President Murmu Odisha / ନଭେମ୍ବର ୩ରୁ ତିନିଦିନିଆ ଗସ୍ତରେ ଆସୁଛନ୍ତି ରାଷ୍ଟ୍ରପତି ଦ୍ରୌପଦୀ ମୁର୍ମୁ… ଜାହେର ଥାନ ସହ କିଚେକେଶ୍ୱରୀ ମନ୍ଦିରର ହେବ ବିକାଶ

ନିଜ ଜନ୍ମମାଟି ମୟୂରଭଞ୍ଜ ଜିଲ୍ଲାକୁ ଆସୁଛନ୍ତି ଦେଶର ପ୍ରଥମ ନାଗରିକ ତଥା ମହାମହିମ ରାଷ୍ଟ୍ରପତି ଦ୍ରୌପଦୀ ମୁର୍ମୁ। ନଭେମ୍ବର ୩ରୁ ୫ ତାରିଖ ପର୍ଯ୍ୟନ୍ତ ନିଜର ତିନିଦିନିଆ ମୟୂରଭଞ୍ଜ ଗସ୍ତ ଅବସରରେ ସେ ବିଭିନ୍ନ ଉନ୍ନୟନମୂଳକ ପ୍ରକଳ୍ପର ଶିଳାନ୍ୟାସ, ଲୋକାର୍ପଣ ସହ ଧାର୍ମିକ ଅନୁଷ୍ଠାନ ପରିଦର୍ଶନ ଏବଂ ଆଦିବାସୀ ସଂସ୍କୃତିର ପ୍ରଚାର ପ୍ରସାର କାର୍ଯ୍ୟକ୍ରମରେ ସାମିଲ ହେବେ।

ପ୍ରଥମ ଦିନ - ନଭେମ୍ବର ୩ରେ ରାଷ୍ଟ୍ରପତି ନୂଆଦିଲ୍ଲୀରୁ ବାହାରି ପଶ୍ଚିମବଙ୍ଗର କଲେଇକୁଣ୍ଡା ବିମାନବନ୍ଦରରେ ପହଞ୍ଚିବା ପରେ ସଡ଼କ ପଥରେ ମୟୂରଭଞ୍ଜ ଅଭିମୁଖେ ଯାତ୍ରା କରିବେ। ସେ ବହଳଦା ସ୍ଥିତ ପ୍ରସିଦ୍ଧ ମା’ କିଚେକେଶ୍ୱରୀ ମନ୍ଦିରରେ ପୂଜାର୍ଚ୍ଚନା ଓ ଆରତିରେ ସାମିଲ ହେବା ପରେ ରାଇରଙ୍ଗପୁର ସ୍ଥିତ ନିଜ ବାସଭବନରେ ରାତ୍ରିଯାପନ କରିବେ।

ଦ୍ୱିତୀୟ ଦିନ - ନଭେମ୍ବର ୪ ସକାଳେ ରାଇରଙ୍ଗପୁର ମହୁଲଡିହାସ୍ଥିତ ଲକ୍ଷ୍ମୀ ମଣ୍ଡପରେ ପୂଜାର୍ଚ୍ଚନା ପରେ ନବନିର୍ମିତ ପ୍ରତିରକ୍ଷା ଏକ୍ସ-ସର୍ଭିସମ୍ୟାନ୍ କ୍ୟାଣ୍ଟିନ୍ ପରିଦର୍ଶନ କରିବେ ଏବଂ ୩ ଜଣ ବୀର ନାରୀଙ୍କୁ ସମ୍ବର୍ଦ୍ଧିତ କରିବେ। ଏହାପରେ ଓଡ଼ିଶା ସରକାରଙ୍କ ସ୍ୱାସ୍ଥ୍ୟ ବିଭାଗ ଓ ହିନ୍ଦୁଜା ହସ୍ପିଟାଲ ମଧ୍ୟରେ ନେଫ୍ରୋଲୋଜି ମେଡିକାଲ କ୍ୟାମ୍ପ ପାଇଁ MoU ସ୍ୱାକ୍ଷରିତ ହେବା ସହ ମେଡିକାଲ ଭ୍ୟାନ୍‌ର ଶୁଭାରମ୍ଭ ହେବ। ରାଷ୍ଟ୍ରପତି ପ୍ରାୟ ୧୨୦ ଜଣ 'ଜାହେର ଥାନ'ର ମୁଖିଆଙ୍କ ସହ ଆଦିବାସୀ ପରମ୍ପରା ଓ ପୂଜାସ୍ଥଳୀର ସୁରକ୍ଷା ନେଇ ଆଲୋଚନା କରିବେ। ଅପରାହ୍ନରେ ରାଇରଙ୍ଗପୁର କଚେରି ପଡ଼ିଆଠାରେ 'ପ୍ରସାଦ' ଯୋଜନା ଅଧୀନରେ ମା’ କିଚେକେଶ୍ୱରୀ ମନ୍ଦିରର ପୁନରୁଦ୍ଧାର ଏବଂ ୩୭ଟି ଜାହୀର ଥାନର ବିକାଶ ପାଇଁ ଭିତ୍ତିପ୍ରସ୍ତର ସ୍ଥାପନ କରାଯିବ। ରେଳ ଯୋଗାଯୋଗ କ୍ଷେତ୍ରରେ ବାଦାମପାହାଡ଼-ପୁରୀ ମଧ୍ୟରେ ନୂତନ ଦୈନନ୍ଦିନ ଏକ୍ସପ୍ରେସ୍ ଟ୍ରେନ୍‌ର ଶୁଭାରମ୍ଭ ସହ ରାଇରଙ୍ଗପୁର ଓ ବାଦାମପାହାଡ଼ ଅମୃତ ଭାରତ ରେଳ ଷ୍ଟେସନ୍‌ର ଉଦ୍‌ଘାଟନ ହେବ। ଏଥିସହ ସ୍ପୋର୍ଟସ୍ ହଷ୍ଟେଲ୍ ଘୋଷଣା, ଗୋଶାଳା ଏବଂ 'ଏସେକା' କୋଠା ନିର୍ମାଣର ଶିଳାନ୍ୟାସ କାର୍ଯ୍ୟକ୍ରମ ରହିଛି।

ତୃତୀୟ ଦିନ ନଭେମ୍ବର ୫ - ଗସ୍ତର ଶେଷ ଦିନରେ ରାଷ୍ଟ୍ରପତି ସିକିଲ୍ ସେଲ୍ ଆନିମିଆ ରୋଗୀଙ୍କ ସହ ଆଲୋଚନା କରିବେ। ପରେ ମଲ୍ଟି-ସ୍କିଲ୍ ଡେଭଲପମେଣ୍ଟ ସେଣ୍ଟର ଓ ଗୋରୁମହିଷାଣୀ ଆଇରନ୍ କଲେଜ ପରିଦର୍ଶନ କରିବା ସହ ଜାହେର ଥାନ ପାଇଁ ଶାଳ ଓ ମହୁଲ ଗଛ ରୋପଣ କରିବେ। କାର୍ଯ୍ୟକ୍ରମ ସାରି ସେ ସଡ଼କ ପଥରେ କଳାଇକୁଣ୍ଡା ଦେଇ ଦିଲ୍ଲୀ ଫେରିଯିବାର କାର୍ଯ୍ୟକ୍ରମ ରହିଛି।