ଶୌଚ ପାଇଁ ଯାଇଥିବାବେଳେ ବୃଦ୍ଧଙ୍କୁ କଚାଡ଼ି ମାରିଲା ହାତୀ । କେନ୍ଦୁଝର ଜିଲ୍ଲା ଚମ୍ପୁଆ ବନାଞ୍ଚଳ ଯୋଡ଼ାପୋଖରୀ ଗାଁରେ ଘଟିଛି ଏହି ଅଭାବନୀୟ ଘଟଣା । ମୃତକ ଜଣକ ହେଉଛନ୍ତି ୬୫ ବର୍ଷୀୟ ବୃଦ୍ଧ ନରୋତ୍ତମ ମହାନ୍ତ । ଘର ପଛପଟ ପୋଖରୀ ହୁଡ଼ାକୁ ଶୌଚ ପାଇଁ ଯାଇଥିବାବେଳେ ଦନ୍ତା ହାବୁଡ଼ରେ ପଡ଼ିଥିଲେ । ହାତୀ କଚାଡ଼ି ଦେବାରୁ ଗୁରୁତର ହୋଇପଡିଥିଲେ ବୃଦ୍ଧ ।

ତାଙ୍କୁ ପରିବାର ଲୋକେ ଉଦ୍ଧାର କରି ବନ କର୍ମଚାରୀଙ୍କ ସହାୟତାରେ ନିକଟସ୍ଥ ଚମ୍ପୁଆ ମେଡିକାଲକୁ ନେଇଥିଲେ । ମାତ୍ର ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ଚମ୍ପୁଆ ରେଞ୍ଜର ବିଭିନ୍ନ ସେକ୍ସନରେ ଏବେ ୫୨ ଟି ହାତୀ ରହିଥିବାବେଳେ ସନ୍ଧ୍ୟା ପରେ ବିଭିନ୍ନ ଭାଗରେ ବିଭକ୍ତ ହୋଇ ଗ୍ରାମାଞ୍ଚଳକୁ ପଶି ଘରଦ୍ୱାର ଭାଙ୍ଗିବା ସହିତ ପନିପରିବା ଧାନ ଫସଲ ଆଦି ଦଳିଚକଟି ନଷ୍ଟ କରିଦେଉଛନ୍ତି ହାତୀପଲ ।

ଅନେକ ସମୟରେ ହାତୀ ଆକ୍ରମଣରେ ଲୋକଙ୍କ ଜୀବନ ମଧ୍ୟ ଅକାଳରେ ଚାଲିଯାଉଛି । ସମସ୍ତ ବନପାଳ, ବନରଖି ଓ ହାତୀ ସ୍କ୍ୱାର୍ଡ ହାତୀପଲଙ୍କ ଗତିବିଧି ଉପରେ ନଜର ରଖିଥିଲେ ସୁଦ୍ଧା ହାତୀ ଉପଦ୍ରବ ରୋକିବା ସମ୍ଭବ ହୋଇପାରୁନାହିଁ। ଏଭଳି ପରିସ୍ଥିତିରେ ସ୍ଥାନୀୟ ଲୋକେ ଆତଙ୍କିତ ହୋଇ ରହୁଛନ୍ତି ।