ଆଜିଠାରୁ ରାଜ୍ୟରେ ସ୍ବାଭାବିକ ହେଲା ଘରୋଇ ବସ୍ ଚଳାଚଳ। ଏ ନେଇ ବଡ଼ ଘୋଷଣା କରିଛି ରାଜ୍ୟ ବସ୍ ମାଲିକ ସଂଘ । ପୁରୀରେ ବସିଥିବା ରାଜ୍ୟ ଘରୋଇ ବସ୍ ମାଲିକ ସଂଘର ବୈଠକରେ ବଡ଼ ନିଷ୍ପତ୍ତି ନିଆଯାଇଛି । ଆଜି ଠାରୁ ରାଜ୍ୟର ସବୁ ଘରୋଇ ବସ୍ ଚଳାଚଳ କରୁଛି । ରାସ୍ତାରେ କୌଣସି ସ୍ଥାନରେ ବସ୍‌କୁ ଅବରୋଧ କରାଗଲେ ଆଇନର ଆଶ୍ରୟ ନିଆଯିବ । ସରକାର ସୁରକ୍ଷା ଯୋଗାଇ ଦେବାକୁ ସଂଘ ପକ୍ଷରୁ ଆବେଦନ କରାଯାଇଛି । ୪ ଦିନ ହେବ ଷ୍ଟିଅରିଙ୍ଗ ଛାଡ଼ ଆନ୍ଦୋଳନ କରୁଥଲେ ଡ୍ରାଇଭର୍ ସଙ୍ଘ । ୭ ଦଫା ଦାବି ନେଇ ଧାରଣାରେ ବସିଥିଲେ ଡ୍ରାଇଭରମାନେ । ଫଳରେ ନାହିଁ ନଥିବା ହଇରାଣ ହେଉଥିଲେ ଯାତ୍ରୀ ।

୪ ଦିନ ପରେ ସ୍ବାଭାବିକ ହେଲା ବସ୍ ଚଳାଚଳ। ସାରା ରାଜ୍ୟରେ ଗଡ଼ିଲା ଘରୋଇ ବସ୍ । ଭୁବନେଶ୍ବର, ପୁରୀ, କଟକ, କେନ୍ଦ୍ରାପଡ଼ା, ସମ୍ବଲପୁର ସବୁଠି ଘରୋଇ ବସ୍ ଚଳାଚଳ ହୋଇଛି । ଫଳରେ ଯାତ୍ରୀମାନେ ସୁବିଧାରେ ଯାତାୟାତ କରିପାରୁଛନ୍ତି । ଡ୍ରାଇଭର ଗତ ୮ ତାରିଖରୁ ଡ୍ରାଇଭର ମହାସଂଘ ଷ୍ଟିଅରିଂ ଛାଡ ଆନ୍ଦୋଳନ କରିଥିଲା ।

ରାଜ୍ୟ ସରକାରଙ୍କ ସହ ଆଲୋଚନା ସତ୍ତ୍ବେ ଲିଖିତ ପ୍ରତିଶ୍ରୁତି ଦାବିରେ ଅଡ଼ି ବସିଥିଲା ସଂଘ। ଗତ ରାତିରେ ରାଜ୍ୟ ଘରୋଇ ବସ୍ ମାଲିକ ସଂଘ ଯାତ୍ରୀଙ୍କ ସ୍ବାର୍ଥକୁ ଆଖି ଆଗରେ ରଖି ବସ୍ ଚଲାଇବାକୁ ନିଷ୍ପତ୍ତି ନେଇଥିଲା । ଏହି କ୍ରମରେ ଆଜିଠୁ ବସ୍ ଚଳାଚଳ ସ୍ବାଭାବିକ ହୋଇଛି ।

ଚାରି ଦିନ ଧରି ଧର୍ମଘଟ ଯୋଗୁଁ କ୍ଷତି ସହୁଛନ୍ତି ବସ୍ ମାଲିକ । ହଜାର ହଜାର ଯାତ୍ରୀ ହନ୍ତସନ୍ତ ହେଉଛନ୍ତି । ତେଣୁ ଡ୍ରାଇଭର ମହାସଂଘର ଷ୍ଚିୟରିଂ ଛାଡ଼ ଆନ୍ଦୋଳନକୁ ଆଉ ସମର୍ଥନ ଦିଆଯିବ ନାହିଁ ବୋଲି ଘରୋଇ ବସ ମାଲିକ ସଂଘ ସୂଚନା ଦେଇଛନ୍ତି । ତେଣୁ ଆଜିଠୁ ଘରୋଇ ବସ୍ ଚଳାଚଳ ସେବା ସ୍ବାଭାବିକ ହୋଇଛି ।