ସାପ କାମୁଡ଼ିଲା ନାହିଁ... ବୃଦ୍ଧଙ୍କ ଦେହରେ ଗୁଡ଼େଇ ହୋଇ ବାନ୍ଧି ପକାଇଲା । ଖସି ପାରିଲେ ନାହିଁ ବୃଦ୍ଧ ଜଣକ । ଏତେ ଜୋରେ ସାପଟି ବାନ୍ଧିଥିଲା କି ଯେତେ ଖସିବାକୁ ଚେଷ୍ଟା କରିଥିଲା ସାପ ଛାଡ଼ି ନଥିଲା । ସେମିତି ଶକ୍ତ ଭାବରେ ବାନ୍ଧିକି ରଖିଥିଲା । ସାପ କାହାକୁ ବାନ୍ଧିଦେବା ଆମେ କେବଳ ଚଳଚିତ୍ରରେ ହିଁ ଦେଖିଥିଲେ । କିନ୍ତୁ ଏବେ ଏହି ଘଟଣା ପ୍ରକୃତରେ ଘଟିଛି । ଜଣେ ବୃଦ୍ଧଙ୍କ ଦେହରେ ସାପଟି ଗୁଡ଼େଇ ହୋଇ ଯାଇଛି । ଘରେ ଭିତରେ ପଶି ବୃଦ୍ଧ ଜଣକୁ ଚେୟାର ସହ ବାନ୍ଧି ଦେଇଛି ସେହି ସାପଟି।

ଯେତେ ଚେଷ୍ଟା କଲେ ସୁଧା ଛାଡ଼ୁ ନାହିଁ । ମହୁଁରୁ ଜିଭକୁ ବାହାର କରି ସେମିତି ବାନ୍ଧି ରଖିଛି । ଏମିତି କିଛି ଦୃଶ୍ୟ ଦେଖିବାକୁ ମିଳିଛି ବୌଦ୍ଧ ଜିଲ୍ଲା ହରଭଙ୍ଗା ବ୍ଲକର ଆଡେଣିଗଡ଼ ଗାଁରେ ।

ଆପଣଙ୍କୁ ଚମକାଇ ଦେବ ଏଭଳି ଦୃଶ୍ୟକୁ ଦେଖିଲେ । ଜଣେ ବୃଦ୍ଧ ତଳେ ବସିଛନ୍ତି । ତାଙ୍କ ହାତକୁ ଏକ ଲୁହା ଚେୟାରରେ ବନ୍ଧା ଯାଇଛି । ଆପଣ ଭାବୁଥିବେ କେହି ବ୍ୟକ୍ତି ଏଇ ବୃଦ୍ଧଙ୍କୁ ବାନ୍ଧି ରଖିଛନ୍ତି । କିନ୍ତୁ ତାହା ସତ ନୁହେଁ । ଏକ ବିଷଧର ସାପ ବୃଦ୍ଧଙ୍କ ହାକୁ ଚେୟାରରେ ବାନ୍ଧି ପକାଇଛି । ସାପଟି ଏମିତି ଶକ୍ତ ଭାବରେ ବାନ୍ଧିଛି କି ସେ ସାପ କବଳରୁ ବାହାରି ପାରୁ ନାହାଁନ୍ତି ।

ଏଥିସହ ପଢ଼ନ୍ତୁ: ସୌମ୍ୟ ରଞ୍ଜନଙ୍କ ହତ୍ୟା ଘଟଣାର ତଦନ୍ତ କରିବ NHRC, ଗ୍ରାଉଣ୍ଡ ଜିରୋରୁ କରିବେ ଯାଞ୍ଚ

ସୂଚନା ମୁତାବକ, ହରଭଙ୍ଗା ବ୍ଲକ ଅନ୍ତର୍ଗତ ଆଡେଣିଗଡ଼ ଗାଁର କୃଷ୍ଣ ଚନ୍ଦ୍ର ସାହୁ ଜଣେ ପକ୍ଷାଘାତ ରୋଗୀ । ଶନିବାର ବିଳମ୍ବିତ ରାତିରେ ସେ ଘରେ ଶୋଇଥିବା ବେଳେ ଘରର ଝରକା ଖୋଲା ଥିଲା । ଏହି ସମୟରେ ଝରକା ଦେଇ ଏକ ବିଷଧର ସାପ ଘର ଭିତରକୁ ପଶି ଆସିଥିଲା ଏବଂ ଶୋଇଥିବା କୃଷ୍ଣଙ୍କ ଶରୀର ଉପରକୁ ଚଢ଼ି ଯାଇଥିଲା ।

କୃଷ୍ଣ ଯେତେବେଳେ ଏହା ଜାଣିବାକୁ ପାଇଲେ, ସେତେବେଳେ ସେ ହଠାତ୍ ଉଠି ପାରିନଥିଲେ କି କାହାକୁ ଡାକି ପାରିନଥିଲେ। କାରଣ ସେ ପକ୍ଷାଘାତ ରୋଗରେ ପୀଡ଼ିତ ଥିବାରୁ ତାଙ୍କ ଶରୀରର ଗୋଟିଏ ପାର୍ଶ୍ୱ ସମ୍ପୂର୍ଣ୍ଣ ଅଚଳ ରହିଛି । ​କିଛି ସମୟ ପରେ କୃଷ୍ଣ ଉଠିବା ପାଇଁ ଚେଷ୍ଟା କରିଥିଲେ । କିନ୍ତୁ ସେତେବେଳକୁ ସାପଟି କୃଷ୍ଣଙ୍କ ହାତକୁ ଏକ ଚେୟାର ସହ ଜୋରରେ ଗୁଡ଼ାଇ ବାନ୍ଧି ସାରିଥିଲା ।

ପରେ କୃଷ୍ଣଙ୍କ ବିକଳ ପାଟି ଶୁଣି ଯେତେବେଳେ ପରିବାର ଲୋକେ ଏହା ଦେଖିଲେ । ସେମାନେ ଆଶ୍ଚର୍ଯ୍ୟ ହେବା ସହ ଭୟଭୀତ ହୋଇପଡ଼ିଥିଲେ । ଶେଷରେ ପରିବାର ଲୋକଙ୍କ ପ୍ରାୟ ୨ ଘଣ୍ଟାର ଅକ୍ଳାନ୍ତ ପରିଶ୍ରମ ପରେ ସାପ କବଳରୁ କୃଷ୍ଣଙ୍କୁ ସୁରକ୍ଷିତ ଉଦ୍ଧାର କରାଯାଇଥିଲା । ପରେ ସାପଟି କୁ ଘର ବାହାରକୁ ସୁରକ୍ଷିତ ଛାଡି ଦିଆଯାଇଥିଲା । ଏବେ ଏହି ଆଶ୍ଚର୍ଯ୍ୟଜନକ ଘଟଣା ପୂରା ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି ।