ବ୍ରହ୍ମପୁରର ଡିଜେ ଲଢେଇକୁ ନେଇ ପୁରା ରାଜ୍ୟରେ ଚର୍ଚ୍ଚା । ଗାଡିକୁ ଗାଡି ଧକ୍କା କରି ପ୍ରତିଯୋଗିତା...ବେଆଇନ ବେଫିକର ଭାବେ ଘଣ୍ଟାଏ ଧରି ଚାଲିଥିଲା ଡିଜେ ଲଢେଇ । ଶହ ଶହ ଲୋକ ଥିଲେ ହେଲେ କେହିବି ଶୁଣିବାକୁ ନାରାଜ । ସମସ୍ତେ ମସଗୁଲ ଥିଲେ ଏହି ଡିଜେ ଲଢେଇରେ ।

ଆପଣ ଷଣ୍ଢ ଲଢେଇ କିମ୍ବା ଗଞ୍ଜା ଲଢେଇ ଦେଖିଥିବେ ହେଲେ ଏବେ ବ୍ରହ୍ମପୁର ଫୁଲଟା ଗ୍ରାମର ଡିଜେ ଲଢେଇ ଏବେ ସାରା ରାଜ୍ୟରେ ଚର୍ଚ୍ଚାର ବିଷୟ ପାଲଟିଛି । ଗତ ଶୁକ୍ରବାର ନିମଖଣ୍ଡି ଥାନା ଅନ୍ତର୍ଗତ ଫୁଲଟା ଗ୍ରାମରେ ଦୁଇ ସାହିର ଗଣେଶ ପୂଜା ବିସର୍ଜନ ପାଇଁ ପ୍ରସେସନ ହୋଇଥିଲା । ଦୁଇଟି ଡିଜେକୁ ଦୁଇଟି ଗଣେଶ ପୂଜା କମିଟି ବଜାଇ ଗାଁ ବୁଲୁଥିଲେ । ଏହି ସମୟରେ ଗୋଟିଏ ସାହିରେ ଦୁଇଟି ଡିଜେ ଟ୍ରକ ମୁହାଁମୁହିଁ ହୋଇଥିଲେ ।

ଏହାପରେ ଦୁଇ ଡିଜେ ଟ୍ରକ ପଛକୁ ପଛ ଧକ୍କା ମାରି ସେମାନଙ୍କ ମଧ୍ୟରେ ଆରମ୍ଭ ହୋଇଥିଲା ଲଢ଼େଇ । ଦୀର୍ଘ ୩୦ ମିନିଟ୍ ରୁ ଅଧିକ ସମୟ ଧରି ଦୁଇ ଡିଜେ ଟ୍ରକ ପରସ୍ପରକୁ ପଛପଟୁ ଧକ୍କା ଦେଇଥିଲେ । ଦୁଇ ଡିଜେ ଟ୍ରକ ଉପରେ ପ୍ରାୟ ୧୦ରୁ ଅଧିକ ଯୁବକ ଥିବାବେଳେ ଦୁଇ ଟ୍ରକର ଚତୁଃପାର୍ଶ୍ଵରେ ମଧ୍ୟ ଶତାଧିକ ଲୋକ ରହିଥିଲେ । ଏଭଳି ଦୁଇ ଡିଜେ ମଧ୍ୟରେ ହୋଇଥିବା ଲଢ଼େଇରେ ସାମାନ୍ୟ ଅସାବଧାନତା ହୋଇଥିଲେ ଅନେକଙ୍କ ଜୀବନ ଯିବା ସୁନିଶ୍ଚିତ ।

ଏଭଳି ଏକ ଛାତିଥରା ଭିଡ଼ିଓ ସୋସିଆଲ ମିଡ଼ିଆରେ ଭାଇରାଲ ହେବା ପରେ ଏବେ ଆକ୍ସନ ମୋଡରେ ପୋଲିସ ଓ ଜିଲ୍ଲା ପ୍ରଶାସନ । ଦୁଇ ଡିଜେକୁ ଜବତ କରାଯିବା ସହ ଡିଜେ ଦୋକାନକୁ ମଧ୍ୟ ସିଲ୍ କରିଛି ଜିଲ୍ଲା ପ୍ରଶାସନ ।

Argus News | argus news | Odisha Latest News, Breaking News, Trending News, Live TV