Sweet Market / ପାର୍ବଣରେ ମିଠା ଚାହିଦାକୁ ପୂରଣ କରିପାରିବ ତ ବଜାର ? ଏପଟେ ଚିନି ମହଙ୍ଗା, ସେପଟେ ଛେନା,ପନିର ରେଡ୍

ଆସୁଛି ରାକ୍ଷୀ ପୂର୍ଣ୍ଣମୀ... ଏହା ପୂର୍ବରୁ ମିଠା ବ୍ୟବସାୟୀ ଓ ସାଧାରଣ ଗ୍ରାହକଙ୍କ ଉପରେ ଦୋହରା ମାଡ଼ । ଗୋଟିଏ ପଟେ ଚିନି ଏବଂ କ୍ଷୀର ଦର ବୃଦ୍ଧି ପାଇବା ଯୋଗୁଁ ମହଙ୍ଗା ହେବାକୁ ଯାଉଛି ମିଠା, ଅନ୍ୟପଟେ ଭେଜାଲ ପନିର ଓ ଛେନା ଉପରେ ଜୋରଦାର ଚଢ଼ାଉ ଯୋଗୁଁ ବଜାରରୁ ଗାଏବ ହୋଇଯାଇଛି ଛେନା-ପନିର । ଓଡ଼ିଶାର 'ରସଗୋଲା ହବ୍' କୁହାଯାଉଥିବା ପାହାଳ ବଜାରରେ ମିଠା ଦାମ୍ ବଢ଼ିବାକୁ ଯାଉଥିବା ବେଳେ, କଟକ ସହରରେ ଅଭାବ ଦେଖାଦେଇଛି ।

ପର୍ବପର୍ବାଣି ଋତୁ ପୂର୍ବରୁ ଚା’ ପିଉଥିବା ଲୋକଙ୍କଠାରୁ ଆରମ୍ଭ କରି ମିଠା ପ୍ରିୟଙ୍କ ପକେଟ୍‌କୁ ମହଙ୍ଗା ମାଡ଼ । ଓଡ଼ିଶାର ପ୍ରସିଦ୍ଧ ପାହାଳ ମିଠା ବଜାରରେ ଏବେ ରସଗୋଲା ଓ ଛେନାପୋଡ଼ର ଦାମ୍ ବୃଦ୍ଧି ପାଇବାକୁ ଯାଉଛି । ସପ୍ତାହେ ପୂର୍ବରୁ କ୍ୱିଣ୍ଟାଲ ପିଛା ୫ ହଜାର ୫ଶହ ଟଙ୍କା ଥିବା ଚିନି ଦର ଏବେ ବୃଦ୍ଧି ପାଇ ୬ ହଜାର ୮ ଶହ ଟଙ୍କାରେ ପହଞ୍ଚିଛି । ସେହିପରି କ୍ଷୀର ଅଭାବ ଯୋଗୁଁ ଛେନା ଦର କିଲୋ ପ୍ରତି ୨୫ ଟଙ୍କା ବୃଦ୍ଧି ପାଇଛି । ଆଉ ଏଥିପାଇଁ ପରିଚାଳନାଗତ ତ୍ରୁଟିକୁ ଦାୟୀ କରିଛନ୍ତି ରାଜ୍ୟ ବ୍ୟବସାୟୀ ସଂଘର ସଭାପତି ।

ବଜାର ଉପରେ ମହଙ୍ଗା ମାଡ଼
କ୍ଵିଣ୍ଟାଲ ପିଛା ଚିନି ଦର- ୫ ହଜାର ୫ ଶହ ରୁ ବଢ଼ି ୬ ହଜାର ୮ ଶହ ଟଙ୍କା
୫ ଟଙ୍କିଆ ରସଗୋଲା- ୭ ଟଙ୍କା ହେବା ଆଶଙ୍କା
୧୦ ଟଙ୍କିଆ ରସଗୋଲା ଦର ବଢ଼ି ୧୫ ଟଙ୍କା ହୋଇପାରେ
ଛେନାପୋଡ଼ କିଲୋ ପିଛା ଦର - ୩ ଶହ ୫୦ ରୁ ବୃଦ୍ଧି ପାଇ ୪ ଶହ ଟଙ୍କା ହେବ

ଗୋଟିଏ ପଟେ ଦରଦାମ୍ ବୃଦ୍ଧି ଚିନ୍ତା ବଢ଼ାଇଥିବା ବେଳେ, ଅନ୍ୟପଟେ କଟକ ମହାନଗର ନିଗମର ଜୋରଦାର ଚଢ଼ାଉ ଯୋଗୁଁ ବଜାରରୁ ଉଭାନ ହୋଇଯାଇଛି ଛେନା ଓ ପନିର । ଅପମିଶ୍ରିତ ପନିର କାରବାର ଉପରେ ବ୍ରେକ୍ ଲଗାଇବାକୁ ପ୍ରଶାସନ ଅଣ୍ଟା ଭିଡ଼ିବା ପରେ, ଅସାଧୁ ବ୍ୟବସାୟୀଙ୍କ ଭିତରେ ଭୟ ବଢ଼ି ଯାଇଛି । ଯେଉଁ ଦୋକାନୀ ଦିନକୁ ୧୫ ରୁ ୨୦ କିଲୋ ପନିର ବିକ୍ରି କରୁଥିଲେ, ଏବେ ତାଙ୍କ ପାଖରେ ମାତ୍ର ୧ ରୁ ୨ କିଲୋ ପନିର ମିଳୁଛି । ବ୍ୟବସ୍ୟାୟୀଙ୍କ କହିବା ହେଲା ଛେନା, ପନିର ଉପରେ ଚଢାଉ ପରେ ଆଉ ଛେନା ବ୍ୟବସ୍ୟାୟୀ ଦୁଇଦିନ ହେଲା କଟକ ସହରକୁ ଆସୁନାହାନ୍ତି । ଫଳରେ ଛେନା ଓ ପନିର ଅଭାବ ହେଲାଣି । ଯାହା ସିଧାସଳଖ ମିଠା ବ୍ୟବସାୟକୁ ପ୍ରଭାବିତ କରିଛି ।

ପାର୍ବଣ ପୂର୍ବରୁ ମିଠା ବଜାରରେ ଏହି ଦୋହରା ସଙ୍କଟ ଗ୍ରାହକଙ୍କ ସହ ବ୍ୟବସାୟୀଙ୍କ ଚିନ୍ତା ବଢ଼ାଇ ଦେଇଛି । ଗୋଟିଏ ପଟେ ଚିନି ଓ କ୍ଷୀରର ମହଙ୍ଗା ମାଡ଼, ଆଉ ଅନ୍ୟପଟେ ଭେଜାଲ କାରବାର ଉପରେ ପ୍ରଶାସନର କଡ଼ା ନଜର । ସରକାର କେବେ ଚିନି ଯୋଗାଣ ସୁପରିଚାଳନା କରୁଛନ୍ତି ଓ ଶୁଦ୍ଧ କ୍ଷୀର ଜାତୀୟ ସାମଗ୍ରୀ ବଜାରରେ ଉପଲବ୍ଧ କରାଉଛନ୍ତି, ତାହା ଦେଖିବାକୁ ବାକି ରହିଲା ।