ଗଜପତିରେ ବୁଧବାର ରାତିରୁ ଆରମ୍ଭ ହୋଇଥିଲା ବାଦଲଫଟା ବର୍ଷା । ଗୁରୁବାର ସକାଳ 8ଟା ରୁ ଅପରାହ୍ନ 2ଟା ଭିତରେ ହୋଇଥିଲା 1375ମିମି ବର୍ଷା । ଫଳରେ କେଉଁଠି ଭୂସ୍ଖଳନ ତ ଆଉ କେଉଁଠି ସୃଷ୍ଟି ହୋଇଥିଲା ବନ୍ୟା ସ୍ଥିତି । ଭୂସ୍ଖଳନ ଯୋଗୁଁ ଆର.ଉଦୟଗିରି ବ୍ଲକ ବସ୍ତ୍ରୀଗୁଡା ଗାଁର ତ୍ରିନାଥ ନାୟକ ଓ ମୋହନା ବ୍ଲକର ବନ୍ଧଗୁଡାର ଲକ୍ଷ୍ଣଣ ମଲିକଙ୍କ ମୃତ୍ୟୁ ହୋଇଛି । ରାୟଗଡ ବ୍ଲକର ପେକଟରେ ଭୂସ୍ଖଳନ ଯୋଗୁଁ ବାପପୁଅ ନିଖୋଜ ହୋଇଯାଇଛନ୍ତି । 48ଘଣ୍ଟା ପରେ ବି ଏମାନଙ୍କ ପତ୍ତା ମିଳିନି । 

ମୋହନା ନିକଟ ଲେଡାବନ୍ଧ ନିକଟରେ ରାସ୍ତା ଧୋଇଯିବା ଫଳରେ 326ନମ୍ବର ଜାତୀୟ ରାଜପଥରେ ଯାତାୟତ ବାଧାପ୍ରାପ୍ତ ହୋଇଛି । ବାଲିବସ୍ତା ଓ ମାଟି ପକାଇ ଏହାକୁ ମରାମତି କରାଯାଇଥିଲେ ବି ଗାଡି ଚଳାଚଳ ସ୍ବାଭାବିକ ହୋଇନାହିଁ । ନୂଆଗଡ ଅସୁର ଘାଟି ଓ ଶିବମନ୍ଦିର ନିକଟରେ ରାସ୍ତା ଧୋଇ ହୋଇଯାଇଥିବାରୁ ନୂଆଗଡରୁ ଖଜୁରୀପଦା ଓ ଗୁଣପୁରକୁ ଯୋଗଯୋଗ ବିଚ୍ଛିନ୍ନ ହୋଇଛି । ଗୁମ୍ମା ବ୍ଲକର ଆଶ୍ରୟଗଡ ନିକଟରେ ପୋଲ ଧୋଇଯିବା ଫଳରେ ଆଭ୍ୟନ୍ତରୀଣ ଅଞ୍ଚଳକୁ ଯୋଗାଯୋଗ ବିଚ୍ଛିନ୍ନ ହୋଇଛି ।

ଭୂସ୍ଖଳନ ପରେ ପେକଟ ଅଞ୍ଚଳରେ ଆଜି ପୁଣି ଜେସିବି ଦ୍ୱାରା ମାଟି ଖୋଳାଯାଉଛି । ମୁଖ୍ୟ ରାସ୍ତା ଉପରେ ଏବେ ବି ବଡ଼ ବଡ଼ ପଥର ପଡି ରହିଛି । ରାସ୍ତା ଉପରକୁ ଆସି ଥିବା ପଥରକୁ ବ୍ଲାଷ୍ଟ କରାଯିବ । ଭୂସ୍ଖଳନ ଓ ବନ୍ୟା ପରିସ୍ଥିତି ଯୋଗୁଁ ବ୍ୟାପକ ଫସଲ ନଷ୍ଟ ହୋଇଛି ।  ଭୁସ୍ଖଳନ ସ୍ଥାନକୁ ଗଜପତି ଜିଲ୍ଲାପାଳ ଓ ବ୍ରହ୍ମପୁର ସାଂସଦ ଗସ୍ତ କରି ଉଦ୍ଧାର କାମରେ ନିୟୋଜିତ ଓଡ୍ରାଫ୍, ଅଗ୍ନିଶମ ବିଭାଗର କର୍ମଚାରୀମାନଙ୍କ ସହ ଆଲୋଚନା କରିଛନ୍ତି ।  ନିଖୋଜ ପରିବାର ଲୋକଙ୍କୁ ଭେଟି ସାନ୍ତ୍ବନା ଜଣାଇଛନ୍ତି । ଗଜପତିର ପେକଟ ପରି ଭୁସ୍ଖଳନ ହେଉଥିିବା ଅଞ୍ଚଳ ଚିହ୍ନଟ କରି ମୁକାବିଲା ପାଇଁ ସ୍ବତନ୍ତ୍ର ପ୍ଲାନ ପ୍ରସ୍ତୁତ କରିବେ ସରକାର ।