ପୁଣି ଅକ୍ଟୋବରରେ ଦୁଇଟି ବାତ୍ୟା ଭୟ । ୧୯୯୯ ଅକ୍ଟୋବରରେ ଦୁଇଟି ବାତ୍ୟା ଆସିଥିବା ବେଳେ ୨୬ ବର୍ଷ ପରେ ପୁଣି ସମାନ ମାସରେ 2ଟି ବାତ୍ୟା ସୃଷ୍ଟି ହେବା ନେଇ ପୂର୍ବାନୁମାନ କରିଛି ଆମେରିକାର GFS ମଡେଲ୍ । ଯାହା ଅନୁସାରେ 2ଟି ବାତ୍ୟା ମଧ୍ୟରୁ ଗୋଟିଏ ଆନ୍ଧ୍ରପ୍ରଦେଶ ଓ ଅନ୍ୟଟି ତାମିଲନାଡୁ ମୁହାଁ ହୋଇପାରେ । ତେବେ ଅର୍ଗସକୁ ଏକ୍ସକ୍ଲୁସିଭ୍ ପ୍ରତିକ୍ରିୟାରେ IMD ଡିଜି ମୃତ୍ୟୁଞ୍ଜୟ ମହାପାତ୍ର କହିଛନ୍ତି - ଏବେ ସୁଦ୍ଧା ଓଡ଼ିଶାକୁ ବାତ୍ୟା ୱାର୍ଣ୍ଣିଂ ନାହିଁ ।ଆଂଚଳିକ ପାଣିପାଗ ବିଭାଗ ନିର୍ଦ୍ଦେଶିକା ବି ଓଡ଼ିଶାରେ ବାତ୍ୟା ଆଶଙ୍କାକୁ କରିଛନ୍ତି ଖଣ୍ଡନ । ତାଙ୍କ ଅନୁସାରେ ଏବେ ଦକ୍ଷିଣ ପୂର୍ବ ବଙ୍ଗୋପସାଗର ଉପରେ ସକ୍ରିୟ ରହିଛି ଘୂର୍ଣ୍ଣିବଳୟ । ପ୍ରଭାବରେ ସୃଷ୍ଟି ହେବ ଲଘୁଚାପ କ୍ଷେତ୍ର ।

କ୍ରମଶଃ ଅଧିକ ବଳ ଗୋଟାଇ ଏହା ୨୩ ତାରିଖ ବେଳକୁ ଗଭୀର ଅବପାତରେ ପରିଣତ ହେବ । ଏହାର ସିଧାସଳଖ ପ୍ରଭାବ ଓଡ଼ିଶା ଉପରେ ରହିବ ନାହିଁ । କେତେକ ଜିଲ୍ଲାରେ, ବିଶେଷ କରି ଦକ୍ଷିଣ ଓ ଉପକୂଳ ଓଡ଼ିଶାରେ ବିଜୁଳି ଘଡ଼ଘଡ଼ି ସହ ହାଲୁକାରୁ ମଧ୍ୟମ ଧରଣର ବର୍ଷା ହୋଇପାରେ । ବାଲେଶ୍ଵର, ଭଦ୍ରକ, ଯାଜପୁର, କେନ୍ଦ୍ରାପଡ଼ା, ଜଗତସିଂହପୁର, ପୁରୀ, ଖୋର୍ଦ୍ଧା,କଟକ,ନୟାଗଡ଼,ଗଞ୍ଜାମ, ଗଜପତି,କନ୍ଧମାଳ, କଳାହାଣ୍ଡି,ରାୟଗଡ଼ା, କୋରାପୁଟ, ନବରଙ୍ଗପୁର ଓ ମାଲକାନଗିରିରେ ରହିଛି ବର୍ଷା ସମ୍ଭାବନା।

ଏଥିସହ ପଢ଼ନ୍ତୁ: ୧୯୯୯ ଭଳି ପୁଣି ଅକ୍ଟୋବରରେ ଦୁଇ ଦୁଇଟି ବଡ଼ ବାତ୍ୟା !

ଗୋଟିଏ ପଟେ ୧୬ ତାରିଖରୁ ଓଡ଼ିଶାରୁ ବିଦାୟ ନେଇସାରିଛି ମୌସୁମୀ । ଅନ୍ୟପଟେ ଅକ୍ଟୋବର ମାସରେ ରହିଛି ବାତ୍ୟାର ଇତିହାସ । ୟା ଭିତରେ ଏବେ ବଙ୍ଗୋପସାଗରରେ ଲଘୁଚାପ କ୍ଷେତ୍ର ସୃଷ୍ଟି ହେବାରୁ ବଢ଼ିଛି ବାତ୍ୟାର ଭୟ । ତେବେ ଘୂର୍ଣ୍ଣିବଳୟ କେତେ ଘନୀଭୂତ ହେବ, କେଉଁ ଦିଗକୁ ଗତି କରିବ ଓ କେଉଁ ଉପକୂଳ ଦେଇ ଅତିକ୍ରମ କରିବ ତାହା ପରେ ସ୍ପଷ୍ଟ ହେବ । ମୌସୁମୀ ପ୍ରତ୍ୟାହାର ପରେ ବଙ୍ଗୋପସାଗରରେ ସିଷ୍ଟମ୍‌ଗୁଡ଼ିକ ଅଧିକ ଘନୀଭୂତ ହେବାକୁ ପରିବେଶ ସହାୟକ ହୋଇଥାଏ । ପୂର୍ବରୁ ୧୯୯୯ରେ ସୁପର ସାଇକ୍ଲୋନର ସାମ୍ନା କରିଥିଲା ଓଡ଼ିଶା। ସେହିପରି ୨୦୦୯ରେ ଅଇଲା, ୨୦୧୮ରେ ତିତିଲି, ୨୦୨୧ରେ ଗୁଲାବ ଓ ଜୱାଦ ଏବଂ ୨୦୨୨ର ଅସାନି ଭଳି ବାତ୍ୟା ସୃଷ୍ଟି ହୋଇଛି । ତେଣୁ ବାତ୍ୟା ଭୟ ଅଧିକ ରହିଛି ।

ଅଧିକ ପଢ଼ନ୍ତୁ ଓଡ଼ିଶା ଖବର: