ରାସ୍ତାର ଅବସ୍ଥା ଏଭଳି । ନଜର ହଟିଲେ ମାତ୍ରେ ଦୁର୍ଘଟଣା । ଗଞ୍ଜାମ ଜିଲ୍ଲା ଖଲ୍ଲିକୋଟ ବ୍ଲକ କୈରାଶି ଛକଠୁ ବାଦପଲ୍ଲୀ ପଞ୍ଚାୟତ ଗୁଣ୍ଡୁରୀପଲ୍ଲୀ ଗାଁକୁ ସଂଯୋଗ କରୁଥିବା ୯ କିମି ରାସ୍ତା। ପିଏମ୍ ସଡ଼କ ଯୋଜନା ମାଧ୍ୟମରେ ୪ କୋଟିରୁ ଅଧିକ ଟଙ୍କା ବ୍ୟୟରେ ନିର୍ମାଣ କାର୍ଯ୍ୟ ୨୦୧୭ ମସିହା ସେପ୍ଟେମ୍ବର ୨୦ରେ ସରିଥିଲା । ରକ୍ଷଣାବେକ୍ଷଣ ୨୦୨୨ ମସିହା ସେପ୍ଟେମ୍ବର ମାସ ୨୦ ତାରିଖ ମଧ୍ୟରେ କରିବାକୁ ଧାର୍ଯ୍ୟ ହୋଇଥିଲା । ମାତ୍ର ମରାମତି ଅଭାବ ଯୋଗୁଁ ରାସ୍ତା ଶୋଚନୀୟ ହୋଇପଡିଛି । ରାସ୍ତା ସାରା ଖାଲଖମା ଭର୍ତ୍ତି ।ରାସ୍ତା ଉପରୁ ପିଚୁ, ଗୋଡି, ମାଟି ଓ ମୋରମ ଉଠି ରାସ୍ତା ସାରା ଗର୍ତ୍ତ ସୃଷ୍ଟି ହୋଇଛି ।ସାମାନ୍ୟ ବର୍ଷାରେ କୁତ୍ରିମ ପୋଖରୀର ଭ୍ରମ ସୃଷ୍ଟି ହୋଇ ଯାତାୟତରେ ବାଧା ସୃଷ୍ଟି ହେଉଛି ।

ଏହି ରାସ୍ତା ଉପରେ ବାଦପଲ୍ଲୀ, ଖୋଜାପଲ୍ଲୀ, ଭିକାପଡା, କୈରାଶି, ଆଇତିପୁର ପଞ୍ଚାୟତବାସୀ ଦୈନଦିନ ଯାତାୟତ ପାଇଁ ନିର୍ଭର କରନ୍ତି । ପ୍ରାୟ ୨୫ ଖଣ୍ଡ ଗାଁର ଲୋକଙ୍କ ଏହି ରାସ୍ତା ଜୀବନରେଖା । ଜିଲ୍ଲା ପ୍ରଶାସନ ନିକଟରେ ବାରମ୍ବାର ରାସ୍ତାର ପୁନଃନିର୍ମାଣ ପାଇଁ ଦାବି ଜଣାଇଥିବା ସତ୍ତ୍ବେ ଧ୍ୟାନ ଦିଆଯାଉନାହିଁ ।ଯାହାକୁ ନେଇ ଅସନ୍ତୋଷ ପ୍ରକାଶ କରିଛନ୍ତି ଗ୍ରାମବାସୀ । ୮ ବର୍ଷ ତଳର ରାସ୍ତା ଅବସ୍ଥା ଶୋଚନୀୟ ହୋଇପଡିଥିବାବେଳେ କେବେ ମରାମତି ହେବ ଓ ନୂତନ ରାସ୍ତା ନିର୍ମାଣ ହେବ ତା ଉପରେ ସମସ୍ତଙ୍କ ନଜର ।