କେନ୍ଦୁଝର ଜିଲ୍ଲା ଘଟଗାଁ ବ୍ଲକ ସାନ୍ତରାପୁର ଗାଁର ଅସୁରବାହାଳି ଓ ବେହେରା ସାହିର । ଏଠାରେ ରହୁଥିବା ୩୦୦ରୁ ଉର୍ଦ୍ଧ୍ବ ପରିବାର ଏବେ ଟୋପାଏ ବିଶୁଦ୍ଧ ପାଣି ପାଇଁ ଡହଳବିକଳ ହେଉଛନ୍ତି । ଗ୍ରାମରେ ପାନୀୟ ଜଳ ଯୋଗାଇବା ପାଇଁ ରହିଥିବା ବୋରିଂ ପାଇପ୍ ଲାଇନ ଭାଙ୍ଗିରୁଜି ଅଚଳ ହୋଇ ପଡିଥିବା ବେଳେ ନଳକୂପରୁ ବାହାରୁଛି ଦୂଷିତ ଲାଲ୍ ପାଣି । ପାଣି ପାଇପ୍ ଲାଇନ ଦୀର୍ଘ ଦିନ ହେଲା ବ୍ୟବହାର ହେଉ ନଥିବା କାରଣରୁ ଷ୍ଟାଣ୍ଡ ପୋଷ୍ଟଗୁଡିକ ଏବେ ଜରାଜୀର୍ଣ୍ଣ ଅବସ୍ଥାରେ ପଡ଼ିରହିଛି । ପାଣିର ଅନ୍ୟ କୌଣସି ବିକଳ୍ପ ନଥିବା କାରଣରୁ ଲୋକମାନେ ବାଧ୍ୟ ହୋଇ ନଳକୂପର ଲାଲ୍ ପାଣି ଓ ଏକ କିଲୋମିଟର ଦୂରରୁ ପାଣି ସଂଗ୍ରହ କରୁଛନ୍ତି ।

ଗ୍ରାମରେ ବସୁଧା ଯୋଜନାରେ ଓଭରହେଡ ପାଣି ଟାଙ୍କି ଏଯାଏଁ ନିର୍ମାଣ ହୋଇନି । ଜଳ ଯୋଗାଣ ପାଇଁ ଏକ ବୋରିଂ ହୋଇଥିବା ବେଳେ ପାଣି ଆସୁନଥିବା କାରଣରୁ ଷ୍ଟାଣ୍ଡପୋଷ୍ଟଗୁଡିକ ଏବେ ଭାଙ୍ଗିରୁଜି ନଷ୍ଟ ହୋଇଗଲାଣି । ଗ୍ରାମର ପାଇପ୍ ଲାଇନ ଓ ନଳକୂପ ମରାମତି କରିବା ପାଇଁ ଲୋକେ ପଞ୍ଚାୟତଠାରୁ ବ୍ଲକ ଯାଏଁ ବାରମ୍ବାର ଗୁହାରି କରିଆସୁଥିବା ମଧ୍ୟ ଫଳ ଶୂନ । ଏବେ ଖରା ଗରମ କଷ୍ଟକୁ ଜଳ କଷ୍ଟ ଲୋକଙ୍କ ସମସ୍ୟାକୁ ଦୁଇ ଗୁଣିତ କରିଛି । ଯାହାକୁ ନେଇ ଲୋକଙ୍କ ମଧ୍ୟରେ ଏବେ ଅସନ୍ତୋଷ ବୃଦ୍ଧି ପାଇଛି । ଆଗାମୀ ଦିନରେ ପାଣି ସମସ୍ୟା ଦୂର ନହେଲେ ପଞ୍ଚାୟତ ସମେତ ବ୍ଲକ କାର୍ଯ୍ୟାଳୟ ଘେରାଉ କରିବେ ବୋଲି ଚେତାବନୀ ଦେଇଛନ୍ତି ଗ୍ରାମବାସୀ ।

ଆଜି ବି ଅନେକ ଗାଁରେ ଲାଗି ରହିଛି ଜଳକଷ୍ଟ । ତେବେ ରାଜ୍ୟରେ ୨୪ ବର୍ଷ ବିଜେଡ ଶାସନରେ ଚାଲିଥିଲା କଣ । ଦଳୀୟ ଭିତ୍ତିରେ ହେଉଥିଲା କି ବିକାଶ । ନା ରାଜନେତାଙ୍କ ପକେଟ୍ ହେଉଥିଲା ଗରମ । ତାକୁ ନେଇ ଉଠିଛି ପ୍ରଶ୍ନ ।