ଭୁବନେଶ୍ଵର: ଆଜି ପୁରୀ ସ୍ଵର୍ଗଦ୍ଵାରରେ ପୂର୍ବତନ କେନ୍ଦ୍ରମନ୍ତ୍ରୀ ଡାକ୍ତର ଦେବେନ୍ଦ୍ର ପ୍ରଧାନଙ୍କ ଶେଷକୃତ୍ୟ ହେବ । ଗତକାଲି ୮୪ ବର୍ଷ ବୟସରେ ଦେହାନ୍ତ ହୋଇଥିଲା । ରାତି ତମାମ ଭୁବନେଶ୍ଵରରେ ପୂର୍ବତନ କେନ୍ଦ୍ରମନ୍ତ୍ରୀ ଡାକ୍ତର ଦେବେନ୍ଦ୍ର ପ୍ରଧାନଙ୍କ ପାର୍ଥିବ ଶରୀର ଶେଷ ଦର୍ଶନ ପାଇଁ ଲାଗିଥିଲା ନେତାଙ୍କ ଗହଳି । ଏହା ପୂର୍ବରୁ ଭୁବନେଶ୍ଵର ବିମାନବନ୍ଦରରେ ତାଙ୍କୁ ଗାର୍ଡ ଅଫ୍ ଅନର ଦିଆଯାଇଥିଲା ।

ଶ୍ରଦ୍ଧାଞ୍ଜଳି ଜଣାଇଥିଲେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ବାଚସ୍ପତି, ଉପମୁଖ୍ୟମନ୍ତ୍ରୀଙ୍କ ସମେତ ବିଶିଷ୍ଟ ନେତା ଦେବେନ୍ଦ୍ରଙ୍କ ଶେଷ ଦର୍ଶନ କରିଥିଲେ । ଏହାପରେ ବିଶାଳ ଶୋଭାଯାତ୍ରାରେ ବିଜେପି ରାଜ୍ୟ କାର୍ଯ୍ୟାଳୟ ନିଆଯାଇଥିଲା ଦେବେନ୍ଦ୍ରଙ୍କ ପାର୍ଥିବ ଶରୀର । ବିରୋଧୀ ଦଳ ନେତା ନବୀନ ପଟ୍ଟନାୟକ ଏବଂ ପୂର୍ବତନ ବିଧାୟକ ସୌମ୍ୟରଞ୍ଜନ ପଟ୍ଟନାୟକ, କଂଗ୍ରେସ ବିଧାୟକ ଦଳ ନେତା ରାମଚନ୍ଦ୍ର କାଡ଼ାମ ଏବଂ ବିଧାୟକ ତାରା ବାହିନୀ ପତି ଶେଷ ଦର୍ଶନ କରିଥିଲେ ।

୮୪ ବର୍ଷ ବୟସରେ ପୁତ୍ର ତଥା କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ନୂଆଦିଲ୍ଲୀ ସ୍ଥିତ ସରକାରୀ ବାସଭବନରେ ପିତା ଦେବେନ୍ଦ୍ର ପ୍ରଧାନଙ୍କ ଦେହାନ୍ତ ହୋଇଛି । ଡକ୍ଟର ଦେବେନ୍ଦ୍ର ପ୍ରଧାନ ଏକାଧାରରେ ଥିଲେ ଜଣେ ଚିକିତ୍ସକ, କୃଷିବିତ୍ ଓ ସମାଜସେବୀ । ଡାକ୍ତରୀ ପେଶା ଛାଡି ତୃଣମୂଳ ସ୍ତର ବିଜେପି ବ୍ଲକ ସଭାପତିରୁ ରାଜ୍ୟ ସଭାପତି ତଥା ବିଜେପିର ଓଡ଼ିଶାରୁ ପ୍ରଥମ କେନ୍ଦ୍ରମନ୍ତ୍ରୀ ହୋଇଥିଲେ । ବିଜେପିର ପ୍ରାରମ୍ଭିକ ସ୍ଥିତିରେ ତୃଣମୂଳ ସଙ୍ଗଠନକୁ ମଜଭୁତ କରି ବିଜେପିକୁ ପ୍ରମୁଖ ରାଜନୈତିକ ଦଳ ଭାବରେ ପ୍ରତିଷ୍ଠିତ କରାଇଥିଲେ ।

Argus News | argus news | -Argusnews Home: Odisha Latest News, Breaking News, Trending News, Live TV and more