Dharmendra Pradhan / ୨୦୦୦ ବର୍ଷର ପ୍ରାଚୀନ 'ଅସୁରଗଡ଼' ପ୍ରତ୍ନତାତ୍ତ୍ୱିକ ସ୍ଥଳୀ ପରିଦର୍ଶନ କଲେ ଧର୍ମେନ୍ଦ୍ର ପ୍ରଧାନ

ବରଗଡ଼: ସମ୍ବଲପୁର ସାଂସଦ ତଥା ପୂର୍ବତନ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଆଜି ବରଗଡ଼ ଜିଲ୍ଲା ଗସ୍ତ ଅବସରରେ ବିଭିନ୍ନ ଐତିହ୍ୟ, ଐତିହାସିକ ଏବଂ ପର୍ଯ୍ୟଟନ ସ୍ଥାନ ପରିଦର୍ଶନ କରିଛନ୍ତି । ବରପାଲି ନିକଟସ୍ଥ ପ୍ରାୟ ୨୦୦୦ ବର୍ଷର ପ୍ରାଚୀନ 'ଅସୁରଗଡ଼' ପ୍ରତ୍ନତାତ୍ତ୍ୱିକ ସ୍ଥଳୀ ଦେଖିବା ସହ ଉପସ୍ଥିତ ଜିଲ୍ଲା ପ୍ରଶାସନିକ ଅଧିକାରୀ, ଭାରତୀୟ ପ୍ରତ୍ନତାତ୍ତ୍ୱିକ ସର୍ବେକ୍ଷଣ(ଏଏସଆଇ) ଅଧିକାରୀ ଏବଂ ଗଙ୍ଗାଧର ମେହେର ବିଶ୍ୱବିଦ୍ୟାଳୟର ଗବେଷକ ଓ ଛାତ୍ରଛାତ୍ରୀଙ୍କ ସହ ବିସ୍ତୃତ ଆଲୋଚନା କରିଛନ୍ତି ଧର୍ମେନ୍ଦ୍ର ପ୍ରଧାନ ।

ଏଥସହ ଖୋଦନରୁ ମିଳିଥିବା ପ୍ରଶସ୍ତ ଐତିହାସିକ ଅବଶେଷ ଓ ପ୍ରାଚୀନ ସଭ୍ୟତାର ପ୍ରମାଣଗୁଡ଼ିକୁ ପ୍ରତ୍ୟକ୍ଷ ଭାବେ ନିରୀକ୍ଷଣ କରିଛନ୍ତି । ଏହି ଅବସରରେ ଧର୍ମେନ୍ଦ୍ର ପ୍ରଧାନ କହିଛନ୍ତି ଯେ, "ବରପାଲିର ଅନତି ଦୂରରେ ଅବସ୍ଥିତ ଏହି 'ଅସୁରଗଡ଼' ପ୍ରାୟ ୨୦୦୦ ବର୍ଷରୁ ଊର୍ଦ୍ଧ୍ୱ ପୁରାତନ । ଏହି ପ୍ରାଚୀନ ସ୍ଥଳୀ ଆମ ସମୃଦ୍ଧ ସଂସ୍କୃତି, କଳା ଓ ସଭ୍ୟତାର ଏକ ଅନନ୍ୟ ଗନ୍ତାଘର । ପ୍ରାଚୀନ ସଭ୍ୟତାରେ ହରପ୍ପା ଓ ମୋହେଞ୍ଜୋଦାରୋ ଭଳି ଅବିଭକ୍ତ ସମ୍ବଲପୁର ଅଞ୍ଚଳରେ ଅନେକ ଐତିହାସିକ ପ୍ରତ୍ନତାତ୍ତ୍ୱିକ ଧରୋହର ରହିଛି । ଅସୁରଗଡ଼, ଭୀମମଣ୍ଡଳୀ ଭଳି ଅଞ୍ଚଳଗୁଡ଼ିକରେ କାଳଜୟୀ ସଭ୍ୟତାର ଅନେକ ପ୍ରମାଣ ବିଦ୍ୟମାନ ।"

ସାଂସଦ ଧର୍ମେନ୍ଦ୍ର ପ୍ରଦାନ କହିଛନ୍ତି, "୨୦୨୨ ମସିହାରେ ଭାରତ ସରକାରଙ୍କ ସଂସ୍କୃତି ବିଭାଗକୁ ପତ୍ର ଲେଖି ଏହି ସ୍ଥାନର ସର୍ବେକ୍ଷଣ ପାଇଁ ଅନୁରୋଧ କରିଥିଲି । ଗଙ୍ଗାଧର ମେହେର ବିଶ୍ୱବିଦ୍ୟାଳୟର ସହଯୋଗ ଓ ଏଏସଆଇର ଉଦ୍ୟମରେ ଏଠାରେ ଖୋଦନ କାର୍ଯ୍ୟ କରାଯାଇ ବୈଜ୍ଞାନିକ ପ୍ରମାଣ ସବୁ ସଂଗ୍ରହ କରାଯାଇଛି । ଆଗାମୀ ଦିନରେ ଏଏସଆଇ, ଗଙ୍ଗାଧର ମେହେର ବିଶ୍ୱବିଦ୍ୟାଳୟ ଓ ସ୍ଥାନୀୟ ଶିକ୍ଷାନୁଷ୍ଠାନଗୁଡ଼ିକର ମିଳିତ ପ୍ରଚେଷ୍ଟାରେ ଏହି ଗବେଷଣା, ଅନୁସନ୍ଧାନ ଓ ଖୋଦନ କାର୍ଯ୍ୟକୁ ଆହୁରି ବ୍ୟାପକ କରାଯିବ ।"

ସେ ଆହୁରି ମଧ୍ୟ ପ୍ରକାଶ କରିଛନ୍ତି ଯେ, ଡବଲ ଇଞ୍ଜିନ ସରକାରଙ୍କ ମିଳିତ ସହଯୋଗରେ ଆମର ଏହି ପ୍ରାଚୀନ ଐତିହ୍ୟକୁ ଲୋକଲୋଚନକୁ ଆଣିବା ଦ୍ୱାରା ଛାତ୍ରଛାତ୍ରୀଙ୍କ ମଧ୍ୟରେ ଇତିହାସ ବୋଧ ଓ ସଭ୍ୟତା ବୋଧ ବୃଦ୍ଧି ପାଇବ । ଏହାଦ୍ୱାରା ଏହି ଅଞ୍ଚଳରେ ପର୍ଯ୍ୟଟନର ବ୍ୟାପକ ସମ୍ଭାବନା ସୃଷ୍ଟି ହେବା ସହ ସ୍ଥାନୀୟ ଆର୍ଥ-ସାମାଜିକ ପ୍ରଗତିକୁ ନୂତନ ଦିଶା ମିଳିବ । ଆମର ଏହି ଗୌରବମୟ ଐତିହ୍ୟକୁ ସଂରକ୍ଷିତ ରଖିବା ଓ ଆଗାମୀ ପିଢ଼ି ନିକଟରେ ପହଞ୍ଚାଇବା ଆମ ସମସ୍ତଙ୍କର ମିଳିତ ଦାୟିତ୍ୱ ।

ଏଥିସହ ପଢ଼ନ୍ତୁ: ସମ୍ବଲପୁର ହେବ ‘ସ୍କିଲ୍ ଲ୍ୟାବ୍’, ଗାଁ ଗାଁରେ ତିଆରି ହେବେ କଣ୍ଟେଣ୍ଟ କ୍ରିଏଟର- ଧର୍ମେନ୍ଦ୍ର ପ୍ରଧାନ 

ବରପାଲି ଗସ୍ତ ଅବସରରେ ଓଡ଼ିଆ ସାହିତ୍ୟର ଅମର ସାଧକ ସ୍ୱଭାବ କବି ଗଙ୍ଗାଧର ମେହେରଙ୍କ ପବିତ୍ର ଜନ୍ମପୀଠ ପରିଦର୍ଶନ କରିବା ସହ ତାଙ୍କ ପ୍ରତିମୂର୍ତ୍ତିରେ ଶ୍ରଦ୍ଧାଞ୍ଜଳି ଅର୍ପଣ କରିଛନ୍ତି । ସାଂସଦ କହିଛନ୍ତି, "ବରପାଲି ସ୍ଥିତ ‘ସ୍ୱଭାବ କବି ଗଙ୍ଗାଧର ମେହେର ଜନ୍ମପୀଠ’ ଓ କବି ଭବନ ପରିଦର୍ଶନ କରିବାର ସୌଭାଗ୍ୟ ଲାଭ କଲି । ଏହି ପବିତ୍ର ଜନ୍ମପୀଠରେ କବିଙ୍କର କାଳଜୟୀ କାବ୍ୟ-ସୃଜନଶୀଳତା ଓ ମହାନ ସଂସ୍କାର ଆଜି ବି ଉଜ୍ଜୀବିତ ହୋଇ ରହିଛି । ଏହି ଜନ୍ମପୀଠ ଆମ ସଂସ୍କୃତି ଓ ଅସ୍ମିତାର ଏକ ମହାନ ସ୍ୱାକ୍ଷର ଓ ଚିରନ୍ତନ ପ୍ରେରଣାର ସ୍ରୋତ । ଓଡ଼ିଆ ସାହିତ୍ୟ ଓ ସଂସ୍କୃତି ପ୍ରତି ତାଙ୍କର ଅମୂଲ୍ୟ ଅବଦାନ ଚିର ସ୍ମରଣୀୟ ହୋଇରହିବ ।" ଏହା ପୂର୍ବରୁ ଧର୍ମେନ୍ଦ୍ର ପ୍ରଧାନ ବରପାଲି ଠାରେ ମହାତ୍ମା ଗାନ୍ଧୀଙ୍କ ପ୍ରତିମୂର୍ତ୍ତିରେ ମଧ୍ୟ ମାଲ୍ୟାର୍ପଣ କରିଥିଲେ ।

ଏହି ଗସ୍ତ ଅବସରରେ ସାଂସଦ ଡେବ୍ରୀଗଡ଼ ବନ୍ୟପ୍ରାଣୀ ଅଭୟାରଣ୍ୟ ବୁଲି ଦେଖିବା ସହ ଏଠାକୁ ଆସିଥିବା ପର୍ଯ୍ୟଟକମାନଙ୍କ ସହ ସୌଜନ୍ୟମୂଳକ ଆଲୋଚନା କରିଥିଲେ । ଏହାପରେ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ 'ମନ୍ କି ବାତ୍' କାର୍ଯ୍ୟକ୍ରମରେ ପ୍ରଶଂସିତ ଡେବ୍ରୀଗଡ଼ର 'ଧୋଡ଼୍ରୋକୁସୁମ୍' ଗ୍ରାମକୁ ଯାଇ ପ୍ରକୃତି ହୋମ-ଷ୍ଟେ ବୁଲିବା ସହ ସ୍ଥାନୀୟ ମୈଥିଲୀ ଭୁଏଙ୍କ ଘରକୁ ଯାଇ ଆଲୋଚନା କରିଥିଲେ ।

ଏହି ଅବସରରେ ସାଂସଦ ଧର୍ମେନ୍ଦ୍ର ପ୍ରଧାନ କହିଛନ୍ତି ଯେ, 'ଧୋଡ଼୍ରୋକୁସୁମ୍' ଭଳି ଅଭିନବ ପ୍ରକୃତି ହୋମ-ଷ୍ଟେ ପରିକଳ୍ପନା ରାଜସ୍ୱ ବୃଦ୍ଧି ସମେତ ସ୍ଥାନୀୟ ଜନସାଧାରଣଙ୍କ ସାମାଜିକ ଓ ଆର୍ଥିକ ସଶକ୍ତିକରଣ କ୍ଷେତ୍ରରେ ଏକ ଅନନ୍ୟ ଉଦାହରଣ ସୃଷ୍ଟି କରିଛି । ପୂର୍ବରୁ ଜଙ୍ଗଲ ଉପରେ ନିର୍ଭର କରୁଥିବା ଏହି ମହିଳାମାନେ ବର୍ତ୍ତମାନ 'ଡେବ୍ରୀଗଡ଼ ଇକୋ-ଟୁରିଜମ୍' ସହ ଯୋଡ଼ିହୋଇ ପ୍ରକୃତି ସୁରକ୍ଷା ସହ ନିଜର ଜୀବିକା ଅର୍ଜନ କରୁଛନ୍ତି ।

ବନ୍ୟପ୍ରାଣୀ ସଂରକ୍ଷଣ, ଗ୍ରାମାଞ୍ଚଳର ବିକାଶ ଓ ସ୍ଥାନୀୟ ମହିଳାମାନଙ୍କୁ ସ୍ୱାବଲମ୍ବୀ କରିବାରେ ଏହି ଗ୍ରାମବାସୀଙ୍କ ପ୍ରଶଂସନୀୟ ଉଦ୍ୟମକୁ 'ମନ୍ କି ବାତ୍' ମାଧ୍ୟମରେ ଜାତୀୟ ସ୍ତରରେ ସ୍ୱତନ୍ତ୍ର ପରିଚୟ ଦେଇଥିବାରୁ ସାଂସଦ ଧର୍ମେନ୍ଦ୍ର ପ୍ରଧାନ, ପ୍ରଧାନମନ୍ତ୍ରୀଙ୍କୁ ଧନ୍ୟବାଦ ଜଣାଇଛନ୍ତି । ପରିବେଶ ସୁରକ୍ଷା ସହ ଆତ୍ମନିର୍ଭରଶୀଳ ହେବାର ଏହି ପ୍ରୟାସ ସମଗ୍ର ସମାଜ ପାଇଁ ଏକ ପ୍ରେରଣାର ସ୍ରୋତ ବୋଲି ଧର୍ମେନ୍ଦ୍ର ପ୍ରଧାନ ପ୍ରକାଶ କରିଛନ୍ତି ।