ଦୁର୍ଗମରେ ଅଚଳ ବସୁଧା ପ୍ରକଳ୍ପ। କାମରେ ଆସୁନି ସୋଲାର ଟ୍ୟାପ l ଉତ୍କଟ ଜଳ ସମସ୍ୟାରେ ପୋଡ଼ାପଦରବାସୀ l ନୂଆପଡ଼ା ସିନାପାଲି ବ୍ଲକ ଘାଟମାଲ ପଞ୍ଚାୟତର ଦୁର୍ଗମ ବଣ ପାହାଡ଼ ଘେରା ପୋଡ଼ାପଦର ଗାଁ l ଏଠାରେ ବସବାସ କରୁଥିବା ଆଦିବାସୀଙ୍କୁ ବର୍ଷତମାମ ଘାରିଛି ପାନୀୟ ଜଳ ଚିନ୍ତା l ପାଣି ପାଇଁ ଗାଁର ମହିଳାମାନେ ଏକଜୁଟ ହୋଇ ଜଙ୍ଗଲୀ ରାସ୍ତା ଦେଇ 1 କି.ମି ଦୂର ଜମି ହୁଡ଼ାକୁ ଯାଆନ୍ତି ପାଣି ପାଇଁ l ସେଠାରେ ଗାତ ଖୋଳି ଗୋଳିଆ ପାଣିକୁ ପ୍ରଥମେ ସଫା କରନ୍ତି l ପରେ ଜଣଙ୍କ ପରେ ଜଣେ ମହିଳା ଗରା ମାଠିଆରେ ପାଣି ସଂଗ୍ରହ କରି ଗାଁକୁ ଫେରନ୍ତି l

ପୋଡ଼ାପଦର ଗାଁରେ ବସୁଧା ପ୍ରକଳ୍ପ ହୋଇଛି ମାତ୍ର ତାହା ଅଚଳ l ଠିକ ସେହିପରି ଗାଁରେ ଥିବା ସୋଲାର ଟ୍ୟାପ ମଧ୍ୟ ଅକାମି l ଖାଲିସେତିକି ନୁହେଁ ନଳକୂଅର ପାଣି ମଧ୍ୟ ପିଇବା ଯୋଗ୍ୟ ନୁହେଁ l ଏପରି ସ୍ଥିତିରେ ବାଧ୍ୟ ହୋଇ ଚୁଆଁ କରି ପାଣି ସଂଗ୍ରହ କରି ଲୋକ ଶୋଷ ମେଣ୍ଟାଉଛନ୍ତି l ସମସ୍ୟା ପ୍ରତି ବିଭାଗୀୟ ଯନ୍ତ୍ରୀ କି ବ୍ଲକ ପ୍ରଶାସନର ନଜର ନାହିଁ l ଯେତେ ଅଭିଯୋଗ କଲେ ବି କେହି ଶୁଣୁ ନଥିବା ଅଭିଯୋଗ ହୋଇଛି l ଭାଗ୍ୟ ଏମିତି ପ୍ରକଳ୍ପ ଥାଇ ପାଣି ପାଇ ପାରୁନାହାନ୍ତି ପୋଡ଼ାପଦରବାସୀ। ଆଉ ଏସମ୍ପର୍କରେ ପ୍ରଶାସନ ସବୁ ଜାଣି ନିରବ l