ପୁଳା ପୁଳା ସୁନା, ସୁନା ବିସ୍କୁଟ, ସୁନା କଏନ, ସୁନା ଅଳଙ୍କାର । ତା ସାଙ୍ଗକୁ କେଜି କେଜି ରୂପା । ପୁଣି ବିଡ଼ା ବିଡ଼ା ଟଙ୍କା । ଏତେ ଟଙ୍କା ଯେ କାବା ପାଲଟିଗଲେ ଖୋଦ୍ ଭିଜିଲାନ୍ସ ଅଧିକାରୀ। ଚାକିରୀ କାଳ ଭିତରେ ଏମିତି ବିପୁଳ ପରିମାଣର ସମ୍ପତ୍ତି ଠୁଳ କରିଥିବା ଏ ସରକାରୀ ବାବୁ ହେଲେ ଜୟପୁର ବନଖଣ୍ଡର ଡେପୁଟି ରେଂଜର ରାମଚନ୍ଦ୍ର ନେପାକ । ନାଁ ରାମଚନ୍ଦ୍ର କିନ୍ତୁ କାମ...ଆଜି ବାବୁଙ୍କର ଭୁବନେଶ୍ୱର ଏବଂ ଜୟପୁର ସମେତ ୬ଟି ଠିକଣାରେ ଚଢ଼ାଉ କଲା ଭିଜିଲାନ୍ସ । ବାବୁ ରହୁଥିବା କୋରାପୁଟ ଜୟପୁରସ୍ଥିତ ଏ ଘରୁ ଜବତ ହୋଇଛି 4ଟି ସୁନା ବିସ୍କୁଟ ଓ 16ଟି ସୁନା କଏନ ସହ ଦେଢ଼ କେଜି ଓଜନର ସୁନା, 5 କେଜି ରୁପା ଅଳଙ୍କାର ।

ଜୟପୁର NKT ରୋଡ଼ର ଏହି ଘରେ ରାମଚନ୍ଦ୍ର ସପରିବାର ରହୁଥିବା ବେଳେ ପ୍ରସାଦ ରାଓ ପେଟାର Golden Heights apartmentରେ କିଣିଛନ୍ତି ୨ଟି ଫ୍ଳାଟ୍ । ଏହା ମଧ୍ୟରୁ ଗୋଟିଏ ଫ୍ଲାଟରେ ଦୁର୍ନୀତିର ଟଙ୍କା ରଖିବା ପାଇଁ ବାବୁ ରାମଚନ୍ଦ୍ର କରିଥିଲେ ଏ ସ୍ବତନ୍ତ୍ର ଲକର । ଯେଉଁଠାରୁ ଜବତ ହୋଇଛି ଦେଢ଼ କୋଟିରୁ ଅଧିକ ଟଙ୍କା। ଏହି ଘରେ କେହି ରହୁନଥିଲେ ବି ସ୍ବତନ୍ତ୍ର ଚାମ୍ବର କରି ବାବୁ ଟଙ୍କା ରଖୁଥିବା ବେଳେ ଏଠାକାର ସାଜସଜ୍ଜା ବି ଆଖି ଝଲକାଇବା ଭଳି । ଏତିକି ନୁହେଁ ନିଜ ଓ ପରିବାର ଲୋକଙ୍କ ନାଁରେ 4ଟି ବ୍ୟାଙ୍କରେ ରହିଛି 10ଟି ଆକାଉଣ୍ଟ। ଯେଉଁଠି ଡିପୋଜିଟ୍ ଅଛି 1 କୋଟି 32 ଲକ୍ଷ ଟଙ୍କା। ଆହୁରି ବାବୁ କିଣିଥିବା ବହୁ ପରିମାଣର ଚାଷ ଜମି ଓ ପ୍ଳଟ୍ ବି ଠାବ କରିଛି ଭିଜିଲାନ୍ସ । ଆଉ ମାତ୍ର 6 ମାସ ପରେ ଚାକିରିରୁ ଅବସର ନେଇଥାନ୍ତେ ବାବୁ। ଧରାପଡ଼ିବା ପରେ ବଡ଼ ସଫେଇ ବି ଦେଇଛନ୍ତି।

ଦିନକ ତଳେ ଭିଜିଲାନ୍ସ ହାତରେ ଧରାପଡ଼ିଥିଲେ BMCର ଏଜକ୍ୟୁଟିଭ୍ ଇଞ୍ଜିନିୟର ଜଗନ୍ନାଥ ପଟ୍ଟନାୟକ। ଭୁବନେଶ୍ବର ବ୍ରିଟ୍ କଲୋନୀସ୍ଥିତ ଏ 3 ମହଲା କୋଠାରୁ ଜବତ ହୋଇଥିଲା କୁବେର ବାବୁଙ୍କର ଅମାପ ସମ୍ପତ୍ତି । ଆଖି ଖୋସି ହୋଇଯିବା ଭଳି ସୌକିନ ସାମଗ୍ରୀ, 6ଟି ସେଭିଂ ବ୍ୟାଙ୍କ ଆକାଉଣ୍ଟରେ ପ୍ରଚୁର ଟଙ୍କା, ମ୍ୟୁଚୁଆଲ୍ ଫଣ୍ଡରେ 28 ଲକ୍ଷ 44 ହଜାର ଟଙ୍କାର ନିବେଶ, ବ୍ରିଟ୍ କଲୋନୀରେ ଆଉ ଏକ ଘର, ଖଣ୍ଡଗିରି ଅଞ୍ଚଳରେ 3 ମହଲା କୋଠା, ବାଲିଅନ୍ତା ରଣପୁର ମୌଜାରେ ବଡ଼ ୧ ଏକର ୫୭ ଡିସମିଲର ଫାର୍ମ ହାଉସ । ତାର ଦିନକ ପୂର୍ବରୁ ଭିଜିଲାନ୍ସ ହାତରେ ଧରାପଡ଼ି ବନ୍ଧା ହୋଇଥିଲେ କେଉଁଝର କେନ୍ଦୁ ଲିଫ୍ ଡିଭିଜନ DFO ନିତ୍ୟାନନ୍ଦ ନାୟକ । ଯିଏ ଦୁର୍ନୀତି ଟଙ୍କାରେ ପ୍ଲଟ୍ କିଣିବାରେ ଟପିଯାଇଛନ୍ତି ସବୁ ରେକର୍ଡ । ହାତେଇଛନ୍ତି 123ଟି ପ୍ଲଟ୍। କେବଳ ନିତ୍ୟାନନ୍ଦ ନୁହନ୍ତି ବିଜେପି ସରକାରର ଗତ ଏକ ବର୍ଷ ଭିତରେ ଧରାପଡ଼ିଛନ୍ତି ଏମିତି ଅନେକ ପ୍ଲଟ୍ ନିଶାଡ଼ି ଦୁର୍ନୀତିଖୋର ବାବୁ। ଜଳସମ୍ପଦ ବିଭାଗ ସୁପରିଟେଣ୍ଡେଣ୍ଟ ଇଂ ପ୍ରଭାସ ପ୍ରଧାନ ପ୍ଲଟରେ ମାରିଥିଲେ ସେଞ୍ଚୁରୀ ।

ଏକ୍ସାଇଜ୍ ଜଏଣ୍ଟ କମିଶନର ରାମଚନ୍ଦ୍ର ମିଶ୍ରଙ୍କ ନାଁରେ ବାହାରିଥିଲା 52 ପ୍ଲଟ୍ । OBCC ଚିଫ୍ ଇଞ୍ଜିନିୟର ପ୍ରଦୀପ ରଥ ବି ପ୍ଲଟରେ ମାରିଥିଲେ ହାଫ୍ ସେଞ୍ଚୁରୀ। ଦୁର୍ନୀତି ପ୍ରତି ବିଜେପି ସରକାରଙ୍କ ଶୂନ୍ୟ ସହନଶୀଳତା ଖଣ୍ଡାରେ ଶିକାର ହେଲେଣି ଶହେରୁ ଅଧିକ ବଡ଼ ବାବୁ। ଗତ ବର୍ଷକ ଭିତରେ ରାଜ୍ୟର 62 ଜଣ କ୍ଲାସ୍ -1 ଅଫିର ଓ 48 ଜଣ କ୍ଲାସ୍ -2 ଅଫିସରଙ୍କ ବିରୋଧରେ ଭିଜିଲାନ୍ସ ରୁଜୁ କରିଛି ଅପରାଧିକ ମାମଲା ।

Argus News | argus news | Odisha Latest News, Breaking News, Trending News, Live TV