ଅର୍ଗସ ବ୍ୟୁରୋ : ଅଦିନିଆ ବର୍ଷା ପରେ ବଢିଲା ଚାଷୀଙ୍କ ଚିନ୍ତା । ଶହ ଶହ ଏକର ଜମିରେ ଭିଜିଲା ପାଚିଲା ଧାନ । ଗଜା ହେବା ଆଶଙ୍କାରେ ଚାଷୀ ଏବେ ହତାଶ ହୋଇପଡିଛନ୍ତି । ଗଞ୍ଜାମ ଆସ୍କାରେ ପରିବା କିଆରୀରେ ପାଣି ଜମିବାରୁ ପଚିଗଲା ବାଇଗଣ, ଭେଣ୍ଡି ଓ କଲରା । ବ୍ରହ୍ମଗିରିରେ ପାଣିରେ ବୁଡି ରହିଛି ଗଜା ଧାନ । ଖୋର୍ଦ୍ଧା ଜିଲ୍ଲା ଟାଗିଂରେ ମଧ୍ୟ ଗଜାହୋଇଛି ପାଚିଲା ଧାନ। ସେପଟେ ଆଜି ପାଗରେ ସୁଧାର ଆସିପାରେ ବୋଲି ଅନୁମାନ କରିଛି ପାଣିପାଗ ବିଭାଗ ।

ସେହିପରି ବ୍ରହ୍ମଗିରିରେ ପାଣିରେ ବୁଡି ରହିଛି ଗଜା ଧାନ । କୁଶୁବେଣ୍ଟି ପଞ୍ଚାୟତରେ ଚାଷ ଜମିରେ ଲହଡି ମାରୁଛି ବର୍ଷା ପାଣି । ଅଦିନିଆ ବର୍ଷାରେ ବ୍ୟାପକ କ୍ଷୟକ୍ଷତି ହୋଇଛି । ଫଳରେ ସହାୟତା ଅପେକ୍ଷାରେ ରହିଛନ୍ତି ଚାଷୀ । ବଡମ୍ବା ନରସିଂହପୁରର ହଜାର ହଜାର ହେକ୍ଟର ଚାଷଜମି କ୍ଷତିଗ୍ରସ୍ତ। ଲଗାଣ ବର୍ଷାରେ କ୍ଷେତରେ ଚାଷ କରିଥିବା ସମସ୍ତ ଫସଲ ନଷ୍ଟ ହୋଇଯାଇଛି । ଅମଳ ପୂର୍ବରୁ ଅଦିନିଆ ବର୍ଷା ଚାଷୀର ମେରୁଦଣ୍ଡ ଭାଙ୍ଗି ଦେଇଥିବା ଦେଖିବାକୁ ମିଳିଛି । କ୍ଷତି ପୂରଣ ଯୋଗାଇ ଦେବାକୁ ସରକାରଙ୍କୁ ଦାବି କରିଛନ୍ତି କ୍ଷତିଗ୍ରସ୍ତ ଚାଷୀକୂଳ । ହେକ୍ଟର ହେକ୍ଟର ଚାଷ ଜମିରେ ଧାନ ଚାଷ ପାଇଁ ଚାଷୀ ଆଣିଥିବା ଋଣ କିପରି ସୁଝିବ ତାକୁ ନେଇ ଏବେ ଚିନ୍ତାରେ ଚାଷୀ ।

କଣ୍ଟାମାଳ ଅଂଚଳରେ ଗତ 3ଦିନ ହବ ଅଦିନିଆ ଲଗାଣ ବର୍ଷା ଜାରି ରହିଛି । ଫଳରେ ଅନେକ ସ୍ଥାନରେ କ୍ଷୟକ୍ଷତି ହୋଇଛି I ତେବେ କଣ୍ଟାମାଳର ଶଗଡା ଅଂଚଳର ବିଭିନ୍ନ ଧାନକ୍ଷେତରେ ଅମଳ କରିଥିବା ଧାନ ପଡିରହିଛି । ଫଳରେ ବର୍ଷା ଯୋଗୁଁ ଧାନ ଗଜା ଦେବାରେ ଲାଗିଛି । ଏପଟେ ଯେତିକି ଧାନ ଅଛି ତାକୁ ସାଉଁଟିବାରେ ବ୍ୟସ୍ତ ଚାଷୀ । ଚାଷୀ ଧାରକରଜ କରି ଧାନ ଚାଷ କରିଥିବାବେଳେ ଦାଉ ସାଜିଛି ଅଦିନିଆ ବର୍ଷା । କେବଳ ଧାନ ନୁହେଁ, ରବି ଫସଲ ପାଇଁ ବିଲରେ ବୁଣା ହୋଇଥିବା ମୁଗ, ବିରି ବିହନ ଧୋଇ ଯାଇଛି l ଅନ୍ୟ ପଟେ ହରଡ଼ ଚାଷ କରିଥିବା ଚାଷୀଙ୍କ ଚାଷ ବର୍ଷା ଯୋଗୁଁ ସବୁ ଫୁଲ ଝଡ଼ି ପଡିଛି, ପବନ ଯୋଗୁଁ ହରଡ଼ ଗଛ ସବୁ ଭୂଇଁ ରେ ପଡିରହିଛି ।

ଅଦିନିଆ ବର୍ଷା ଯୋଗୁଁ ହରଡ଼ ଚାଷ ସହ ପନିପରିବା ଚାଷ ବହୁ କ୍ଷତି ହୋଇଥିବା କହିଛନ୍ତି ଚାଷୀ । ଆସନ୍ତା ୨୭ରୁ ପୁଣି ଏକ ଏକ ଲଘୁଚାପ ନାଁ ଶୁଣି ଚାଷୀ ଏବେ ଏକ ପ୍ରକାର ଛାନିଆ ହୋଇଯାଇଥିବା ଦେଖିବାକୁ ମିଳିଛି । ଏଭଳି ପାଗ ଆଗକୁ ଲାଗି ରହିଲେ ଏ ବର୍ଷ ଖାଇବାକୁ ଗଣ୍ଡେ ମିଳିବ ନାହିଁ ବୋଲି ଖୋର୍ଦ୍ଧା ଜିଲ୍ଲା ଟାଙ୍ଗି ବ୍ଲକ ଅଧିନସ୍ଥ ଲେଣ୍ଡୋ ପଞ୍ଚାୟତ ଅଞ୍ଚଳର ଅନେକ ଚାଷୀ ଅଭିଯୋଗ କରିଛନ୍ତି ଏବଂ କ୍ଷୟକ୍ଷତି ଆକଳନ କରି କ୍ଷତିପୂରଣ ଯୋଗାଇଦେବାକୁ ସରକାରଙ୍କ ପାଖରେ ନିବେଦନ କରିଛନ୍ତି ।