ଭୁବନେଶ୍ଵର: ଅନ୍ୟକୁ ଦେଉଥିଲେ ଶିକ୍ଷା, ହେଲେ ନିଜେ କରୁଥିଲେ ଚୋରି । ୟୁଟ୍ୟୁବ୍‌ ଚ୍ୟାନେଲ୍‌ରେ ପ୍ରବଚନ ଦେଉଥିବା ଭଣ୍ଡ ପ୍ରବଚକକୁ ଖଣ୍ଡଗିରି ବାରି ଲୁଟ୍‌ ଘଟଣାରେ ବାନ୍ଧିଛି କମିଶନରେଟ୍ ପୋଲିସ । ୨ ଶହ ଗ୍ରାମ୍‌ ସୁନା, ୧ ଲକ୍ଷ ନଗଦ ଟଙ୍କା, ବାଇକ୍‌, ଲୁହା ରଡ୍‌ ଜବତ କରିଛି । ଗିରଫ ଅଭିଯୁକ୍ତ ମନୋଜ ନାଁରେ ବିଭିନ୍ନ ଥାନାରେ ରହିଛି ୧୦ଟି ମାମଲା ।

ଗତ ୧୪ ତାରିଖ ଦିନ ଖଣ୍ଡଗିରି ବାରି ଅଞ୍ଚଳରୁ ବ୍ୟବସାୟୀଙ୍କ ଘରୁ ଲୁଟ୍ ହୋଇଥିଲା । ଆଉ ମାମଲାରେ ପୋଲିସକୁ ମିଳିଛି ସଫଳତା, ବନ୍ଧା ହୋଇଛି ପ୍ରବଚକ ଚୋର ମନୋଜ କୁମାର ସିଂ । ଲୁଟ୍ ପରେ ସୁନାକୁ ବନ୍ଧକ ରଖି ମନୋଜ ଋଣ ଆଣିଥିବା ତଦନ୍ତ ସମୟରେ ଜାଣିବାକୁ ପାଇଛି ପୋଲିସ । ଗିରଫ ମନୋଜ ନାଁରେ କମିସନରେଟ ପୋଲିସ ଓ ବିଭିନ୍ନ ଜିଲ୍ଲାରେ ୧୦ଟି ମାମଲା ରହିଛି । ପୂର୍ବରୁ ଜେଲ୍ ଯାଇଥିବା ମନୋଜ ଜେଲରୁ ଫେରି ଚେଞ୍ଜ ୟୋର ଲାଇଫ ନାଁରେ ୟୁଟ୍ୟୁବ୍ ଚ୍ୟାନେଲ୍ ଖୋଲି ପ୍ରବଚନ ଦେଉଥିଲା ।

ଏବେ ଚୋର ଗିରଫ ପରେ ଚୋରି ସୁନା ଗହଣା ପାଇଛନ୍ତି ପରିବାର ଲୋକ । ଯାହାକୁ ନେଇ ସେମାନେ ଖୁସିବ୍ୟକ୍ତ କରିଛନ୍ତି । ଅଗଷ୍ଟ ୧୪ ତାରିଖ ଦିନ ନବ ଦମ୍ପତି ଘର ତାଲା ପକାଇ ଅଫିସ୍ ଯାଇଥିଲେ । ଦିନ ଦ୍ଵିପ୍ରହରରେ ଘରେ ପଶି କଳା କନା ବୁଲାଇ ଥିଲେ ଲୁଟେରା ।

ଘର କବାଟ ଭାଙ୍ଗି, ଗଡ୍‌ରେଜ ତାଡ଼ି ଲୁଟି ନେଇଥିଲେ ସୁନା ଗହଣା ଓ ନଗଦ ଟଙ୍କା । ଭରତପୁର ଥାନାରେ ଅଭିଯୋଗ ପରେ ପୋଲିସ ସ୍ଥାନୀୟ ଅଞ୍ଚଳରେ ଲାଗିଥିବା ସିସିଟିଭି ଫୁଟେଜ ଯାଞ୍ଚ କରି ଅଭିଯୁକ୍ତଙ୍କ ବିଷୟରେ ତଥ୍ୟ ପାଇଥିଲା । ଆଉ ଏବେ ହାତକଡ଼ି ପିନ୍ଧାଇଛି ।

ଓଡ଼ିଶା ସମ୍ପର୍କିତ ଅଧିକ ଖବର ପଢ଼ନ୍ତୁ