ବିଜୁଙ୍କ ନାଁରେ ଦଳ ଗଢ଼ିଲେ । ୨୪ ବର୍ଷ ବିଜୁଙ୍କ ନାଁ ବିକି ଶାସନ କଲେ । ହେଲେ ନିଜେ ବିଜୁଙ୍କୁ ଭୁଲି ଗଲେ । ସରକାରରେ ଥାଇ ବି ବିଜୁଙ୍କ ପାଇଁ କିଛି କରି ନାହିଁ ବିଜେଡି । ଏହାର ଏକ ଜ୍ୱଳନ୍ତ ଉଦାହରଣ ହେଉଛି ପ୍ରବାଦ ପୁରୁଷଙ୍କ ସ୍ମୃତି ରକ୍ଷା ପାଇଁ ହୋଇଥିବା ଘର । ଯାହାକି ଏବେ ଭୂତ କୋଠି ପାଲଟିଛି । ଏହି ଘରଟି ତାଙ୍କର ପୈତୃକ ମାଟି ଗଞ୍ଜାମ ଜିଲ୍ଲା ବେଲଗୁଣ୍ଠା ଘୁମୁସର ନୂଆଗାଁରେ ରହିଛି ।

୧୯୧୬ ମସିହା ମାର୍ଚ୍ଚ ୫ରେ କଟକ ତୁଳସିପୁର ଆନନ୍ଦ ଭବନରେ ଜନ୍ମ ଗ୍ରହଣ କରିଥିଲେ ପ୍ରବାଦ ପୁରୁଷ ବିଜୁ ବାବୁ । ମାତ୍ର ନିଜ ପୈତୃକ ମାଟି ଗଞ୍ଜାମ ଜିଲ୍ଲା ବେଲଗୁଣ୍ଠା ଘୁମୁସୁର ନୂଆଗାଁକୁ ସେ କେବେବି ଭୁଲିନଥିଲେ। ଯେତେବେଳେ ବି ବିଜୁବାବୁ ଗଞ୍ଜାମ ଜିଲ୍ଲାକୁ ଆସୁଥିଲେ ଘୁମୁସୁର ନୂଆଗାଁର ବଡ ନଦୀ କୂଳରେ ଥିବା ଘରେ ରହି ଗ୍ରାମବାସୀଙ୍କ ଦୁଃଖସୁଖ ବୁଝୁଥିଲେ । ହେଲେ ଆଜି ସେହି ପ୍ରବାଦ ପୁରୁଷଙ୍କ ସ୍ମୃତି ରକ୍ଷା ପାଇଁ ହୋଇଥିବା ଘୂ.ନୂଆଗାଁ ଘର ଭୂତକୋଠି ପାଲଟିଛି ।

ବିନା ପିଲରରେ କେବଳ ଲୁହା ପାଇପ୍ ସାହାଯ୍ୟରେ ଇଟା କାନ୍ଥରେ ଘର ନିର୍ମାଣ ହୋଇଥିଲା । ଯାହାକି ଏବେ ଜରାଜୀର୍ଣ୍ଣ ଅବସ୍ଥାରେ । ଦୟନୀୟ ସ୍ଥିତିରେ ଗାଁରେ ପଡି ରହିଛନ୍ତି ଦାୟାଦ ।

ଦଳ କଥା ଛାଡନ୍ତୁ, ପୁଅ ହିସାବରେ ଖୋଦ୍ ନବୀନ ପଟ୍ଟନାୟକ ବି ଦୀର୍ଘ ବର୍ଷ ଶାସନ କାଳରେ ନିଜ ପିତାଙ୍କ ପୈତୃକ ଗ୍ରାମ ପ୍ରତି ନଜର ଦେଇନାହାନ୍ତି କି ବିଜୁଙ୍କ ସ୍ମୃତି ଉଦ୍ଦେଶ୍ୟରେ ଆଖିଦୃଶିଆ ସେପରି କିଛି ପଦକ୍ଷେପ ନେଇ ନାହାନ୍ତି । ଏପରିକି ବିଜେଡି ଶାସନ କାଳରେ ଏନେଇ ଅଞ୍ଚଳବାସୀଙ୍କ ଗୁହାରି ପରେ ବି ନଜର ଦିଆଯାଇନାହିଁ । ଯାହାକି ବିଜେପି ସରକାର ଏଥିପ୍ରତି ନଜର ଦେବେ ବୋଲି ଆଶା ଭରିଛନ୍ତି ଅଞ୍ଚଳବାସୀ ।