ପ୍ରାୟ ୭୨ ଘଣ୍ଟାର ଛାନଭିନ ପରେ ମାଆ କୋଳକୁ ଫେରିଛି ଶୁଭମ । ଛୁଆକୁ ପାଇ ଭାବବିହ୍ୱଳ ହୋଇପଡିଲେ ମା । ଛୁଆକୁ ଫେରି ପାଇବି ବୋଲି ଭାବି ନଥିଲି । ପ୍ରଭୁ ଶ୍ରୀରାମଙ୍କ ଆଶୀର୍ବାଦରୁ ଛୁଆକୁ ଫେରି ପାଇଛି ବୋଲି କହିଛନ୍ତି ଦୃଷ୍ଟିବାଧିତ ମହିଳା ଜୟନ୍ତୀ ମଲ୍ଲିକ । କ୍ୟାପିଟାଲ ହସ୍ପିଟାଲରେ ଚିକିତ୍ସା ପରେ ମାଆକୁ ଶିଶୁପୁତ୍ର ହସ୍ତାନ୍ତର କରାଯାଇଛି । ସେହି ମୁହୂର୍ତ୍ତ ଥିଲା ଅବର୍ଣ୍ଣନୀୟ । ଛୁଆକୁ କୁଣ୍ଢାଇ ନିଜ ଲୁହ ସମ୍ଭାଳି ପାରିନଥିଲେ ମା । ଗେଲ କରି ଭୋ ଭୋ ହୋଇ କାନ୍ଦିବାକୁ ଲାଗିଥିଲେ । ଏପରିକି ମନ୍ଦିର ପୂଜକ...ପାଖ ଦୋକାନୀ ସମସ୍ତେ ଛୁଆ ମିଳିବା ପରେ ଖୁସି ହେବା ସହ ଭାବବିହ୍ୱଳ ହୋଇପଡିଛନ୍ତି ।

ଶନିବାର ବିଳମ୍ବିତ ରାତିରେ ମାଆ କୋଳରୁ ଶିଶୁକୁ ଅପହରଣ କରିଥିଲା ଦୁର୍ବୃତ୍ତ କେଦାରସନ ପଣ୍ଡା । ସିସିଟିଭି ଫୁଟେଜ ଆଧାରରେ ବିଭିନ୍ନ ସ୍ଥାନରେ ଚଢଉ କରିଥିଲା ପୋଲିସ । କଠିନ ଅପରେସନ ପାଇଁ କମିଶନରେଟ୍ ପୋଲିସର ହୋଇଥିଲା ସ୍ବତନ୍ତ୍ର ରଣନୀତି । ତୁରନ୍ତ ନିଖୋଜ ଶିଶୁକୁ ଠାବ ପାଇଁ ନିର୍ଦ୍ଦେଶ ଦେଇଥିଲେ ମୁଖ୍ୟମନ୍ତ୍ରୀ । ଶିଶୁ ଅପହରଣ ସ୍ପର୍ଶକାତର ଘଟଣା ହୋଇଥିବାରୁ ଥିଲା ବଡ ଚ୍ୟାଲେଂଜ।

ପୋଲିସ କମିଶନର କହିଛନ୍ତି , ସମସ୍ତଙ୍କୁ ଏ ଘଟଣା ବ୍ୟଥିତ କରିଥିଲା । ମୁଖ୍ୟମନ୍ତ୍ରୀ ଏ ଘଟଣା ବିଷୟରେ ଜାଣିବା ପରେ ଯଥା ଶୀଘ୍ର ଆରେଷ୍ଟ ଓ ଉଦ୍ଧାର ପାଇଁ ନିର୍ଦେଶ ଦେଇଥିଲେ । ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ଲଗାତାର ଆମ ସହ ସମ୍ପର୍କରେ ଥିଲେ । କାଲି ରାତିରେ ବିଭିନ୍ନ ଜାଗାରେ ଚଢ଼ାଉ ବେଳେ ମହିଳାଙ୍କ ନିକଟରୁ ଭଦ୍ରକ ଅଞ୍ଚଳରେ ଠାବ ହେଲା । ପରେ ବାଲେଶ୍ଵର ଅଞ୍ଚଳରେ ମଧ୍ୟ ଚଢ଼ାଉ କରା ଗଲା । କେଦାରସନକୁ ପୁରୀ ଅଞ୍ଚଳରୁ କାବୁ କରାଗଲା ।

ଅପହରଣ ପରେ ଶିଶୁ ପୁତ୍ରକୁ ଝିଅ ଡ୍ରେସ ପିନ୍ଧେଇ ଦେଇଥିଲେ ଅଭିଯୁକ୍ତ । ଚୁଟି କାଟି ଦେବା ସହ ଘରେ ଝିଅ ବୋଲି କହୁଥିଲେ । ପରେ ଅଭିଯୁକ୍ତ କେଦାରସନ ପଣ୍ଡା ପୁରି ପ୍ରାୟଶ୍ଚିତ ପାଇଁ ଆସିଥିବା ବେଳେ ପୋଲିସ ମାଡି ବସିଥିଲା । ଅଭିଯୁକ୍ତ ନାଁରେ 3ଟି ଚୋରି ମାମଲା ରହିଛି । ଅଙ୍ଗ ତସ୍କରି ନେଇ କୌଣସି ସୁରାକ ମିଳିନି । ଆପାର୍ଟମେଣ୍ଟରେ ସିକ୍ୟୁରିଟି ଗାର୍ଡ ଭାବେ ମଧ୍ୟ କାମ କରୁଥିଲା କେଦାରସନ ।

Argus News: ଓଡ଼ିଶାର ଖବର | Breaking News, ରାଜନୀତି, କ୍ରୀଡ଼ା ଓ Live TV