ଅର୍ଗସ ବ୍ୟୁରୋ: ସରକାର ଯାହା କରିପାରିଲେନି, ସୁରଜ ତାହା କଲେ । କାଳ କାଳ ଯାହା ହୋଇନଥିଲା ଚୁଟକିରେ କରିଦେଲେ ସୁରଜ । ବିଧାୟକଙ୍କ କାମରେ ଖୁସି ହୋଇଗଲେ ପୂରା ଚାଷୀକୂଳ । ସେଇଥି ଲାଗି ତ ସୁରଜଙ୍କୁ ନେଇ ଏବେ ଚର୍ଚ୍ଚା ଜୋର । ନିଷ୍ଠାପର କାମ ପାଇଁ ସବୁବେଳେ ଚର୍ଚ୍ଚାରେ ରୁହନ୍ତି ସୁରଜ । ହେଲେ ଏବେ ଖାସ କରି ଚଷାଭାଇଙ୍କ ପାଇଁ ଯେଉଁ କାମ କରିଛନ୍ତି ତାହାକୁ ଯେତେ ପ୍ରଶଂସା କଲେ ବି କମ ପଡ଼ିବ ।  କାରଣ 10 ଖଣ୍ଡ ପଞ୍ଚାୟତର ପ୍ରାୟ  ହଜାର ହଜାର ଚାଷୀଙ୍କ ମୁହଁରେ ହସ ଫୁଟାଇଛନ୍ତି ଧାମନଗର ବିଧାୟକ ସୁରଜ ସୂର୍ଯ୍ୟବଂଶୀ । 

ଭଦ୍ରକ ଧାମନଗର ବ୍ଲକ୍‌ର ଧୁଷୁରୀ, ଭଟ୍ଟସାହି, ନଦୀଗାଁ ପଞ୍ଚାୟତରେ କଣ୍ଡିଆ ନଦୀରେ ଦୀର୍ଘ 30 ବର୍ଷ ଧରି ଚାଷୀ ମୂଳାଡିହ ସ୍ଲୁଇସ୍ ଗେଟ୍ ନିର୍ମାଣ ପାଇଁ ରାଜ୍ୟ ସରକାରଙ୍କୁ ବାରମ୍ବାର ଦାବି ଜଣାଇ ଆସୁଥିଲେ । ହେଲେ ତାଙ୍କ କଥା କେହି ଶୁଣି ନ ଥିଲେ । ବାରମ୍ବାର ନିରାଶ ହେବା ପରେ ଶେଷରେ ସମସ୍ୟାକୁ ନେଇ ସ୍ଥାନୀୟ ଯୁବ ବିଧାୟକଙ୍କ ଦୃଷ୍ଟି ଆକର୍ଷଣ କରିଥିଲେ ଚାଷୀ ।

ଯୁବ ବିଧାୟକ ଏହି ବିଷୟକୁ ନେଇ ନଭେମ୍ବର ମାସରେ ବିଧାନସଭାରେ 436 ନଂ ଚିଠି ମାଧ୍ୟମରେ ଉପସ୍ଥାପନା କରିବା ସହିତ ଜଳସମ୍ପଦ ମନ୍ତ୍ରୀଙ୍କୁ ପ୍ରଶ୍ନ କରିଥିଲେ । ସ୍ଲୁଇସ୍ ଗେଟ୍ ପାଇଁ ଦାବି କରିଥିଲେ । ଶେଷରେ ମାର୍ଚ୍ଚ 16ରେ ଏହି ସ୍ଲୁଇସ୍ ଗେଟ୍ ପାଇଁ 2 କୋଟି 52 ଲକ୍ଷ ଟଙ୍କାର ଅର୍ଥ ମଞ୍ଜୁରୀ ହୋଇଛି । ଆଉ ଖୁବଶୀଘ୍ର ଏନେଇ କାମ ଆରମ୍ଭ ହେବ ।  ଯେଉଁ ଖବର ଶୁଣିବା ପରେ ଚାଷୀଙ୍କ ଗହଣରେ ଖୁସି କାହିଁରେ କେତେ । ସେଥିପାଇଁ ଚାଷୀମାନେ ସୁରଜଙ୍କ ବାସଭବନରେ ପହଞ୍ଚି ଧନ୍ୟବାଦ ଜଣାଇଛନ୍ତି । 

ଏପଟେ ଚାଷୀଙ୍କ ଖୁସିରେ ବେଶ ଖୁସି ହୋଇଛନ୍ତି ସୁରଜ । କହିଛନ୍ତି, ଏତେଦିନର ଦାବି ପୂରଣ ହୋଇଥିବାରୁ ମୁଁ ବେଶ ଖୁସି ।