ନିର୍ବାଚନ ପ୍ରଚାର ବେଳେ ପ୍ରଧାନମନ୍ତ୍ରୀ ଆଉ ନିର୍ବାଚନ ପରେ ବିଜେପି ସରକାର ହେବା ପରେ ମୁଖ୍ୟମନ୍ତ୍ରୀ ବାରମ୍ବାର ଚେତାଇଛନ୍ତି, ଦୁର୍ନୀତିଖୋର ସୁଧୁରି ଯାଆନ୍ତୁ ନହେଲେ ବନ୍ଧା ହୋଇ ଜେଲ୍ ଯିବେ । କିନ୍ତୁ ବିଜେଡି ଶାସନର ସୁରକ୍ଷା ବଳୟରେ ରହିଥିବା ଦୁର୍ନୀତିଗ୍ରସ୍ତ ଅଫିସରଙ୍କ ଅଭ୍ୟାସ ବଦଳିବାର ନାଁ ନେଉନାହିଁ। ପରିଣାମ ହେଲା ଭିଜିଲାନ୍ସ ହାତରେ ବନ୍ଧା ହେଉଛନ୍ତି ରାଜ୍ୟର ବଡ଼ ବଡ଼ ଅଫିସର । ଆଉ ଏଥର ତ ଗିରଫ ହୋଇଛନ୍ତି ବଡ଼ ମାଛ । ଧର୍ମଗଡ଼ ଉପଜିଲ୍ଲାପାଳ IAS ଅଫିସର ଧୀମାନ ଚାକମା। ୧୦ ଲକ୍ଷ ଟଙ୍କା ଲାଞ୍ଚ ନେବା ବେଳେ ଧରାପଡ଼ିଲେ, ଘରେ ଚଢ଼ାଉ ହେଲା ତ ଜବତ ହେଲା ୪୭ ଲକ୍ଷ ଟଙ୍କା।

ଜେଲ ଗଲେ ଧର୍ମଗଡ଼ ଉପଜିଲ୍ଲାପାଳ ଧୀମାନ ଚକମା । କୋର୍ଟ ଚାଲାଣ ପରେ ଜାମିନ ନାମଞ୍ଜୁର ହେବାରୁ ଭବାନୀପାଟଣା ଜେଲ୍ ଗଲେ ଧୀମାନ ଚକମା । ବ୍ୟବସାୟୀଙ୍କଠୁ ୧୦ଲକ୍ଷ ଟଙ୍କା ଲାଞ୍ଚ ନେବା ସମୟରେ ଭିଜିଲାନ୍ସ ଜାଲରେ ଫସିଥିଲେ । ପରେ IAS ଅଫିସରଙ୍କ ଘରେ ଚଢାଉ କରିଥିଲା ଭିଜିଲାନ୍ସ । ତାଙ୍କ ସରକାରୀ କ୍ବାର୍ଟର୍ସରୁ ମିଳିଥିଲା ନଗଦ ୪୭ ଲକ୍ଷ ଟଙ୍କା । ଭବାନୀପାଟଣା ଉପ ଆରକ୍ଷୀ ଅଧିକ୍ଷକ ଭିଜିଲାନ୍ସ ଅଫିସରେ ଉପଜିଲ୍ଲାପାଳଙ୍କୁ ଜେରା ପରେ ଭିଜିଲାନ୍ସ ତାଙ୍କୁ ଗିରଫ କରିଥିଲା । ଜୟପାଟଣାର ଜଣେ କ୍ରସର ମାଲିକଙ୍କଠୁ ୨୦ଲକ୍ଷ ଟଙ୍କା ଲାଞ୍ଚ ମାଗିଥିଲେ । ଲାଞ୍ଚ ନଦେଲେ କାର୍ଯ୍ୟାନୁଷ୍ଠାନ ନିଆଯିବାର ଧମକ ଦେଉଥିଲେ ଧର୍ମଗଡ଼ ଉପଜିଲ୍ଲାପାଳ । ୨୦୨୧ ବ୍ୟାଚ୍‌ର ଓଡ଼ିଶା କ୍ୟାଡର୍‌ IAS ଚକମାଙ୍କ ଘର ପୂର୍ବୋତ୍ତର ରାଜ୍ୟ ତ୍ରିପୁରାର ଏକ ଆଭ୍ୟନ୍ତରୀଣ ଅଞ୍ଚଳ କାଞ୍ଚନପୁରରେ ।