Dr Ashok Mahapatra / ବିଶିଷ୍ଟ ସ୍ନାୟୁଶଲ୍ୟ ବିଶେଷଜ୍ଞ ତଥା ପଦ୍ମଶ୍ରୀ ପ୍ରଫେସର ଅଶୋକ କୁମାର ମହାପାତ୍ରଙ୍କ ପରଲୋକ

ଭୁବନେଶ୍ୱର/ନୂଆଦିଲ୍ଲୀ: ବିଶିଷ୍ଟ ସ୍ନାୟୁଶଲ୍ୟ ଚିକିତ୍ସକ ତଥା ପଦ୍ମଶ୍ରୀ ସମ୍ମାନପ୍ରାପ୍ତ ଡାକ୍ତର ଅଶୋକ କୁମାର ମହାପାତ୍ରଙ୍କର ପରଲୋକ ହୋଇଛି । ସୋମବାର ନୂଆଦିଲ୍ଲୀସ୍ଥିତ AIIMSରେ ଡାକ୍ତର ଅଶୋକ ମହାପାତ୍ର ଶେଷ ନିଃଶ୍ୱାସ ତ୍ୟାଗ କରିଛନ୍ତି । ତାଙ୍କ ବିୟୋଗରେ ଡାକ୍ତରୀ ଓ ଶିକ୍ଷା ଜଗତରେ ଶୋକର ଛାୟା ଖେଳିଯାଇଛି ।

୧୯୫୨ ମସିହା ଡିସେମ୍ବର ୨୯ ତାରିଖରେ ପୁରୀରେ ଜନ୍ମଗ୍ରହଣ କରିଥିଲେ ଡାକ୍ତର ଅଶୋକ ମହାପାତ୍ର । ୧୯୭୫ରେ ବ୍ରହ୍ମପୁରର MKCG ମେଡିକାଲ କଲେଜରୁ MBBS ଶେଷ କରିବା ପରେ ନୂଆଦିଲ୍ଲୀ AIIMSରୁ MS ଓ ନ୍ୟୁରୋସର୍ଜରୀରେ MCh ଡିଗ୍ରୀ ହାସଲ କରିଥିଲେ । ୧୯୮୩ରୁ ୨୦୧୭ ପର୍ଯ୍ୟନ୍ତ ସେ AIIMS ଦିଲ୍ଲୀର ନ୍ୟୁରୋସର୍ଜରୀ ବିଭାଗରେ ଅଧ୍ୟାପକ ଭାବେ କାମ କରିଥିଲେ । ୧୯୯୬ରେ ପ୍ରଫେସର ଏବଂ ୨୦୦୪ରେ ସିନିୟର ପ୍ରଫେସର ହୋଇଥିଲେ ।

ଚିକିତ୍ସା କ୍ଷେତ୍ରରେ ବଡ଼ ଅବଦାନ

ଡାକ୍ତର ମହାପାତ୍ର ନିଜ କର୍ମ ଜୀବନରେ ଅନେକ ବଡ଼ ଦାୟିତ୍ୱ ତୁଲାଇଥିଲେ । ୨୦୦୬ରେ ଲକ୍ଷ୍ନୌସ୍ଥିତ ସଞ୍ଜୟ ଗାନ୍ଧୀ ପୋଷ୍ଟ ଗ୍ରାଜୁଏଟ୍ ଇନଷ୍ଟିଚ୍ୟୁଟ୍ ଅଫ୍ ମେଡିକାଲ ସାଇନ୍ସେସ୍ (SGPGI)ର ନିର୍ଦ୍ଦେଶକ ହୋଇଥିଲେ । ପରେ ୨୦୧୨ରେ ଭୁବନେଶ୍ୱର AIIMSର ପ୍ରତିଷ୍ଠାତା ନିର୍ଦ୍ଦେଶକ ଭାବେ ଦାୟିତ୍ୱ ନେଇଥିଲେ । ଏହା ସହିତ ସେ ଭୁବନେଶ୍ୱରର SOA ବିଶ୍ୱବିଦ୍ୟାଳୟର କୁଳପତି ଭାବେ ମଧ୍ୟ କାମ କରିଥିଲେ ।

୮୭୦ରୁ ଅଧିକ ଗବେଷଣା ପତ୍ର ପ୍ରକାଶ

ନ୍ୟୁରୋସର୍ଜରୀ, ଶିଶୁଙ୍କ ମସ୍ତିଷ୍କ ଓ ସ୍ନାୟୁ ସମ୍ବନ୍ଧୀୟ ଚିକିତ୍ସା, ମୁଣ୍ଡରେ ଆଘାତ ଏବଂ ସ୍ନାୟୁ ଶଲ୍ୟଚିକିତ୍ସା କ୍ଷେତ୍ରରେ ତାଙ୍କର ଅନେକ ଅବଦାନ ରହିଛି । ତାଙ୍କ ନାମରେ ପ୍ରାୟ ୮୭୦ଟି ଗବେଷଣା ପତ୍ର, ୧୬ଟି ପୁସ୍ତକ ଏବଂ ୧୪୦ରୁ ଅଧିକ ପୁସ୍ତକ ଅଧ୍ୟାୟ ପ୍ରକାଶିତ ହୋଇଛି । ସେ ୧୨ ଜଣ PhD ଗବେଷକଙ୍କୁ ମାର୍ଗଦର୍ଶନ ଦେବା ସହ ୨୦ରୁ ଅଧିକ ଗବେଷଣା ପ୍ରକଳ୍ପର ନେତୃତ୍ୱ ନେଇଥିଲେ ।

ଭାରତରେ ନ୍ୟୁରୋସର୍ଜରୀର ବିକାଶ ଓ ଉନ୍ନତ ଚିକିତ୍ସା ସେବା ପ୍ରତି ତାଙ୍କର ଅବଦାନକୁ ସ୍ୱୀକୃତି ଦେଇ କେନ୍ଦ୍ର ସରକାର ତାଙ୍କୁ ୨୦୨୫ରେ ପଦ୍ମଶ୍ରୀ ସମ୍ମାନ ପ୍ରଦାନ କରାଯାଇଥିଲା । ତାଙ୍କ ବିୟୋଗ ଦେଶର ଚିକିତ୍ସା ଜଗତ ପାଇଁ ଏକ ବଡ଼ ଓ ଅପୂରଣୀୟ କ୍ଷତି ।

ସ୍ଵାସ୍ଥ୍ୟସେବାରେ ୪ ଦଶନ୍ଧି

ଚିକିତ୍ସା କ୍ଷେତ୍ରରେ ଚାରି ଦଶନ୍ଧିରୁ ଅଧିକ ସମୟ ଧରି ନିଜର ଦକ୍ଷତା ପ୍ରତିପାଦିତ କରିଥିବା ପ୍ରଫେସର ମହାପାତ୍ର ଅନେକ ଗୁରୁତ୍ୱପୂର୍ଣ୍ଣ ପ୍ରଶାସନିକ ଦାୟିତ୍ୱ ତୁଲାଇଥିଲେ । ୨୦୦୬ ମସିହାରେ ସେ ଲକ୍ଷ୍ନୌସ୍ଥିତ ସଞ୍ଜୟ ଗାନ୍ଧୀ ପୋଷ୍ଟ ଗ୍ରାଜୁଏଟ୍ ଇନଷ୍ଟିଚ୍ୟୁଟ୍ ଅଫ୍ ମେଡିକାଲ ସାଇନ୍ସେସର ନିର୍ଦ୍ଦେଶକ ଭାବେ କାର୍ଯ୍ୟଭାର ସମ୍ଭାଳିଥିଲେ ।

୨୦୧୨ରେ ଭୁବନେଶ୍ୱର ଏମ୍ସର ପ୍ରତିଷ୍ଠାତା ନିର୍ଦ୍ଦେଶକ ଭାବେ ଦାୟିତ୍ୱ ଗ୍ରହଣ କରି ଏହି ଅନୁଷ୍ଠାନକୁ ଏକ ପ୍ରମୁଖ ସ୍ୱାସ୍ଥ୍ୟସେବା କେନ୍ଦ୍ର ଭାବରେ ଗଢ଼ିତୋଳିବାରେ ପ୍ରମୁଖ ଭୂମିକା ନିର୍ବାହ କରିଥିଲେ । ଦୀର୍ଘ ୪୨ ବର୍ଷର କାର୍ଯ୍ୟକାଳ ମଧ୍ୟରେ ସେ ଦିଲ୍ଲୀ ଏମ୍ସରେ ଡିନ୍ (ଗବେଷଣା) ଭାବେ ଅବସର ନେଇଥିଲେ । ଏହାସହ ଭୁବନେଶ୍ୱରସ୍ଥିତ 'ଶିକ୍ଷା ଓ ଅନୁସନ୍ଧାନ' (ସୋଆ) ବିଶ୍ୱବିଦ୍ୟାଳୟର କୁଳପତି ଭାବେ ସେବା ପ୍ରଦାନ କରିଥିଲେ ।

ଚିକିତ୍ସା ବିଜ୍ଞାନ ଓ ଗବେଷଣାକୁ ଅବଦାନ

ଭାରତରେ ଶିଶୁ ସ୍ନାୟୁଶଲ୍ୟ (ପେଡିଆଟ୍ରିକ୍ ନ୍ୟୁରୋସର୍ଜରୀ), ନ୍ୟୁରୋଟ୍ରମା ଏବଂ ପେରିଫେରାଲ ନର୍ଭ ସର୍ଜରୀ କ୍ଷେତ୍ରକୁ ଆଗକୁ ନେବାରେ ତାଙ୍କର ଯୋଗଦାନ ଥିଲା ଅବିସ୍ମରଣୀୟ । ଚିକିତ୍ସା ସହ ଗବେଷଣା କ୍ଷେତ୍ରରେ ମଧ୍ୟ ସେ ଏକ ସ୍ୱତନ୍ତ୍ର ପରିଚୟ ସୃଷ୍ଟି କରିଥିଲେ । ଚିକିତ୍ସା ସେବାରେ ତାଙ୍କର ଅତୁଳନୀୟ ଅବଦାନ ନିମନ୍ତେ ଭାରତ ସରକାର ତାଙ୍କୁ ସମ୍ମାନଜନକ 'ପଦ୍ମଶ୍ରୀ' ଉପାଧି ପ୍ରଦାନ କରିଥିଲେ । ତାଙ୍କର ବିୟୋଗରେ ଚିକିତ୍ସା ଜଗତ ଏକ ମହାନ ବ୍ୟକ୍ତିତ୍ୱ ତଥା ଯୋଗଜନ୍ମା ସ୍ନାୟୁଶଲ୍ୟ ବିଶେଷଜ୍ଞଙ୍କୁ ହରାଇଛି ।