ସଂଘର୍ଷର ଯନ୍ତ୍ରଣା ଭିତରେ ସଫଳତାର କାହାଣୀ । ଅନ୍ଧକାର ବର୍ତ୍ତମାନକୁ ଉଜ୍ଜଳ ଭବିଷ୍ୟତରେ ପରିଣତ କରିବା ପାଇଁ ସଂଘର୍ଷ କରୁଥିବାବେଳେ ଲକ୍ଷ୍ୟ ପୂରଣ ପାଇଁ ଅର୍ଥ ସାଜିଛି ବାଧକ । ମେଧାବୀ ଛାତ୍ରଙ୍କ ସଂଘର୍ଷ, ବିନା କୋଚିଂରେ ନିଟ୍ ପରୀକ୍ଷାରେ ମିଳିଛି ସଫଳତା । କେବଳ ୟୁଟ୍ୟୁବରୁ ପାଠପଢ଼ି ନିଟ୍ ପରୀକ୍ଷାରେ ହୋଇଛନ୍ତି କୃତକାର୍ଯ୍ୟ । ହେଲେ ବ୍ୟୟ ବହୁଳ ଡାକ୍ତରୀ ଶିକ୍ଷା ପାଇଁ ଅର୍ଥ ସାଜିଛି ବାଧକ ।

ନବରଙ୍ଗପୁର ଜିଲ୍ଲା ତେନ୍ତୁଳିଖୁଣ୍ଟି ସଦର ବ୍ଲକ ଭତରା ସାହିରେ ରହୁଥିବା ଧବଳେଶ୍ୱର ପୂଜାରୀ । ତିନି ବର୍ଷ ବୟସରେ ବାପା ଘର ଛାଡି କେଉଁ ଆଡେ ଚାଲି ଯାଇଥିବାବେଳେ ମାଆ କାଞ୍ଚନ ପୂଜାରୀ ପର ଘରେ ମୁଲ ଲାଗି ପୁଅଙ୍କୁ ଦଶମ ଶ୍ରେଣୀ ପର୍ଯ୍ୟନ୍ତ ପାଠ ପଢ଼େଇଥିଲେ । ଦଳେଶ୍ୱର ମାଟ୍ରିକ ପରୀକ୍ଷାରେ ୮୦ ପ୍ରତିଶତ ନମ୍ବର ରଖିବା ସତ୍ୱେ ଅର୍ଥ ଅଭାବ ଯୋଗୁଁ କୌଣସି କଲେଜରେ ନାମ ଲେଖାଇବା ପାଇଁ ଅକ୍ଷମ ଥିଲେ । ଅନ୍ୟପଟେ କୋଶାଗୁମୁଡା ବ୍ଲକର ଜଣେ ସ୍ୱେଚ୍ଛାସେବୀ ମଳୟ ପାଣିଗ୍ରାହୀ ଦଳେଶ୍ୱରଙ୍କ ବିଷୟରେ ଅବଗତ ହେବା ପରେ ସହାୟତାର ହାତ ବଢ଼ାଇ ନିଜସ୍ୱ ଖର୍ଚ୍ଚରେ ଯୁକ୍ତ ୨ ବିଜ୍ଞାନ ପାଠ ପଢ଼େଇଥିଲେ । ଏଥିରେ ୮୮ ପ୍ରତିଶତ ନମ୍ବର ରଖି ଦଳେଶ୍ୱର କୃତିତ୍ୱ ହାସଲ କରିଥିଲେ ।

ଉଚ୍ଚ ଶିକ୍ଷା ନେଇ ମନରେ ପ୍ରବଳ ଆଗ୍ରହ ଥିଲେ ମଧ୍ୟ ଅର୍ଥ ଅଭାବ ଯୋଗୁଁ ଆନ୍ଧ୍ରପ୍ରଦେଶକୁ ଦାଦନ ଖଟିବାକୁ ଯାଇଥିଲେ । ନିଜ ରୋଜଗାର ଟଙ୍କାରେ ବହି ଖାତା ଓ ସ୍ମାର୍ଟ ଫୋନ କିଣି ନିଟ୍ ପରୀକ୍ଷା ପାଇଁ ପ୍ରସ୍ତୁତ ହୋଇଥିଲେ । ବିନା କୌଣସି କୋଚିଂରେ କେବଳ ୟୁଟ୍ୟୁବରୁ ନିଟ୍ ପରୀକ୍ଷା ପାଇଁ ପ୍ରସ୍ତୁତି ଆରମ୍ଭ କରିଥିଲେ । ଯାହାକି ଦଳେଶ୍ୱରଙ୍କୁ ସଫଳତା ମିଳିଛି । ପ୍ରଥମ ଓ ଦ୍ଵିତୀୟ ପ୍ରୟାସରେ ବିଫଳ ହୋଇଥିବାବେଳେ ତୃତୀୟ ପ୍ରୟାସରେ ଦଳେଶ୍ୱର ୩୭୬ ନମ୍ବର ରଖି ସଫଳତା ପାଇଛନ୍ତି । ଷ୍ଟେଟ ରେଙ୍କ ୩୮୫୮ ରଖି କୃତିତ୍ୱ ହାସଲ କରିଛନ୍ତି । ଇତି ମଧ୍ୟରେ କାଉଁସିଲିଂ ଶେଷ ହୋଇଥିବା ବେଳେ ଦଳେଶ୍ୱରଙ୍କୁ କୋରାପୁଟ ମେଡିକାଲ କଲେଜରେ ସିଟ୍ ମିଳିଛି । ଦୁଃଖ ଓ ପରିତାପର ବିଷୟ ମେଡିକାଲ କଲେଜ ରେ ଆଡ଼ମିସନ ପାଇଁ ଦଳେଶ୍ୱର ଙ୍କ ନିକଟରେ ଅର୍ଥ ନାହିଁ। ପାଠପଢା ପାଇଁ ହାରାହାରି ୭ ଲକ୍ଷ ରୁ ଉର୍ଦ୍ଧ ଟଙ୍କା ଖର୍ଚ୍ଚ ହେବାକୁ ଥିବାବେଳେ କୋଉଠୁ ଏତେ ଟଙ୍କା ଯୋଗାଡ଼ କରିବେ ଏବଂ ଡାକ୍ତର ହେବେ ସେନେଇ ଚିନ୍ତାରେ ପଢିଛନ୍ତି ଦଳେଶ୍ୱର ।

ଜିଲ୍ଲା ପ୍ରଶାସନ ଓ ରାଜ୍ୟ ସରକାର ଦଳେଶ୍ୱରଙ୍କ ଡାକ୍ତରୀ ପାଠପଢା ଦାୟିତ୍ୱ ନେଲେ ଜଣେ ଗରିବ ମେଧାବୀ ଛାତ୍ରଙ୍କ ଭବିଷ୍ୟତ ଉଜ୍ୱଳମୟ ହୋଇପାରନ୍ତା ବୋଲି ପାଇଁ ବୁଦ୍ଧିଜୀବୀ ମହଲରେ ମତ ଉଠୁଛି ।