ରାଜ୍ୟ ଓ ରାଜ୍ୟ ବାହାରେ ମାତିଛନ୍ତି ପଲ୍ୟୁସନ ଦଲାଲ୍ । ଅର୍ଗସରେ ପର୍ଦ୍ଦାଫାସ୍ ପରେ ଆକ୍ସନ ମୋଡକୁ ଆସିଛନ୍ତି ରାଜ୍ୟ ସରକାର । ୫୨ଟି ପଲ୍ୟୁସନ ସେଣ୍ଟରର ଲାଇସେନ୍ସ ରଦ୍ଦ କରାଯାଇଥିବା କହିଛନ୍ତି ପରିବହନ କମିଶନର । କିନ୍ତୁ ପ୍ରଶ୍ନ ହେଲା ରାଜ୍ୟ ବାହାରର ଏ ଦଲାଲମାନଙ୍କ ଉପରେ କି ଆକ୍ସନ ହେବ ? ଯେଉଁମାନେ ଏହି ଦଲାଲଙ୍କ ମାଧ୍ୟମରେ ପଲ୍ୟୁସନ ସାର୍ଟିଫିକେଟ୍ କରାଇଛନ୍ତି ସେମାନଙ୍କର ସାର୍ଟିଫିକେଟ୍ ବୈଧ ରହିବ ତ ?

ବେଆଇନ ଭାବେ ଚାଲିଥିବା PUCC ସାର୍ଟିଫିକେଟ୍ କେଳେଙ୍କାରୀ । ଆନ୍ତଃରାଜ୍ୟ ନେଟୱର୍କର ପର୍ଦ୍ଦାଫାସ୍ କରିଛି ଅର୍ଗସ୍ । ଖବର ପ୍ରସାରଣ ପରେ ଏବେ ଦଲାଲଙ୍କ ଭିତରେ ଛନକା । ଅଧିକାଂଶ ଦଲାଲ କାର୍ଯ୍ୟାନୁଷ୍ଠାନ ଭୟରେ ଗଳାବାଟରେ ଆଉ PUCC ସାର୍ଟିଫିକେଟ କରୁନାହାନ୍ତି ।

ସେପଟେ ମାମଲାରେ ଆସିଛି ପରିବହନ କମିଶନର ଅମିତାଭ ଠାକୁରଙ୍କ ପତିକ୍ରିୟା । PUCC ସେଣ୍ଟର ଗୁଡ଼ିକ ଚେକିଂ କରାଯାଉଛି । ଏଯାଏଁ ୫୨ଟି PUC ସେଣ୍ଟର ଲାଇସେନ୍ସ ସସପେଣ୍ଡ କରାଯାଇଛି । ସେମାନଙ୍କୁ କାରଣ ଦର୍ଶାଅ ନୋଟିସ କରାଯାଇଛି । ସୋ କଜ୍ ଆସିବା ପରେ କିଛି ଭୁଲ ଥିଲେ ସେମାନଙ୍କର ଲାଇସେନ୍ସ ବାତିଲ କରାଯିବ ।

ଅନ୍ୟପଟେ ଜନତାଙ୍କ ମଧ୍ୟରେ ଦେଖାଯାଇଛି ଅସନ୍ତୋଷ । PUCC ସାର୍ଟିଫିକେଟ୍ ପାଇଁ ଗାଡ଼ି ଚାଳକମାନେ ଘଣ୍ଟା ଘଣ୍ଟା ଲମ୍ବା ଲାଇନ୍ ଲଗାଉଥିବା ବେଳେ ସେପଟେ ଦଲାଲମାନଙ୍କ ଏପରି କାରନାମା ଦେଖି ସମସ୍ତେ ଅସନ୍ତୋଷ ପ୍ରକାଶ କରିବା ସହ ଦୃଢ଼ କାର୍ଯ୍ୟାନୁଷ୍ଠାନ ପାଇଁ ଦାବି କରିଛନ୍ତି ।