ୪୦ଟି ଶ୍ରୀମୁଖ ପଦ୍ମ ଓ ୨ଟି ଝୋବା, ଶ୍ରୀଜଗନ୍ନାଥଙ୍କର ୫୩ଟି ଶ୍ରୀମୁଖ ପଦ୍ମ ଓ ୨ଟି ଝୋବା, ଦେବୀ ସୁଭଦ୍ରାଙ୍କର ୨ଟି ତଡ଼ଗୀ ଓ ୨ଟି ଝୋବା ରହିଥିଲା। ଏହି ଅଳଙ୍କାର ୨୦୨୧ ମସିହା ମାର୍ଚ୍ଚ ୮ରେ ଶ୍ରୀମନ୍ଦିର ମୁଖ୍ୟ କାର୍ଯ୍ୟାଳୟରୁ ନିଆଯାଇ ଶ୍ରୀମନ୍ଦିର ରତ୍ନଭଣ୍ଡାରର ବାହାର ଭଣ୍ଡାରରେ ରଖାଯାଇଥିଲା। ତେଣୁ ଏଗୁଡ଼ିକ ମଧ୍ୟ ନୂଆ ତାଲିକାକୁ ନିଆଯିବ।