ସ୍ଥଳଭାଗ ଛୁଇଁବା ପୂର୍ବରୁ ମୋନ୍ଥା ଚରିଲାଣି ତାଣ୍ଡବ ଲୀଳା । ଉପକୂଳ କଳାଣି ଛାରଖାର । ଭାଙ୍ଗି ପଡ଼ିଲାଣି ବିରାଟ ବିରାଟ ଗଛ । ଧସିଲାଣି ପାହାଡ଼ । ରାସ୍ତା ଘାଟ ଜାମ୍‌ । ଯାତାୟତ ଠପ୍ । କୋରାପୁଟ ପଟାଙ୍ଗିରେ ପବନର ମାତ୍ରା ଏତେ ଯେ କାଉଗୁଣ୍ଠା ସ୍କୁଲ୍‌ ଉପରେ ଭାଙ୍ଗି ପଡ଼ିଲା ବିରାଟ ଗଛ । ଠିକ୍‌ ସେମିତି ସେମିଳିଗୁଡ଼ା ପଣସପୁଟ ଗାଁରେ ଜଣଙ୍କ ଘର ଉପରେ ମଧ୍ୟ ଗଛ ଭାଙ୍ଗି ପଡ଼ିଛି।


ବାତ୍ୟା ମୋନ୍ଥା ଲ୍ୟାଣ୍ଡଫଲ୍ କରିବା ପୂର୍ବରୁ ଦେଖାଇଲାଣି ଭୟଙ୍କର ରୂପ। କାକିନାଡ଼ା ପାଖରେ ଅସାନ୍ତ ହେଲାଣି ସମୁଦ୍ର । ବଡ଼ ବଡ଼ ଲହଡ଼ି ସ୍ଥଳଭାଗ ଆଡ଼କୁ ମାଡ଼ିଆସୁଛି ।

ଏପଟେ ଗଜପତିରେ ବି ସ୍ଥିତି ସମାନ । ତଳିଆ ଅଞ୍ଚଳରୁ ୧୦ ହଜାର ଲୋକଙ୍କୁ ସ୍ଥାନାନ୍ତର ଗଲାଣି । ୨୮୭ ବାତ୍ୟା ଆଶ୍ରୟସ୍ଥଳୀକୁ ସେମାନଙ୍କୁ କରାଯାଇଛି ସ୍ଥାନାନ୍ତର । ମାଆ ଗୃହକୁ ଗଲେଣି ୧୬୦ରୁ ଅଧିକ ଗର୍ଭବତୀ। ଆର. ଉଦୟଗିରି, କାଶୀନଗର ଓ ଗୁମ୍ମାରେ ଭୂସ୍ଖଳନ ନେଇ ମଧ୍ୟ ଖବର ସାମ୍ନାକୁ ଆସିଲାଣି । ପାହାଡ଼ରୁ ଖସିଛି ବିରାଟ ବିରାଟ ପଥର । ଆଉ ମଝି ରାସ୍ତାରେ ପଡ଼ି, ଯାତାୟତ ହୋଇଛି ଠପ୍‌ । ପଥରର ଆକାର ଏତେ ବଡ଼ ଯେ, ତାକୁ ହଟାଇବାକୁ ହେଲେ ବ୍ଲାଷ୍ଟିଂ କରିବାକୁ ପଡ଼ିବ ।


ଅନ୍ୟପଟେ ପାଣିପାଗ ବିଭାଗର ସୂଚନାନୁସାରେ ସନ୍ଧ୍ୟା ପ୍ରାୟ ସାତଟା ପରେ ମୋନ୍ଥାର ଲ୍ୟାଣ୍ଡଫଲ ପ୍ରକ୍ରିୟା ଆରମ୍ଭ ହୋଇଛି । କାକିନାଡ଼ା ଦେଇ ଅତିକ୍ରମ କରୁଛି ବାତ୍ୟା ‘ମୋନ୍ଥା’ ।

ପଶ୍ଚିମକେନ୍ଦ୍ରୀୟ ବଙ୍ଗୋପସାଗରରେ ସକ୍ରିୟ ଏହି ବାତ୍ୟା ଆନ୍ଧ୍ର ଉପକୂଳ ଆଡ଼କୁ ମାଡ଼ି ଆସୁଛି। ଆଉ ଏଇଥିପାଇଁ ଦକ୍ଷିଣ ଓଡ଼ିଶାରେ ରେଡ୍ ଆଲର୍ଟ ଜାରି ହୋଇଛି। ମୋନ୍ଥା ଏବେ ଆନ୍ଧ୍ରର ମଛଲିପାଟନମରୁ ଦକ୍ଷିଣ-ଦକ୍ଷିଣପୂର୍ବରେ ପାଖାପାଖି ପହଞ୍ଚି ସାରିଲାଣି । ଠିକ୍‌ ସେମିତି କାକିନାଡ଼ାକୁ ଆଉ କିଛି ସମୟ ମଧ୍ୟରେ ଛୁଇଁବ ମୋନ୍ଥା । ଯାହାର ପ୍ରଭାବରେ ଗୋପାଳପୁରରେ ମଧ୍ୟ ପ୍ରବଳରୁ ଅତି ପ୍ରବଳ ବର୍ଷା ଆରମ୍ଭ ହୋଇଛି ।



ତେବେ ବାତ୍ୟାକୁ ନେଇ ପାଣିପାଗ ବିଭାଗ କହିଛି, ମୋନ୍ଥା ଲ୍ୟାଣ୍ଡଫଲ୍ ବେଳେ ଘଣ୍ଟାପ୍ରତି ୯୦ରୁ ୧୦୦ କିଲୋମିଟର ବେଗରେ ପବନ ବହିବ । ଖାଲି ସେତିକି ନୁହେଁ ଏହି ସମୟରେ ଝଟ୍‌କା ପବନ ବି ଦେବ । ଯାହାର ବେଗ ଘଣ୍ଟାପ୍ରତି ୧୧୦ କିଲୋମିଟର ପର୍ଯ୍ୟନ୍ତ ରହିପାରେ ବୋଲି କୁହାଯାଉଛି ।

ବାତ୍ୟା 'ମୋନ୍ଥା' କୁ ନଜରରେ ରଖି ମାଲକାନଗିରି, କୋରାପୁଟ, ରାୟଗଡ଼ା, ଗଜପତି, ଗଞ୍ଜାମ ଜିଲ୍ଲାକୁ ରେଡ୍ ଆଲର୍ଟ ଜାରି କରାଯାଇଛି । ସେହିଭଳି ପ୍ରବଳ ବର୍ଷା ନେଇ ନବରଙ୍ଗପୁର, କଳାହାଣ୍ଡି, କନ୍ଧମାଳ, ନୟାଗଡ଼, ନୂଆପଡ଼ା, ବଲାଙ୍ଗିର, ସୋନପୁର, ବୌଦ୍ଧ, ଖୋର୍ଦ୍ଧା, ପୁରୀ ଓ ବରଗଡ଼ ଜିଲ୍ଲାକୁ ରହିଛି ଅରେଞ୍ଜ ୱାର୍ଣ୍ଣିଂ ।

ହେଲେ ସବୁଠାରୁ ବଡ଼ କଥା ହେଲା ଏଭଳି ବାତ୍ୟାର ମୁକାବିଲା ପାଇଁ ଓଡ଼ିଶା ସବୁବେଳେ ପ୍ରସ୍ତୁତ ଥାଏ । ମୋହନ ସରକାର ବାତ୍ୟାରେ ଜିରୋ କାଜୁଆଲଟି ପାଇଁ ସବୁଠାରୁ ଅଧିକ ଗୁରୁତ୍ୱ ଦେଇଛନ୍ତି । ଏଥିରେ ଯେମିତି କାହାର ଜୀବନ ହାନି ନହୁଏ ସେଥିପ୍ରତି ସରକାର ଗୁରୁତ୍ୱର ସହ କାମ କରିବେ କହିଛନ୍ତି । ଅନ୍ୟପଟେ ବାତ୍ୟା ମୁକାବିଲା ପାଇଁ ସବୁ ଏକ୍ସପର୍ଟ ଟିମ୍ ତୟାର ବସିଛନ୍ତି । ଅତ୍ୟାଧୁନିକ ଯନ୍ତ୍ରପାତି ସହ ପାୱାର ବୋଟ, ରବର ବୋଟ, JCB, ଗଛ କଟା ମେସିନ୍‌, ଟେଲିସକୋପିକ ଲାଇଟ ମଧ୍ୟ ରଖିଛନ୍ତି ଉଦ୍ଧାରକାରୀ ଟିମ୍‌।

ସେପଟେ ଗ୍ରାଉଣ୍ଡରେ ମଧ୍ୟ ପହଁଚି ସାରିଛନ୍ତି NDRF, ODRAF ଓ ଅଗ୍ନିଶମ ବାହିନୀ । ୧୨୩ ଅଗ୍ନିଶମ ଟିମ ବ୍ରହ୍ମପୁର RDC ସର୍କଲରେ ଅଛନ୍ତି । କଟକ RDC ସର୍କଲରେ ପ୍ରସ୍ତୁତି ହୋଇ ୧୪୪ ଟିମ ଅଛନ୍ତି । ସୋମବାର ସନ୍ଧ୍ୟା ସୁଦ୍ଧା ୫୦ଟି ODRAF ଟିମ୍ ମୁତୟନ ହୋଇସାରିଛନ୍ତି । ସମସ୍ତ ରେସ୍କ୍ୟୁ ଟିମକୁ ଅତ୍ୟାଧୁନିକ ଉପକରଣ ଦିଆଯାଇଛି । ଭୂସ୍ଖଳନ ନେଇ ପୋଲିସ ଓ ପ୍ରଶାସନ ସହ ଯୋଗସୂତ୍ର ରଖାଯାଇଛି । ପାହାଡ଼ିଆ ଅଞ୍ଚଳ ପ୍ରତି ସ୍ବତନ୍ତ୍ର ଧ୍ୟାନ ଦିଆଯାଇଛି । ବାତ୍ୟା ସମୟରେ ଘରୁ ନବାହାରିବାକୁ ପରାମର୍ଶ ଦେଇଛନ୍ତି ଅଗ୍ନିଶମ ଡିଜି ।