ସୋରଡ଼ା: ପୋଖରୀ କୂଳରେ ବୀଭତ୍ସ ହତ୍ୟା । ମିଳିଲା ଖଣ୍ଡ ବିଖଣ୍ଡିତ ମୃତଦେହ । ଗଞ୍ଜାମ ଜିଲ୍ଲା ବଡ଼ଗଡ଼ ଥାନା ରାଇବନ୍ଧ ଗାଁ ପୋଖରୀ ବନ୍ଧରୁ ଯୁବକଙ୍କ ମୃତଦେହ ଉଦ୍ଧାର ହୋଇଛି । ମୃତକ ହେଲେ ସେହି ଗାଁର ଡମ୍ବୁରୁ ସ୍ଵାଇଁ । ଡମ୍ବୁରୁଙ୍କୁ ହତ୍ୟା କରାଯାଇଥିବା ପରିବାର ଲୋକ ଅଭିଯୋଗ କରିଛନ୍ତି ।

ସୂଚନା ଅନୁସାରେ, କିଛି ଦିନ ତଳେ ଡମ୍ବୁରୁଙ୍କୁ ସେହି ଗାଁର ଶଙ୍କର ସ୍ଵାଇଁଙ୍କ ପୁଅ ବାଇନାଥ ସ୍ଵାଇଁ ହତ୍ୟା ଧମକ ଦେଇଥିଲେ । ମୋବାଇଲ ମେସେଜକୁ ଆଧାର କରି ଡମ୍ବୁରୁ ସ୍ଵାଇଁ ବଡ଼ଗଡ଼ ଥାନାରେ ଅଭିଯୋଗ କରିଥିଲେ । ପୂର୍ବରୁ ଦୁଇ ପରିବାର ମଧ୍ୟରେ ଝଗଡ଼ା ହୋଇଥିଲା ପରେ ପୋଲିସ ଉପସ୍ଥିତିରେ ଅପୋସ ବୁଝାମଣା ବି ହୋଇଥିଲା ।

ମାତ୍ର ୩ ଦିନ ତଳେ ଶଙ୍କର ସ୍ଵାଇଁ, ଡମ୍ବୁରୁଙ୍କ ପରିବାର ଲୋକଙ୍କୁ ଗାଲିଗୁଳଜ କରିଥିଲେ । ଶନିବାର ସନ୍ଧ୍ୟାରେ ଡମ୍ବୁରୁ ଗାଧୋଇବାକୁ ପୋଖରୀ ବନ୍ଧକୁ ଯାଇ ଆଉ ଘରକୁ ଫେରି ନଥିଲେ । ବହୁ ଖୋଜାଖୋଜି ପରେ ପୋଖରୀ ନିକଟରୁ ଡମ୍ବୁରୁଙ୍କ ଖଣ୍ଡ ବିଖଣ୍ଡିତ ମୃତଦେହ ଉଦ୍ଧାର ହୋଇଛି । ବଡ଼ଗଡ଼ ପୋଲିସ ତଦନ୍ତ କରୁଛି ।