କଟକ: ମୁଁ ଗୋଟିଏ କୁକୁର... ମୋର ସ୍ଵଭାବ ହେଲା ମୋତେ ଯିଏ ସ୍ନେହ କରେ ମୁଁ ତା ବିଶ୍ଵସ୍ତ ହୋଇଯାଏ । ପ୍ରତି ମୁହୂର୍ତ୍ତରେ ମୋ ମାଲିକକୁ ମୋ ପ୍ରାଣଠୁ ଅଧିକ ଭଲ ପାଏ । ସେ ସାପକୁ ହେଉ କି ଅନ୍ୟ କୌଣସି ଅଜଣା ବିପଦ ସବୁବେଳେ ମୋ ପ୍ରାଣ ମୋ ମାଲିକ ପାଇଁ ସମର୍ପିତ ଥାଏ । ମୋ ପାଇଁ ମୋ ମାଲିକ ଜୀବନ ଆଗ, ଆଉ ସବୁ ପଛ...

ବିଦ୍ୟୁତ୍ ତାର ଲାଗି କୁକୁରଟିର ମୃତ୍ୟୁ ପରେ ତା ଆତ୍ମା ଏବେ ଏମିତି କିଛି କହୁଛି । ଦିନେ ଭୋ.. ଭୋ... କରି ଭୁକୁଥିବା କୁକୁରଟି ଆଜି ସିନା ଭୂମିରେ ଲୋଟି ପଡ଼ିଛି । ହେଲେ ତା ମରଶରୀର ବଖାଣୁଛି ମଣିଷ କେମିତି ତା ସ୍ଵାର୍ଥ୍ଵ ପାଇଁ ନିରୀହ ଜୀବଟିକୁ ମାରି ଦେଇଛି । ଶରୀର ନ ଥିବା ପ୍ରାଣ କହୁଛି, ମୁଁ ଚୋର ନଥିଲି... ମୁଁ ତ ଥିଲି ତମ ଜଗୁଆଳ... ।

କଟକ ଶଙ୍କରପୁର ପରିଡ଼ାସାହିରେ ବିଦ୍ୟୁତ ତାର ଲାଗି ଗୋଟିଏ କୁକୁରର ମୃତ୍ୟୁ ହୋଇଛି । ମିଳିଥିବା ସୂଚନା ଅନୁସାରେ, ଗାଁର ଜଣେ ବ୍ୟକ୍ତି ଘରେ ଚୋର ନ ପଶିବା ଲାଗି ଘରବାଡ଼ରେ ବିଦ୍ୟୁତ୍ ତାର ସଂଯୋଗ କରିଥିଲେ । ଆଉ ସେହି ତାରରେ ଲାଗି ଛଟପଟ ହୋଇ ଆଖି ବୁଜୁଛି କୁକୁର ଟିଏ ।

ତେବେ ସ୍ଥାନୀୟ ଲୋକଙ୍କ ଅଭିଯୋଗ, ଏହି ବିଦ୍ୟୁତ ତାର ଲାଗି ଅନେକ ପଶୁପକ୍ଷୀଙ୍କ ମଧ୍ୟ ଜୀବନ ଗଲାଣି । କୁକୁର ମରିବା ଖବର ପାଇ ସ୍ଥାନୀୟ ପୋଲିସ ପହଞ୍ଚି ବିଦ୍ୟୁତ ସଂଯୋଗକୁ କାଟି ଦେଇଛି । ତେବେ ଜୀବଜନ୍ତୁଙ୍କ ସୁରକ୍ଷା ପାଇଁ ସରକାର ବିଭିନ୍ନ ମାଧ୍ୟମରେ ସଚେତନ କରୁଥିଲେ ବି କାହିଁକି ଚେତୁନି ମଣିଷ ।

କେବେ ବାର୍‌ହା ଶିକାର ବିଛା ଯାଇଥିବା ତାରରେ ହାତୀ ଜୀବନ ହରାଉଛି ତ ଆଉ କେବେ ବାଘ ବି ଭୂମିରେ ଲୋଟି ପଡ଼ୁଛି । ମଣିଷ ସ୍ମାର୍ଟ ହେଉଥିବା ବେଳେ ତାର ପାଗଳାମି ପାଇଁ ଅକାରଣରେ ଟଳି ପଡ଼ୁଛନ୍ତି ନିରୀହ ପଶୁ, ପକ୍ଷୀ । ଏହାକୁ ନେଇ ପରିବେଶବିତ୍ ଓ ପଶୁପକ୍ଷୀ ପ୍ରେମୀ ଚିନ୍ତା ପ୍ରକଟ କରିଛନ୍ତି ।