ସାରା ରାଜ୍ୟରେ ପାଳନ ହେଉଛି ରସଗୋଲା ଦିବସ । ତିନିରଥରେ ମହାପ୍ରଭୁଙ୍କୁ ହାଣ୍ଡିରେ ରସଗୋଲା ଅର୍ପଣ କଲେ ହଜାର ହଜାର ଭକ୍ତ । ଭୁବନେଶ୍ବର ପାହାଳରେ ରସଗୋଲା ଦୋକାନରେ ଲୋକଙ୍କ ଭିଡ଼ । କିଣିଲେ ହଜାର ହଜାର ଟଙ୍କାର ମିଠା । ରାଜ୍ୟବାସୀଙ୍କୁ ରସଗୋଲା ଦିବସର ଶୁଭେଚ୍ଛା ଜଣାଇଲେ ମୁଖ୍ୟମନ୍ତ୍ରୀ ଓ କେନ୍ଦ୍ର ଶିକ୍ଷାମନ୍ତ୍ରୀ ।

ଆଜି ରତ୍ନ ସିଂହାସନକୁ ଫେରିବେ ଜଗତରନାଥ ଜଗନ୍ନାଥ । କିନ୍ତୁ ମା ଲକ୍ଷ୍ମୀ ଶାଆନ୍ତାଣି ପରା ଅଭିମାନ କରିଛନ୍ତି । ଲକ୍ଷ୍ମୀ ଶାଆନ୍ତାଣିଙ୍କ ମାନଭଞ୍ଜନ କରିବା ପାଇଁ ମହାପ୍ରଭୁ ଜଗନ୍ନାଥ ଦେବେ ରସଗୋଲା । ଆଉ ଏହି ଆଧାରରେ ଆଜି ସାରା ରାଜ୍ୟରେ ପାଳନ ହୋଇଛି ରସଗୋଲା ଦିବସ । ନିଳାଦ୍ରୀବିଜେରେ ରସଗୋଲା ଦିବସ । କାହିଁକି ନା ରଥଯାତ୍ରା ଯେବେଠୁ, ରସଗୋଲା ସେବେଠୁ ।

ପୁରୀ ବଡ଼ ଦାଣ୍ଡରେ...ରସଗୋଲାର ପସରା ମେଲିଥିଲା । ଭକ୍ତମାନେ ବଡ଼ ବଡ଼ ଓଳି ଓ ହାଣ୍ଡିରେ ରସଗୋଲା କିଣି ମହାପ୍ରଭୁଙ୍କ ନିକଟରେ ସମର୍ପଣ କରୁଛନ୍ତି । ତିନି ରଥ ନିକଟରେ ବହୁ ସଂଖ୍ୟାରେ ଭକ୍ତ ଆଜି ରସଗୋଲା ଭୋଗ କରୁଥିବାର ଦୃଶ୍ୟ ଦେଖିବାକୁ ମିଳିଥିଲା ।

ସେହିଭଳି ଭୁବନେଶ୍ବର ପାହାଳ ଅଂଚଳରେ ରସଗୋଲା ଦୋକାନରେ ଭିଡ ଦେଖିବାକୁ ମିଳିଛି । ରସଗୋଲା ଦିବସ ମନେଇବା ପାଇଁ ଲୋକେ ରସଗୋଲା ବୋହି ନେଇଯାଉଛନ୍ତି । ଅନ୍ୟପଟେ ଅର୍ଗସ କାର୍ଯ୍ୟାଳୟରେ ମଧ୍ୟ ରସଗୋଲା ଦିବସର ସେଲିବ୍ରେସନ କରାଯାଇଛି । ସାମିଲ ହୋଇଥିଲେ ସମସ୍ତ କର୍ମକର୍ତ୍ତା । ସମସ୍ତେ ରସଗୋଲା ଖାଇ ପାଳନ କରିଥିଲେ ରସଗୋଲା ଦିବସ ।

୨୦୧୯ ମସିହାରେ ଓଡ଼ିଶାର ରସଗୋଲାକୁ ଜିଆଇ ଟ୍ୟାଗର ମାନ୍ୟତା ମିଳିସାରିଛି । ମୁଖ୍ୟମନ୍ତ୍ରୀ ମୋହନ ଚରଣ ମାଝି ଏକ୍ସ ହ୍ୟାଣ୍ଡେଲରେ ରାଜ୍ୟବାସୀଙ୍କୁ ରସଗୋଲା ଦିବସର ଶୁଭେଚ୍ଛା ଜଣାଇଛନ୍ତି । କେନ୍ଦ୍ର ଶିକ୍ଷା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ମଧ୍ୟ ସୋସିଆଲ ମିଡିଆ ଏକ୍ସରେ ରାଜ୍ୟବାସୀଙ୍କୁ ରସଗୋଲା ଦିବସ ଉପଲକ୍ଷେ ଶୁଭେଚ୍ଛା ଜଣାଇଛନ୍ତି ।

Argus News | argus news | -Argusnews Home: Odisha Latest News, Breaking News, Trending News, Live TV and more