Bus Seized / ନିୟମ ମାନୁ ନାହାନ୍ତି ଘରୋଇ ବସ୍; ପରମିଟ୍ ଓ ଫିଟନେସ୍ ନଥାଇ ରାସ୍ତାରେ ଗଡ଼ୁଛି

କଟକ: ଘରୋଇ ବସ୍‌କୁ ୧୨ ଲକ୍ଷ ଜରିମାନା । ବିନା ପରମିଟ, ଫିଟନେସ୍ ନଥାଇ ରାସ୍ତାରେ ଗଡ଼ୁଥିବା ୪ଟି ଘରୋଇ ବସ୍‌କୁ ୧୨ ଲକ୍ଷ ଜରିମାନା କରିଛି ପରିବହନ ବିଭାଗ । ଏସବୁ ବସ୍ ଗୁଡ଼ିକ ଜାଲ୍ ନମ୍ବର ପ୍ଲେଟ୍ ଲଗାଇ ଯାତ୍ରୀ ପରିବହନ କରୁଥିଲେ ।

ନରାଜ ଓ ଗୋଡ଼ିସାହି ନିକଟରେ କଟକ ଆଞ୍ଚଳିକ ପରିବହନ ବିଭାଗ ପକ୍ଷରୁ ସ୍ପେଶାଲ୍ ଡ୍ରାଇଭ୍‌ରେ ୪ଟି ଘରୋଇ ବସ୍ ଧରା ପଡ଼ିଛନ୍ତି । ଘରୋଇ ବସ୍‌କୁ ମୋଟ ୧୨ ଲକ୍ଷ ୩୫ ହଜାର ୧୫୭ ଟଙ୍କା ଜରିମାନା ପକାଇଛି ପରିବହନ ବିଭାଗ ।

ଏଥିସହ ପଢ଼ନ୍ତୁ: ଆହୁରି ବଢ଼ିଲା କଟକଣା; କାଲି ଖୋଲିବନି ସ୍କୁଲ୍ ଓ କଲେଜ

ଏସବୁ ଘରୋଇ ବସ୍ ମଧ୍ୟ ବିନା ପରମିଟ୍, ଫିଟନେସ୍ ଓ ଜାଲ ନମ୍ବର ପ୍ଲେଟ୍ ଲଗାଇ ରାସ୍ତାରେ ଗଡ଼ୁଥିଲା । ପରିବହନ ବିଭାଗ ୪ଟି ଯାକ ଘରୋଇ ବସ୍‌କୁ ମୋଟା ଅଙ୍କର ଜରିମାନା କରିବା ବସ୍‌ ଗୁଡ଼ିକୁ ଜବତ କରିଛି ।

ବସ ନମ୍ବର OR 05A C 5236 ଜାଲ ନମ୍ବର ପ୍ଲେଟରେ ରାସ୍ତାରେ ଗଡ଼ୁଥିଲା । ଉକ୍ତ ବସ୍‌କୁ ୫ ଲକ୍ଷ ୧୦ ହଜାର ଟଙ୍କାର ଜରିମାନା କରାଯାଇଛି । ସେହିପରି OR 02 BJ 0142 ବସ୍‌କୁ ୨ ଲକ୍ଷ ୩୪ ହଜାର ୫୮୦ ଟଙ୍କା ଫାଇନ୍ କରିଛି ପରିବହନ ବିଭାଗ ।

OD 05G 6974 ବସ୍‌କୁ ୪ ଲକ୍ଷ ୮୦ ହଜାର ୭୭ ଟଙ୍କା ଓ OD 05 BC 6606 ବସ୍‌କୁ ୧୦ ହଜାର ୫୦୦ ଟଙ୍କା ଜରିମାନା କରାଯାଇଥିବା ଆଞ୍ଚଳିକ ପରିବହନ ବିଭାଗ ପକ୍ଷରୁ ସୂଚନା ଦିଆଯାଇଛି ।

ଏଥିସହ ପଢ଼ନ୍ତୁ: ଗୁଡ଼ି ଉଜାଡ଼ି ଦେଲା ପରିବାର; ୭୦ ଫୁଟ୍ ବ୍ରିଜ୍‌ ତଳକୁ ଖସି ଆଖି ବୁଜିଲା ବାପାମାଆ ସହ ଝିଅ

ବୁଧବାର କେନ୍ଦ୍ରାପଡ଼ା, ଜଗତସିଂହପୁର ପରେ ମୁଖ୍ୟମନ୍ତ୍ରୀ ବସ୍ ସେବାକୁ କଟକ ଘରୋଇ ବସ ମାଲିକ ସଂଘ ବିରୋଧ କରିଥିଲା । ପଞ୍ଚାୟତରୁ ବ୍ଲକ ମୁଖ୍ୟାଳୟ ପର୍ଯ୍ୟନ୍ତ ଚାଲୁଥିବା ମୁଖ୍ୟମନ୍ତ୍ରୀ ବସ୍ ବୁଧବାର କଟକ ନେତାଜୀ ବସ୍ ଟର୍ମିନାଲକୁ ଆସିଥିଲା । ଯାହାକୁ ବିରୋଧ କରିଥିଲା ଘରୋଇ ବସ୍ ମାଲିକ ସଂଘ ।

କଟକ ଜିଲ୍ଲା ବସ୍ ମାଲିକ ସଂଘ ସଭାପତି କହିଥିଲେ, "ଲକ୍ଷ୍ମୀ ବସ୍ ବା ମୁଖ୍ୟମନ୍ତ୍ରୀ ବସ୍ ସେବା ପଞ୍ଚାୟତରୁ ବ୍ଲକ ଯାଏ ଗଡ଼ିବା କଥା । କିନ୍ତୁ ବିନା ଅନୁମତିରେ ସେମାନେ ସିଧା ଜିଲ୍ଲା ମୁଖ୍ୟାଳୟକୁ ଆସିଛନ୍ତି । ଯଦି କର୍ତ୍ତୃପକ୍ଷ କିମ୍ବା ସରକାର ମୁଖ୍ୟମନ୍ତ୍ରୀ ବସ୍ ସେବାକୁ ଜିଲ୍ଲା ମୁଖ୍ୟାଳୟ ଯାଏ ଚଳାନ୍ତି ତେବେ ନେତାଜୀ ବସ୍ ଟର୍ମିନାଲକୁ ଗୋଟିଏ ବି ଘରୋଇ ବସ ଆସିବ ନାହିଁ କି କୌଣସି ବସକୁ ଏଠାରୁ ଚାଲିବାକୁ ଦିଆଯିବ ନାହିଁ ।"