ଅର୍ଗସ ବ୍ୟୁରୋ: ପୁରୀ ଜିଲ୍ଲାର ୨ଶହ କିଲୋମିଟର ପରିବ୍ୟାପ୍ତ ସମୁଦ୍ରକୂଳର ସୁରକ୍ଷା ସଠିକ ଢଙ୍ଗରେ ହୋଇପାରୁଛି ତ । ଏହି ପ୍ରଶ୍ନ ସେତେବେଳେ ଉଠିଛି ଯେତେବେଳେ ସାମୁଦ୍ରିକ ଥାନା ଗୁଡିକରେ ନାହାନ୍ତି ଆବଶ୍ୟକ କର୍ମଚାରୀ । ସମୁଦ୍ରକୂଳର ସୁରକ୍ଷା ପାଇଁ ଗଠନ ହୋଇଛି 4ଟି ସାମୁଦ୍ରିକ ଥାନା । ପେଣ୍ଠକଟା, ଚନ୍ଦ୍ରଭାଗା, ଅସ୍ତରଙ୍ଗ, ଅରଖକୁଦ । ଏହି ୪ ଥାନାରେ ମଞ୍ଜୁର ହୋଇଛି ୨୧୭ ପଦବୀ । ବିଡମ୍ବନାର ବିଷୟ ହେଲା ଏସବୁ ଥାନାରେ ଏବେ ବି ଖାଲି ପଡ଼ିଛି ୧୧୮ ପଦବୀ । ଗୋଟିଏ ପଟେ ଅନୁପ୍ରବେଶ ଚିନ୍ତା । ଅନ୍ୟପଟରେ ଡଲଫିନ ଓ ଅଲିଭ ରିଡଲେ ଙ୍କ ସୁରକ୍ଷାର ଦାୟିତ୍ଵ । ପୁଣି ବେଆଇନ ଟ୍ରଲର ଓ ବୋଟ ଉପରେ ଲାଗିପାରୁନି ରୋକ। ଅଭିଯୋଗ, ପୁରୀର ସମୁଦ୍ରକୂଳ ଅଞ୍ଚଳକୁ ସୁରକ୍ଷା ଦେବା ପାଇଁ ମଞ୍ଜୁର ପଦବୀ ପୂରଣ ନ କରିପରିବା ତତ୍କାଳୀନ ସରକାରର ଅପାରଗତା।

ଅସଜଡା ଭିତ୍ତିଭୂମି ବି ବଢ଼ାଉଛି ଚିନ୍ତା । ସାଗର କବଚ ସମରାଭ୍ୟାସ କରୁଛନ୍ତି। ସାଗର ମିତ୍ର ଓ ଗୁଇନ୍ଦା ସହାୟତାରେ ସଜାଗ ଥିବା ଦର୍ଶାଇ ଆସୁଛି ସାମୁଦ୍ରିକ ପୋଲିସ । କିନ୍ତୁ କେଉଁଠି ଅନୁମତି ନଥାଇ ଜଳକ୍ରୀଡା ବୋଟ ଚାଲୁଛି ତ ଆଉ କେଉଁଠି ବେଆଇନ ଭାବେ ଟ୍ରଲର ଚାଲୁଛି। ଅନୁପ୍ରବେଶ ରୋକିବାକୁ ପୋଲିସ ପାଖରେ ଦ୍ରୁତଗାମୀ ବୋଟ ନାହିଁ । ଅନୁଭୂତି ସମ୍ପନ୍ନ କର୍ମଚାରୀ ବା ଅଧିକାରୀ ବି ନାହାନ୍ତି।ଉପକୂଳ ସୁରକ୍ଷା ପାଇଁ ଅତ୍ୟାଧୁନିକ ଉପକରଣ ଗୁଡିକ ବି ଧୀରେ ଧୀରେ ଅକାମୀ ହେଉଛି । ଯାହାକୁ ନେଇ ଚିନ୍ତା ବ୍ୟକ୍ତ କରିଛନ୍ତି ବୁଦ୍ଧିଜୀବୀ।

ମଞ୍ଜୁର ପଦବୀ ପୂରଣ ନ ହେବା କାରଣରୁ ସମୁଦ୍ରକୂଳର ସୁରକ୍ଷା ଏବେ ମେରାଇନ ଥାନା ପାଇଁ ଚ୍ୟାଲେଞ୍ଜ ହୋଇଛି । ତେବେ ନୂଆ ସରକାର ଏହା ଉପରେ ଗୁରୁତ୍ବ ଦେଇ ପଦକ୍ଷେପ ନେବେ ବୋଲି ଆଶା ବାନ୍ଧିଛନ୍ତି ସ୍ଥାନୀୟ ବାସିନ୍ଦା ।

ଅଧିକ ପଢ଼ନ୍ତୁ ଓଡିଶା ଖବର:

Argus News | argus news | -Argusnews Home: Odisha Latest News, Breaking News, Trending News, Live TV and more