କେନ୍ଦୁଝର: ପର୍ଯ୍ୟଟକ ପାଇଁ ଖୁସି ଖବର । ଘଟଗାଁ ମା' ତାରିଣୀଙ୍କ ମନ୍ଦିର ପରିସରରୁ ଉଦଘାଟିତ ହେଲା ଜିଲ୍ଲାର ପ୍ରଥମ ଜଙ୍ଗଲ ସଫାରୀ । ଏଥର ପର୍ଯ୍ୟଟକଙ୍କୁ ନୂଆବର୍ଷ ଭେଟି ଦେଲା କେନ୍ଦୁଝର ଜିଲ୍ଲାର ଅଟେଇ ସଂରକ୍ଷିତ ଜଙ୍ଗଲ । କେନ୍ଦୁଝର ଜିଲ୍ଲା ବନ ବିଭାଗ ପକ୍ଷରୁ ପର୍ଯ୍ୟଟକଙ୍କୁ ଆକୃଷ୍ଟ କରିବା ସହିତ ଜଙ୍ଗଲ ସଫାରୀର ଅନୁଭୂତି ସାଉଁଟିବା ପାଇଁ ସ୍ବତନ୍ତ୍ର ସଫାରୀ ଗାଡ଼ିରେ ପର୍ଯ୍ୟଟକମାନଙ୍କୁ ବୁଲିବାର ବ୍ୟବସ୍ଥା କରିଛି ବନବିଭାଗ । ଅଟେଇ ସଂରକ୍ଷିତ ଜଙ୍ଗଲର ୧୬ ହଜାର ହେକ୍ଟର ଅଞ୍ଚଳରେ ରହିଛି ଏହି ଜଙ୍ଗଲ ସଫାରୀ ।

କେନ୍ଦୁଝର ସାଂସଦ ଅନନ୍ତ ନାୟକ ମୁଖ୍ୟ ଅତିଥି ଭାବରେ ଯୋଗ ଦେଇ ଏହି ଜଙ୍ଗଲ ସଫାରୀର ଉଦଘାଟନ କରିଛନ୍ତି । ଆଜି ସକାଳ ୧୦ ଟା ସମୟରେ ଘଟଗାଁ ମା' ତାରିଣୀ ମନ୍ଦିରରେ ସଫାରୀ ଟିକେଟ୍ ବୁକିଂ କାଉଣ୍ଟରର ଉଦଘାଟନ କରିବା ସହିତ ସଫାରୀ ଗାଡ଼ି ଗୁଡ଼ିକୁ ପୂଜାର୍ଚ୍ଚନା କରିଥିଲେ । ପରେ ଗାଡ଼ି ଗୁଡ଼ିକ ଅଟେଇ ଜଙ୍ଗଲ ସଫାରୀ ମୁହାଁ ହୋଇଥିଲା । ତେବେ ମୂର୍ଗାପାହାଡ ଠାରେ ଏହି ଅଟେଇ ଜଙ୍ଗଲ ସଫାରୀର ପ୍ରବେଶ ଗେଟ୍ ରହିଥିବା ବେଳେ ଜଙ୍ଗଲ ଭିତରେ ପାଖାପାଖି ୪୦ କିଲୋମିର ଯାତ୍ରା କରିବେ ପର୍ଯ୍ୟଟକ । ସେହି ୪୦ କିଲୋମିଟର ଯାତ୍ରା ଭିତରେ ପର୍ଯ୍ୟଟକଙ୍କୁ ଆକର୍ଷିତ କରି ମୟୂର ଭ୍ୟାଲି, ୱାଚ ଟାୱାର, ଭିଉ ପଏଣ୍ଟ ଏବଂ ଶେଷରେ ଦରଗଡଶିଳା ଜଳାଶୟ । ପରେ ସେଠାରୁ ଯାଇ କାଦୁଅବହାଲି ଗାଁ ନିକଟରେ ଏହି ଅଟେଇ ଯାତ୍ରା ଶେଷ ହେବ । ପାଖାପାଖି ତିନି ଘଣ୍ଟାର ଯାତ୍ରା । ଟିକେଟ୍ ଗୁଡ଼ିକୁ ଅଫ୍ ଲାଇନ୍ ବୁକିଙ୍ଗ କରିବେ ।

ଟିକେଟ ବୁକିଂ କାଉଣ୍ଟର ମା' ତାରିଣୀ ମନ୍ଦିର ପରିସରରେ କରାଯାଇଥିବାବେଳେ ସକାଳ ୬ ଟାରୁ ୯:୩୦ ମଧ୍ୟରେ ବୁକିଂ କରିବେ । ଟିକେଟ୍ ମୂଲ୍ୟ ନନ୍ ଏ.ସି ଗାଡ଼ି ପାଇଁ ୨୦୦ ଟଙ୍କା ଏବଂ ଏ.ସି ଗାଡ଼ି ପାଇଁ ୨୫୦ ଟଙ୍କା ରଖାଯାଇଛି । ତେବେ ବର୍ତ୍ତମାନ ପର୍ଯ୍ୟନ୍ତ ତିନୋଟି ଗାଡ଼ି କାର୍ଯ୍ୟରତ ରହିବ । ଗୋଟିଏ ଏ.ସି ଏବଂ ଦୁଇଟି ନନ୍ ଏ.ସି ଗାଡ଼ି । ତେବେ ସଫାରୀ ଗାଡ଼ିରେ ବସି ବନ୍ୟଜନ୍ତୁ ଦେଖିବାର ମଜା ନେବେ ପର୍ଯ୍ୟଟକ । ଏପରିକି ଜଙ୍ଗଲ ସଫାରୀ ହୋଇଥିବା ନେଇ ବନ ବିଭାଗକୁ ଧନ୍ୟବାଦ ଦେଇଛନ୍ତି ସାଂସଦ ଅନନ୍ତ ନାୟକ ।

Argus News | argus news | Odisha Latest News, Breaking News, Trending News, Live TV