କଟକ: ଉପକୂଳରୁ ଉପାନ୍ତ ସବୁଠି କାନ୍ଦୁଛି ଚାଷୀ । କାଳବୈଶାଖୀ ସାଙ୍ଗକୁ ଲଗାଣ ବର୍ଷା ସବୁକିଛି ଉଜାଡି ଦେଇଛି । ବର୍ଷା ସିନା ଛାଡିଗଲା ହେଲେ ଦେଇଗଲା ଦୁର୍ଦ୍ଦଶା । ଚାଷୀର ସୁନାର ଫସଲକୁ ଛାରଖାର କରିଦେଲା ଏହି ଲଗାଣ ବର୍ଷା । ବିଶେଷ କରି ବାଇଗଣ, ମକା, କୋବି, କଲରା, ଟମାଟ, କାକୁଡି, ତରଭୁଜ ଚାଷ ଆଦି ବେଶ୍ ପ୍ରଭାବିତ ହୋଇଛି । ଧାର କରଜ କରି ହଜାର ହଜାର ଟଙ୍କା ଖର୍ଚ୍ଚ କରି ଚାଷ କରିଥିବା ପରିବା ଚାଷ ସବୁ ନଷ୍ଟ ହୋଇପଡିଛି । ଫଳରେ ଆଠଗଡ଼ ଅଞ୍ଚଳର ଚାଷୀକୂଳ ଏବେ ହତାସ ହୋଇପଡିଛନ୍ତି ।

ରାଜ୍ୟରେ ଗୁରୁଚାପ ପ୍ରଭାବରେ ଲଗାଣ ବର୍ଷାରେ ପୁରା ବେହାଲ ହୋଇ ପଡିଛନ୍ତି ଆଠଗଡ଼ ଚାଷୀକୁଳ । କାଳବୈଶାଖୀ ସାଙ୍ଗକୁ ଲଗାଣ ବର୍ଷାରେ ଧୋଇ ହୋଇଯାଇଛି ପରିବା ଚାଷ । ଚଳିତ ଖରାଟିଆ ପରିବା ଫସଲ କରିଥିଲା ଦୁଇ ପଇସା ରୋଜଗାର କରିବା ପାଇଁ । କିନ୍ତୁ ଦୁଇ ଦିନ ଧରି ଲଗାଣ ବର୍ଷା ସାଙ୍ଗକୁ ଅଦିନିଆ ଝଡ଼ ତୋଫାନ ସବୁ ଫସଲକୁ ନଷ୍ଟ କରି ଦେଇଛି ।

ଆଉ କିଛି ଦିନ ପରେ ଅମଳ ହେବାକୁ ଥିବା ପରିବା ଏବେ ଚାଷ ଜମିରେ ଶୋଇ ଯାଇଛି । ମାଟି କାମୁଡି ପଡିଛି ନୂଆ କରି ମୁଣ୍ଡ ଟେକୁଥିବା ପରିବା ଗଛ ।

Argus News | argus news | Odisha Latest News, Breaking News, Trending News, Live TV