Argus News - କଟକରେ ଫେରୁଛି ଶାନ୍ତି, ବାହାରୁ ଲୋକ ଆସି କରିଥିଲେ ବିଶୃଙ୍ଖଳା

କଟକରେ ସ୍ବାଭାବିକ ହୋଇଛି ଜୀବନ ଯାତ୍ରା । ଭାଇଚାରାର ସହରରେ ଫେରିଛି ଶାନ୍ତି । ୩୬ ଘଣ୍ଟା ପରେ କଟକରୁ କର୍ଫ୍ୟୁ ହଟିଛି । ତେବେ ଜାରି ରହିଛି ପୋଲିସ ପାଟ୍ରୋଲିଂ, ସମ୍ବେଦନଶୀଳ ସ୍ଥାନରେ ଏବେ ବି ଫୋର୍ସ ମୁତୟନ ଅଛନ୍ତି । ସେପଟେ ସାଂସଦ ଭର୍ତ୍ତୃହରିଙ୍କ ପରେ ପ୍ରତାପ ଷଡ଼ଙ୍ଗୀ ଉଠାଇଛନ୍ତି ବାହାର ଲୋକଙ୍କ ସମ୍ପୃକ୍ତି ପ୍ରସଙ୍ଗ ।

ପୋଲିସ କମିଶନର ଏସ୍ ଦେବଦତ୍ତ ସିଂ କହିଛନ୍ତି, କଟକଣା ସମୟରେ କୌଣସି ସ୍ଥାନରେ ଅପ୍ରୀତିକର ଘଟଣା ଘଟିନାହିଁ। ସ୍ଥିତି ଉପରେ ନଜର ରଖାଯାଇଛି । ସମ୍ବେଦନଶୀଳ ସ୍ଥାନରେ ଫୋର୍ସ ମୁତୟନ ଅଛନ୍ତି । ଜାରି ରହିଛି ପୋଲିସ ପାଟ୍ରୋଲିଂ ।

ସେପଟେ କଟକ ଗଣ୍ଡଗୋଳକୁ ନେଇ ସାଂସଦ ଭର୍ତ୍ତୃହରି ମହତାବଙ୍କ ପରେ ବଡ଼ ବୟାନ ଦେଇଛନ୍ତି ବିଜେପି ସାଂସଦ ପ୍ରତାପ ଷଡ଼ଙ୍ଗୀ। କହିଛନ୍ତି ରାଜ୍ୟରେ ୨୫ ବର୍ଷ ଧରି ପାଳନ ପୋଷଣ ହୋଇଥିଲେ ଅସାମାଜିକ ତତ୍ତ୍ଵ । ହଠାତ୍ ଶ୍ୱାସରୁଦ୍ଧ ହୋଇ ଏମାନେ ଆକ୍ରୋଶ ଦେଖାଇଛନ୍ତି । କିଛି ଦେଶ ବିରୋଧୀ ତତ୍ତ୍ଵ ସବୁ ଆଡ଼େ ଅଛନ୍ତି । ଜ୍ୟୋତି ମାଲାହୋତ୍ରା ବି ଆମ ଭିତରେ ଥିଲେ ।

କଟକ ଗଣ୍ଡଗୋଳ ଘଟଣାରେ ଏଯାଏଁ ୧୦ ଜଣଙ୍କୁ ଗିରଫ କରାଯାଇଛି । ସୋସିଆଲ୍ ମିଡିଆରେ ଗୁଜବ ପ୍ରଚାର କରିଥିବା ଏବଂ ଗ୍ରାଉଣ୍ଡରେ ବିଶୃଙ୍ଖଳାକାରୀଙ୍କ ଉପରେ ଦୃଢ଼ ଆକ୍ସନ ନିଆଯିବ ବୋଲି କହିଛି ପୋଲିସ।

ତେବେ ଦଶହରା ପରେ ମାଆ ଦୁର୍ଗାଙ୍କ ଭସାଣି ବେଳେ ହାତୀ ପୋଖରୀ ଛକରେ ହୋଇଥିଲା ଗୋଷ୍ଠୀ ସଂଘର୍ଷ । ଏହା ପରେ କଟକ ଅଶାନ୍ତ ହୋଇଥିବା ବେଳେ ସ୍ଥିତି ନିୟନ୍ତ୍ରଣକୁ ଆଣିବା ପାଇଁ କର୍ଫ୍ୟୁ ଲାଗିଥିଲା । ରବିବାର ରାତି ୧୦ଟାରୁ ୩୬ ଘଣ୍ଟା ଯାଏଁ କର୍ଫ୍ୟୁ ଲାଗିଥିଲା ।

ଦରଘା ବଜାର, ମଙ୍ଗଳାବାଗ, କ୍ୟାଣ୍ଟନମେଣ୍ଟ ଥାନା ଅଞ୍ଚଳ, ପୁରୀଘାଟ, ଲାଲବାଗ, ବିଡ଼ାନାସୀ, ମର୍କତନଗର, ସିଡିଏ ଫେଜ୍‌-୨, ମାଲଗୋଦାମ, ବାଦାମବାଡ଼ି ଥାନା, ଜଗତପୁର, ବୟାଳିଶିମୌଜା ଓ କଟକ ସଦର ଥାନା ଅଞ୍ଚଳରେ ଲାଗିଥିବା କର୍ଫ୍ୟୁ କୋହଳ ହୋଇଛି ।