ମାଲକାନଗିରି ମୋଟୁରେ ଲ୍ୟାଣ୍ଡ ଜିହାଦର ସାଂଘାତିକ ତଥ୍ୟ । ଅର୍ଗସ ହାତରେ ଲାଗିଛି ସାଙ୍ଘାତିକ ତଥ୍ୟ । ୧୦୦ ଏକର ନୁହେଁ ବରଂ ୨୮୫ ଏକର ସରକାରୀ ଜମିକୁ ନିଜ ଅକ୍ତିଆରରେ ରଖିଛି ମାସୁମ ଖାନ୍ ଓ ତା ଭାଇ ଜମାଲ ଖାନ । ଦୀର୍ଘ ବର୍ଷ ଧରି ୨୮୫ ଏକର ସରକାରୀ ଜମିକୁ ଜବର ଦଖଲ କରି ମନମାନୀ କରୁଛି ମାସୁମ ଖାନ୍ । ଉଚ୍ଚ ନ୍ୟାୟାଳୟ ରିଟ୍ ପିଟିସନରେ ନିଜେ କହିଛି ମାସୁମ ଖାନ୍‌ର ଭାଇ ଜମାଲ ଖାନ । ବହୁ ଚର୍ଚ୍ଚିତ ମାଲକାନଗିରି ଜିଲ୍ଲା ମୋଟୁର ଇସଲାମ ନଗରରେ ଶହେ ଏକର ସରକାରୀ ଜମି ଜବର ଦଖଲ ଘଟଣା ।

ମୋଟୁର ବିଜେଡି ନେତା ମାସୁମ ଖାନ ପୂର୍ବ ସରକାର ସମୟରେ ବିଜେଡି ନେତା ଓ ସରକାରୀ କର୍ମଚାରୀଙ୍କୁ ହାତ ବାରିସୀ କରି ଶହେ ଏକରରୁ ଅଧିକ ସରକାରୀ ଜମି ଓ ସଂରକ୍ଷିତ ଜଙ୍ଗଲକୁ କାଟି ସଫା କରି ଇସଲାମ ନଗର ନିର୍ମାଣ କରିଥିଲା । ଅର୍ଗସରେ ଏହି ଖବର ବାରମ୍ବାର ପ୍ରସାରଣ ପରେ ରାଜସ୍ୱ ମନ୍ତ୍ରୀ ସୁରେଶ ପୂଜାରୀ ଓ ଜଙ୍ଗଲ ଓ ପରିବେଶ ମନ୍ତ୍ରୀ ଗଣେଶ ରାମ ଖୁଣ୍ଟିଆ ତଦନ୍ତ ନିର୍ଦ୍ଦେଶ ଦେଇଥିଲେ । ସେପଟେ କୌଣସି କାର୍ଯ୍ୟାନୁଷ୍ଠାନ ପରିବର୍ତ୍ତେ ଏବେ ମାଲକାନଗିରି ଉପଜିଲ୍ଲାପାଳ କହୁଛନ୍ତି ଖାନ ପରିବାର ପାଖରେ ମାତ୍ର ୩୫ରୁ ୪୦ ଏକର ରାଜସ୍ୱ ଜମି ଜବରଦଖଲରେ ରହିଛି । ତାହା ଉଚ୍ଚ ନ୍ୟାୟାଳୟରେ ବିଚାରାଧୀନ ଥିବାରୁ ଆମେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରିପାରୁନାହୁଁ।