ଶିକ୍ଷା, ସ୍ୱାସ୍ଥ୍ୟ ଭଳି ମୌଳିକ ସୁବିଧା ଅପହଞ୍ଚ

ଆଦିବାସୀ ଅଧ୍ୟୁଷିତ ମୟୂରଭଞ୍ଜ ଜାମଦା ବ୍ଲକ ହେଁସଡା ପଞ୍ଚାୟତର କୁଚେଇପାଲ ଗ୍ରାମ । ଗାଁରେ ଉଚ୍ଚ ପ୍ରାଥମିକ ବିଦ୍ୟାଳୟରେ ଗୋଟିଏ ଶ୍ରେଣୀଗୃହରେ ଆଠୋଟି ଶ୍ରେଣୀର ପିଲା ପଢୁଛନ୍ତି ପାଠ । ପୂର୍ବରୁ ଥିବା ଶ୍ରେଣୀଗୃହ ବିଲଡିଂକୁ ଅସୁରକ୍ଷିତ ଘୋଷଣା ହୋଇଥିବା ବେଳେ ନୂଆ କରି ନିର୍ମାଣ ହୋଇଥିବା ବିଲଡିଂ ଅଧପନ୍ତରିଆ ହୋଇ ପଡ଼ିରହିଛି । ସେପଟେ ଦୀର୍ଘ ପାଞ୍ଚ ବର୍ଷ ହେଲା ଅସୁରକ୍ଷିତ ଘୋଷଣା କରାଯାଇଥିବା ଗୃହରେ ଚାଲିଛି ଅଙ୍ଗନୱାଡି କେନ୍ଦ୍ର । ବିପଦପୂର୍ଣ୍ଣ ଅବସ୍ଥାରେ ପାଠ ପଢୁଛନ୍ତି କୁନି କୁନି ପିଲା । ଗାଁରେ ସ୍ୱାସ୍ଥ୍ୟ ସେବା ପାଇଁ ନିର୍ମାଣ ହୋଇଥିବା ସ୍ୱାସ୍ଥ୍ୟ ଉପକେନ୍ଦ୍ରରେ ଆରମ୍ଭରୁ ତାଲା ଝୁଲୁଛି ।

ଅନ୍ୟ ପକ୍ଷରେ ଗାଁରେ ଥିବା ରାସ୍ତାର ଅବସ୍ଥା ବେହାଲ । ରଘୁବୀର ଛକରୁ କୁଚେଇପାଲକୁ ସଂଯୋଗ କରୁଥିବା ୪ କିଲୋମିଟର ରାସ୍ତା ଖାଲଖମାରେ ଭର୍ତ୍ତି । ଗ୍ରାମବାସୀ ଏନେଇ ବାରମ୍ବାର ଅଭିଯୋଗ କରୁଥିବା ବେଳେ କେହି କର୍ଣ୍ଣପାତ କରୁନଥିବା ଅଭିଯୋଗ ହୋଇଛି । କେବେ ଏହି ଅଞ୍ଚଳରବାସୀଙ୍କ ଦୁଃଖ ଦୂର ହେଉଛି ତାହା ଦେଖିବାକୁ ବାକି ରହିଲା ।