ଭୁବନେଶ୍ଵର,୨୧୩ : ଖାଦ୍ୟ ସୁରକ୍ଷା ଓ ଉପଭୋକ୍ତାଙ୍କ ହିତକୁ ଧ୍ୟାନରେ ରଖ୍ ଉତ୍ତରପ୍ରଦେଶ ସରକାର ଅଣ୍ଡାରେ ଏକ୍ସପାଏରୀକୁ ବାଧ୍ୟତାମୂଳକ କରିଛନ୍ତି। ଆସନ୍ତା ଏପ୍ରିଲ ୧ ତାରିଖରୁ ଏହି ନିୟମ ଲାଗୁ ହେବ । ତେବେ ଓଡ଼ିଶାରେ ବି ଲାଗୁହେବାର ସମ୍ଭାବନା ରହିଛି। ଆମେ ବିଭାଗୀୟ ସ୍ତରରେ ଆଲୋଚନା କରି ସରକାରଙ୍କୁ ପ୍ରସ୍ତାବ ଦେବୁ। ଖୁବ୍‌ଶୀଘ୍ର ଏହା ଉପରେ ନିଷ୍ପତ୍ତି ନିଆଯିବ ବୋଲି କହିଛନ୍ତି ପ୍ରାଣୀ ପାଳନ ନିର୍ଦ୍ଦେଶାଳୟର ନିର୍ଦ୍ଦେଶକ ବିଜୟ ଅମୃତା କୁଲାଙ୍ଗେ।

ଓଡ଼ିଶାରେ ଅଣ୍ଡା ଏକ ପସନ୍ଦର ଖାଦ୍ୟ । ଘରୁଠୁ ନେଇ ଅଙ୍ଗନବାଡ଼ି, ହସ୍ପିଟାଲ୍ ପର୍ଯ୍ୟନ୍ତ ସବୁଠି ଅଣ୍ଡାର ରାଜୁତି। ସରକାର ତ ଅଙ୍ଗନବାଡ଼ି ଓ ହସ୍ପିଟାଲ୍‌ରେ ମାଗଣରେ ଅଣ୍ଡା ବାଣ୍ଟୁଛନ୍ତି। ଏମିତି ଆହୁରି ଅନେକ ସରକାରୀ ସ୍ଥାନ ଅଛି, ଯେଉଁଠି ବି ଏ ସୁବିଧା ମିଳୁଛି। ତେବେ ମତ୍ସ୍ୟ ଓ ପ୍ରାଣୀ ସମ୍ପଦ ବିଭାଗ ତଥ୍ୟ ଅନୁଯାୟୀ ; ଏବେ ରାଜ୍ୟରେ ଦୈନିକ ପ୍ରାୟ ୩ କୋଟି ଅଣ୍ଡାର ଆବଶ୍ୟକ‌ତା ରହିଛି। ହେଲେ ୧ କୋଟି ୧୦ ହଜାର ଅଣ୍ଡା ଉତ୍ପାଦନ ହେଉଛି। ଆହୁରି ୧ କୋଟି ୯୦ ଲକ୍ଷ ଆବଶ୍ୟକ ରହୁଛି। ଆଗକୁ ବିଭିନ୍ନ ଯୋଜନା ମାଧ୍ୟମରେ ଅଣ୍ଡା ଉତ୍ପାଦନ କରିବା ପାଇଁ ସରକାର ଯୋଜନା କରୁଛନ୍ତି। ଭାରତୀୟ ଭେଷଜ ଅନୁସନ୍ଧାନ ସଂସ୍ଥାର ସୁପାରିସ ଅନୁସାରେ ବାର୍ଷିକ ମୁଣ୍ଡପିଛା ୧୮୦ଟି ଅଣ୍ଡାର ଆବଶ୍ୟକତା ଥିବାବେଳେ ରାଜ୍ୟରେ ବର୍ତ୍ତମାନ ମୁଣ୍ଡ ପିଛା ୮୦ ଅଣ୍ଡା ଉପଲବ୍ଧ ହେଉଛି। ଅଣ୍ଡାର ଚାହିଦା ମେଣ୍ଟାଇବା ପାଇଁ ଆନ୍ଧ୍ରପ୍ରଦେଶ, ତେଲଙ୍ଗାନାରୁ ବାର୍ଷିକ ୯୦ କୋଟି ଅଣ୍ଡା ଆମଦାନୀ କରାଯାଉଛି। ତେବେ ଏସବୁ ମଧ୍ୟରେ ବଜାରରେ କେଉଁଟା ଭଲ ଆଉ କେଉଁଗ ଖରାପ ଅଣ୍ଡା ତାକୁ ନେଇ ସବୁବେଳେ ଦ୍ବନ୍ଦ୍ବ ଲାଗି ରହିଛି। ଏମିତି ବି ସ୍ଥିତି ଆସିଛି, ରୋଷେଇ ବେଳେ ଅଣ୍ଡା ଫଟେଇବା ବେଳେ ତାହା ପଚିଯାଇଥିବା ଦେଖାଯାଏ। କାରଣ ଓଡ଼ିଶାରେ ଯେଉଁ ଅଣ୍ଡା ବ୍ୟବହାର କରାଯାଉଛି, ସେ ଅଣ୍ଡା କିମ୍ବା ପେଟିରେ ଏକ୍ସପାଏରୀ ତାରିଖ ଉଲ୍ଲେଖ ନଥାଏ।

ସ୍ବାସ୍ଥ୍ୟ ବିଶେଷଜ୍ଞଙ୍କ ମତରେ ଖରାପ ଅଣ୍ଡା ଖାଇଲେ, ପେଟରେ ଗ୍ୟାସ ସମସ୍ୟା ଦେଖାଦିଏ। ଚର୍ମରେ ଆଲର୍ଜି ମଧ୍ୟ ହୁଏ। ଯାହା ସ୍ବାସ୍ଥ୍ୟକୁ ଗୁରୁତର କରିଦେଇଥାଏ। ବଡ଼କଥା ହେଉଛି; ଓଡ଼ିଶାରେ ଆମିଷ ଖାଦ୍ୟକୁ ଅଧିକ ଦିନ ମହଜୁଦ ରଖିବା ପାଇଁ ଶୀତଳଭଣ୍ଡାର ନାହିଁ। ଯାହାକୁ ନେଇ ବାରମ୍ବାର ରାଜ୍ୟ ସରକାରଙ୍କୁ ନିଖିଳ ଓଡ଼ିଶା ଆମିଷ ବ୍ୟବସାୟୀ ମହାସଂଘ ଦାବିପତ୍ର ଦେଇଆସୁଛି।

ଏ ସଂକ୍ରାନ୍ତରେ ଓଡ଼ିଶା ପୋଲଟ୍ରି ଫେଡେରସନ୍‌ର ସାଧାରଣ ସମ୍ପାଦକ ଜ୍ୟୋତିକାନ୍ତ ମହାପାତ୍ର କହିଛନ୍ତି, ଉତ୍ତରପ୍ରଦେଶ ସରକାର ଯେଉଁ ନିଷ୍ପତ୍ତି ନେଇଛନ୍ତି ତାହା ଉତ୍ତମ। ହେଲେ ଆମେ ଏ ଦିଗରେ ତର୍ଜମା କରିବାର ଆବଶ୍ୟକତା ରହିଛି।